ಉತ್ತರಾಖಂಡದ ಬೇಸಗೆ ರಾಜಧಾನಿ ಭರಾರಿಸೈನ್‌

Team Udayavani, Jun 9, 2020, 1:13 PM IST

ಡೆಹ್ರಾಡೂನ್‌: ಉತ್ತರಾಖಂಡದ ಭರಾರಿಸೈನ್‌ (ಗೈರ್‌ಸೈನ್‌) ನಗರವನ್ನು ರಾಜ್ಯದ ಬೇಸಿಗೆ ರಾಜಧಾನಿ ಎಂದು ಘೋಷಿಸಲಾಗಿದೆ.

ಚಾಮೋಲಿ ಜಿಲ್ಲೆಯ ಗೈರ್‌ಸೈನ್‌ನಿಂದ 14 ಕಿ.ಮೀ. ದೂರದಲ್ಲಿರುವ ಭರಾರಿಸೈನ್‌ ನಗರವನ್ನು ಉತ್ತರಾಖಂಡದ ಬೇಸಿಗೆ ರಾಜಧಾನಿಯನ್ನಾಗಿ ಘೋಷಿಸಿ ರಾಜ್ಯ ಸರಕಾರ ಅಧಿಸೂಚನೆ ಹೊರಡಿಸಿದೆ, ಇದಕ್ಕೆ ರಾಜ್ಯಪಾಲರು ಅನುಮೋದನೆ ನೀಡಿದ್ದಾರೆ.

ಭರಾರಿಸೈನ್‌ ನಗರದಲ್ಲಿ ಈಗಾಗಲೇ ಹಲವಾರು ವಿಧಾನಸಭಾ ಕಲಾಪಗಳನ್ನು ಆಯೋಜಿಸಲಾಗಿದೆ. ಪ್ರಸ್ತುತ ರಾಜಧಾನಿಯಾಗಿರುವ ಡೆಹ್ರಾಡೂನ್‌ ಚಳಿಗಾಲದ ರಾಜಧಾನಿಯಾಗಿ ಉಳಿಯಲಿದೆ.

2000ದ‌ಲ್ಲಿ ಉತ್ತರಪ್ರದೇಶ ರಾಜ್ಯದ ಹಿಮಾಲಯ ಪರ್ವತ ಪ್ರಾಂತ್ಯವನ್ನು ಬೇರ್ಪಡಿಸಿ ಉತ್ತರಾಖಂಡ ರಾಜ್ಯವನ್ನು ರಚಿಸಲಾಗಿತ್ತು. ಇದೇ ರೀತಿ ಜಮ್ಮು ಮತ್ತು ಕಾಶ್ಮೀರದಲ್ಲಿ ಎರಡು ರಾಜಧಾನಿಗಳಿದ್ದು, ಜಮ್ಮು ಚಳಿಗಾಲದ ರಾಜಧಾನಿಯಾಗಿದ್ದರೆ ಶ್ರೀನಗರ ಬೇಸಿಗೆ ರಾಜಧಾನಿಯಾಗಿದೆ.