ಬಿಹಾರದಲ್ಲಿ ಎನ್.ಆರ್.ಸಿ. ಇಲ್ಲ ಎನ್.ಪಿ.ಆರ್. ಮಾತ್ರ: ವಿಧಾನ ಸಭೆ ನಿರ್ಣಯ

Team Udayavani, Feb 25, 2020, 6:56 PM IST

ಪಟ್ನಾ: ಎನ್.ಡಿ.ಎ. ಅಧಿಕಾರದಲ್ಲಿರುವ ಬಿಹಾರದಲ್ಲಿ ನಾಗರಿಕರ ರಾಷ್ಟ್ರೀಯ ನೋಂದಣಿಯನ್ನು (NRC) ಜಾರಿಗೊಳಿಸದೇ ಇರುವ ನಿರ್ಣಯವನ್ನು ಅಲ್ಲಿನ ವಿಧಾನ ಸಭೆಯಲ್ಲಿ ಇಂದು ಅಂಗೀಕರಿಸಲಾಗಿದೆ. ಮತ್ತು ಮುಂದಿನ ಎಪ್ರಿಲ್ ತಿಂಗಳಿನಿಂದ ದೇಶವ್ಯಾಪಿ ಪ್ರಾರಂಭಗೊಳ್ಳುವ ರಾಷ್ಟ್ರೀಯ ಜನಸಂಖ್ಯಾ ನೋಂದಣಿಗೆ (NPR) ಷರತ್ತುಬದ್ಧ ಅನುಮತಿ ನೀಡಲು ನಿರ್ಧರಿಸಲಾಗಿದೆ.

ಈ ಮೂಲಕ ಎನ್.ಸಿ.ಆರ್. ಅನ್ನು ತನ್ನ ರಾಜ್ಯದಲ್ಲಿ ಜಾರಿಗಳಿಸಲು ನಿರಾಕರಿಸಿದ ಮೊದಲ ಎನ್.ಡಿ.ಎ. ಸರಕಾರವಾಗಿ ನಿತೀಶ್ ಕುಮಾರ್ ನೇತೃತ್ವದ ಜೆಡಿ(ಯು), ಬಿಜೆಪಿ ಸಮ್ಮಿಶ್ರ ಸರಕಾರ ಗುರುತಿಸಿಕೊಂಡಂತಾಗಿದೆ. ಈಗಾಗಲೇ ಪಶ್ಚಿಮ ಬಂಗಾಲ, ಕೇರಳ, ರಾಜಸ್ಥಾನ ಹಾಗೂ ಮಹಾರಾಷ್ಟ್ರ ರಾಜ್ಯಗಳು ಕೇಂದ್ರ ಸರಕಾರದ ಪ್ರಸ್ತಾವಿತ ಎನ್.ಆರ್.ಸಿ. ಜಾರಿಯನ್ನು ವಿರೋಧಿಸಿ ನಿರ್ಣಯಗಳನ್ನು ಅಂಗೀಕರಿಸಿವೆ.

ಎನ್.ಪಿ.ಆರ್. ಪ್ರಶ್ನಾವಳಿಗೆ ಕೇಂದ್ರ ಗೃಹ ಸಚಿವಾಲಯವು ಹೊಸದಾಗಿ ಸೇರ್ಪಡೆಗೊಳಿಸಿರುವ ವಿವಾದಾತ್ಮಕ ಪ್ರಶ್ನೆಗಳನ್ನು ಕೈಬಿಡುವ ಷರತ್ತಿನ ಆಧಾರದಲ್ಲಿ ರಾಜ್ಯದಲ್ಲಿ ಎನ್.ಪಿ.ಆರ್. ಜಾರಿಗೊಳಿಸಲು ಬಿಹಾರ ವಿಧಾನಸಭೆ ನಿರ್ಧರಿಸಿದೆ.

ಜನರು ತಮ್ಮ ಹೆತ್ತವರ ಜನ್ಮ ಸ್ಥಳ ಕುರಿತಾಗಿ ಮಾಹಿತಿ ನೀಡುವಂತಹ ಪ್ರಶ್ನೆಗಳನ್ನು ಮಾಹಿತಿ ಸಂಗ್ರಹದಾರರು ಎನ್.ಪಿ.ಆರ್. ಸಂದರ್ಭದಲ್ಲಿ ಕೇಳುವಂತಿಲ್ಲ ಎಂದು ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ವಿಧಾನ ಸಭೆಯಲ್ಲಿ ಮಾತನಾಡುತ್ತಾ ತಿಳಿಸಿದರು.