ಓಡಿ ಹೋಗಿ ಮದುವೆಯಾದ 3 ವರ್ಷದ ಬಳಿಕ ಗ್ರಾಮಕ್ಕೆ ಬಂದ ದಂಪತಿ: ಗುಂಡಿಕ್ಕಿ ಹತ್ಯೆಗೈದ ಮನೆಯವರು

Team Udayavani, Jan 11, 2024, 6:16 PM IST

ಪಾಟ್ನಾ: ಓಡಿ ಹೋಗಿ ಮದುವೆಯಾದ ಮೂರು ವರ್ಷದ ಬಳಿಕ ತನ್ನ ಗ್ರಾಮಕ್ಕೆ ಹಿಂತಿರುಗಿದ ದಂಪತಿ ಹಾಗೂ ಅವರ ಮಗುವನ್ನು ಗುಂಡಿಕ್ಕಿ ಹತ್ಯೆಗೈದ ಘಟನೆ ಬಿಹಾರದ ನೌಗಾಚಿಯಾದಲ್ಲಿ ಬುಧವಾರ(ಜ.10 ರಂದು) ನಡೆದಿರುವುದು ವರದಿಯಾಗಿದೆ.

ಘಟನೆ ಹಿನ್ನೆಲೆ: ಒಂದೇ ಗ್ರಾಮದವರಾಗಿದ್ದ ಚಂದನ್ ಕುಮಾರ್, ಅವರ ಪತ್ನಿ ಚಾಂದಿನಿ ಕುಮಾರಿ ತನ್ನ‌ 20 ರ ಹರೆಯದಲ್ಲಿ ಪ್ರೀತಿಸಿ, ಮನೆಯವರ ವಿರೋಧದ ನಡುವೆ ಓಡಿ ಹೋಗಿ ಮದುವೆಯಾಗಿದ್ದರು. ಇವರ ಪ್ರೀತಿಗೆ ಚಾಂದಿನಿ ಮನೆಯವರಿಂದ ಅವರ ವಿರೋಧ ವ್ಯಕ್ತವಾಗಿತ್ತು. 2021 ರಲ್ಲಿ ಗ್ರಾಮದಿಂದ ದೂರ ಹೋಗಿ ವಿವಾಹವಾಗಿದ್ದರು. ಮದುವೆ ಬಳಿಕ ತನ್ನ ಊರಿಗೆ ಬಂದಿರಲಿಲ್ಲ. ಮೂರು ವರ್ಷದ ಬಳಿಕ ತನ್ನ ಮಗಳೊಂದಿಗೆ ದಂಪತಿ ಹಾಸಿಗೆ ಹಿಡಿದ ಚಂದನ್ ತಂದೆಯನ್ನು ನೋಡಿ, ಹೊಸ ಮನೆಯ ದಾರಿಯತ್ತ ತೆರಳುತ್ತಿದ್ದರು. ಇದೇ ವೇಳೆ ಚಾಂದಿನಿಯ ತಂದೆ ಮತ್ತು ಸಹೋದರ ಪುಟ್ಟ ಮಗುವನ್ನು ಸೇರಿಸಿ, ದಂಪತಿಗೆ ಥಳಿಸಿದ್ದಾರೆ.

ಮೊದಲು ಚಾಂದಿನಿಯ ತಂದೆ ಪಪ್ಪು ಸಿಂಗ್‌ ಕಬ್ಬಿಣದ ರಾಡ್‌ ನಿಂದ ಥಳಿಸಿದ್ದಾರೆ. ಆ ಬಳಿಕ ತನ್ನ ಮಗ ಧೀರಜ್ ಕುಮಾರ್‌ಗೆ ಬರುವಂತೆ ಹೇಳಿ, ಮೂವರನ್ನೂ ಗುಂಡಿಕ್ಕಿ ಹತ್ಯೆಗೈದಿದ್ದಾರೆ.

ಕೃತ್ಯವೆಸಗಿ ಆರೋಪಿಗಳು ಪರಾರಿ ಆಗಿದ್ದಾರೆ. ಆರೋಪಿಗಳ ಬಂಧನಕ್ಕೆ ವಿಶೇಷ ತಂಡ ರಚಿಸಲಾಗಿದೆ ಎಂದು ನೌಗಾಚಿಯಾ ಎಸ್ಪಿ ಸುಶಾಂತ್ ಕುಮಾರ್ ಸರೋಜ್ ಹೇಳಿದ್ದಾರೆ.