ಬಾಲಿಕಾಶ್ರಮ ಹಗರಣ: ಸಚಿವೆ ಮಂಜು ವರ್ಮಾ ರಾಜೀನಾಮೆ

Team Udayavani, Aug 9, 2018, 6:00 AM IST

ಪಾಟ್ನಾ: ಮುಜಫ್ಫರ್‌ಪುರ ಬಾಲಿಕಾಶ್ರಮದಲ್ಲಿ ಬಾಲಕಿಯರ ಮೇಲೆ ಲೈಂಗಿಕ ಹಗರಣಕ್ಕೆ  ಬಿಹಾರದ ಸಮಾಜ ಕಲ್ಯಾಣ ಸಚಿವೆ ಮಂಜು ವರ್ಮಾ, ತಮ್ಮ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ. ಬಾಲಿಕಾಶ್ರಮದಲ್ಲಿ 34 ಬಾಲಕಿಯರ ಮೇಲೆ ಅತ್ಯಾಚಾರ ನಡೆಸಿರುವ ಈ ಪ್ರಕರಣದಲ್ಲಿ ಮಂಜು ವರ್ಮಾ ಪತಿ ಚಂಡೇಶ್ವರ್‌ ವರ್ಮಾ ಸಹ ಭಾಗಿಯಾಗಿ ರುವ ಆರೋಪಗಳು ಕೇಳಿಬಂದಿದ್ದವು. ತನಿಖೆಯ ವೇಳೆ, ಪ್ರಕರಣದ ಪ್ರಮುಖ ಆರೋಪಿ ಹಾಗೂ ಬಾಲಿಕಾಶ್ರಮ ನಡೆಸು ತ್ತಿದ್ದ ಬ್ರಿಜೇಶ್‌ ಠಾಕೂರ್‌ ಅವರ ಮೊಬೈಲ್‌ ಕರೆಗಳ ವಿವರಗಳಲ್ಲಿ ಚಂಡೇ ಶ್ವರ್‌ ವರ್ಮಾ ಗೆ ಠಾಕೂರ್‌ ಜನವರಿಯಿಂದ ಜೂನ್‌ವರೆಗೆ 17 ಬಾರಿ ಕರೆ ಮಾಡಿರುವುದು ತಿಳಿದು ಬಂದಿತ್ತು. ವಿಚಾರಣೆ ವೇಳೆ ಠಾಕೂರ್‌, ವರ್ಮಾ ಅವರು ಆಗಾಗ್ಗೆ ಬಾಲಿಕಾಶ್ರಮಕ್ಕೆ ಬಂದು ಉಳಿದುಕೊಳ್ಳು ತ್ತಿದ್ದ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದ. ಈ ಎಲ್ಲಾ ಬೆಳವಣಿಗೆಗಳ ನಂತರ, ಸಮಾಜ ಕಲ್ಯಾಣ ಸಚಿವರ ರಾಜಿನಾಮೆಗೆ ಪ್ರತಿಪಕ್ಷ ಗಳು ಒತ್ತಾಯಿಸುತ್ತಿದ್ದವು. ಬಿಹಾರ ಮುಖ್ಯ ಮಂತ್ರಿ ನಿತೀಶ್‌ ಕುಮಾರ್‌ ಸೋಮವಾರ ಸುದ್ದಿಗೋಷ್ಠಿ ನಡೆಸಿ ಪ್ರಕರಣದಲ್ಲಿ ಭಾಗಿ ಆಗಿರುವ ಯಾರೇ ಆಗಲಿಅವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿದ್ದರು.

ಪರಿಶೀಲನೆಗೆ ಆದೇಶ: ಬಿಹಾರ ಮತ್ತು ಉತ್ತರ ಪ್ರದೇಶದಲ್ಲಿನ ಬಾಲಿಕಾಶ್ರಮಗಳ ಹಗರಣ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ 60 ದಿನಗಳ ಒಳಗಾಗಿ ದೇಶಾದ್ಯಂತ ಇರುವ 9 ಸಾವಿರಕ್ಕೂ ಅಧಿಕ ಹೆಣ್ಣು ಮಕ್ಕಳ ಮತ್ತು ಇತರ ಆಶ್ರಮಗಳನ್ನು ಪರಿಶೀಲನೆ ನಡೆಸಿ ಅಲ್ಲಿನ ಸ್ಥಿತಿ ಗತಿ ಬಗ್ಗೆ ವರದಿ ಸಲ್ಲಿಸಲು  ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗಕ್ಕೆ  ಸೂಚಿಸಿದೆ.