ಯೋಧರಿಗೆ ಬರ್ತ್‌ಡೇ ರಜೆ

Team Udayavani, Aug 13, 2018, 9:57 AM IST

ಹೊಸದಿಲ್ಲಿ: ಚೀನ ಜತೆಗೆ ಗಡಿ ಕಾಯುವ ಹೊಣೆ ಹೊತ್ತಿರುವ ಇಂಡೋ ಟಿಬೆಟಿಯನ್‌ ಬಾರ್ಡರ್‌ ಫೋರ್ಸ್‌ (ಐಟಿಬಿಪಿ) ಸಿಬಂದಿಯ ಜನ್ಮದಿನದಂದು ಅರ್ಧ ದಿನ ರಜೆ ನೀಡಲು ನಿರ್ಧರಿಸಲಾಗಿದೆ. ಅದೇ ದಿನ ಕೇಕ್‌ ಕತ್ತರಿಸಿ ಸಂಭ್ರಮಾಚರಣೆ ನಡೆಸಲು ಅನುಮತಿ ನೀಡಲಾಗಿದೆ. ಅರೆ ಸೇನಾ ಸಿಬಂದಿಯಲ್ಲಿನ ಸ್ಥೈರ್ಯ  ಮತ್ತು ಮನೋಬಲ ಹೆಚ್ಚಿಸುವ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿದೆ. ಸೇನಾ ಪಡೆಯಲ್ಲಿನ ಪುರುಷ ಅಥವಾ ಮಹಿಳಾ ಯೋಧರ ಹುಟ್ಟಿದ ಹಬ್ಬದ ವಿವರಣೆಯನ್ನು ನೋಟಿಸ್‌ ಬೋರ್ಡ್‌ನಲ್ಲಿ ಪ್ರಕಟಿಸಬೇಕಾಗುತ್ತದೆ. ಜತೆಗೆ ಅವರಿಗೆ ಹಿರಿಯ ಅಧಿಕಾರಿಯೊಬ್ಬರ ವತಿಯಿಂದ ಹೂಗುತ್ಛ ನೀಡಿ ಅಭಿನಂದನೆ ಸಲ್ಲಿಸಬೇಕು. ಆ ದಿನ ಅವರಿಗೆ ಸಮವಸ್ತ್ರ ಧರಿಸದೇ ಇರಲು ಅವಕಾಶ ಮಾಡಿಕೊಡಲಾಗಿದ್ದು, ಇಷ್ಟದ ದಿರಿಸನ್ನು ಧರಿಸಲೂ ಅನುಮತಿ ನೀಡಲಾಗಿದೆ.

ಶೀಘ್ರದಲ್ಲೇ ಸ್ವದೇಶಿ ಉಪಕರಣಗಳು
ವಿಶ್ವದ ಅಪಾಯಕಾರಿ ಯುದ್ಧಭೂಮಿ ಎಂದೇ ಪರಿಗಣಿಸಲ್ಪಟ್ಟಿರುವ ಸಿಯಾಚಿನ್‌ನಲ್ಲಿ ನಿಯೋಜಿಸಲಾದ ಯೋಧರಿಗೆ ವಿಶೇಷ ಉಡುಗೆ, ಸ್ಲಿàಪಿಂಗ್‌ ಕಿಟ್‌ ಹಾಗೂ ಪ್ರಮುಖ ಉಪಕರಣಗಳನ್ನು ಒದಗಿಸುವ ದೀರ್ಘಾವಧಿಯ ಯೋಜನೆಗೆ ಸೇನೆ ಅಂತಿಮ ಸ್ಪರ್ಶ ನೀಡುತ್ತಿದೆ. ಇಲ್ಲಿರುವ ಯೋಧರಿಗೆ ವಿಪರೀತ ಚಳಿ ತಡೆಯುವಂಥ ವಸ್ತ್ರ ಹಾಗೂ ಪರ್ವತಾ ರೋಹಣಕ್ಕೆ ಬೇಕಾದ ವಸ್ತುಗಳನ್ನು ಆಮದು ಮಾಡಿಕೊಳ್ಳಲು ಭಾರತ ಪ್ರತಿ ವರ್ಷ 800 ಕೋಟಿ ರೂ. ವೆಚ್ಚ ಮಾಡುತ್ತದೆ. ಈಗ ದೇಶದಲ್ಲೇ ಇವುಗಳನ್ನು ತಯಾರಿಸುವ ಮೂಲಕ 300 ಕೋಟಿ ರೂ. ಉಳಿತಾಯ ಮಾಡಲು ಸೇನೆ ನಿರ್ಧರಿಸಿದೆ. ಖಾಸಗಿ ಸಹಭಾಗಿತ್ವದಲ್ಲಿ ಈ ಯೋಜನೆ ಕೈಗೊಳ್ಳುವ ಪ್ರಕ್ರಿಯೆ ನಡೆಯುತ್ತಿದೆ ಎಂದು ಸೇನಾ ಮೂಲಗಳು ತಿಳಿಸಿವೆ.