ಒಡಿಶಾ ಲೆಕ್ಕಾಚಾರ : ಬೈಜಯಂತ್‌ ಜೆ ಪಾಂಡಾಗೆ ಬಿಜೆಪಿ ಪ್ರಮುಖ ಹುದ್ದೆ

Team Udayavani, Mar 8, 2019, 3:33 PM IST

 ಭುವನೇಶ್ವರ : ಲೋಕಸಭಾ ಚುನಾವಣೆ ಹೊಸ್ತಿಲಲ್ಲಿ  ಬಿಜೆಡಿ ತೊರೆದು ಬಿಜೆಪಿ ಸೇರ್ಪಡೆಯಾಗಿದ್ದ ಮಾಜಿ ಸಂಸದ ಬೈಜಯಂತ್‌ ಜೆ ಪಾಂಡಾ ಅವರನ್ನು ಬಿಜೆಪಿ ರಾಷ್ಟ್ರೀಯ ಉಪಾಧ್ಯಕ್ಷ ಮತ್ತು ವಕ್ತಾರ ಹುದ್ದೆಯನ್ನು ನೀಡಲಾಗಿದೆ. 

ಒಡಿಶಾದ ಪ್ರಭಾವಿ ನಾಯಕರಾಗಿರುವ ಕೇಂದ್ರಪಾರಾ ಕ್ಷೇತ್ರದ ಸಂಸದರಾಗಿದ್ದ ಬೈಜಯಂತ್‌ ಅವರನ್ನು ಪಕ್ಷಕ್ಕೆ ಸೆಳೆಯುವ ಮೂಲಕ ಬಿಜೆಪಿ ರಾಜ್ಯದಲ್ಲಿ ಮೇಲುಗೈ ಸಾಧಿಸಲು ಭಾರೀ ರಣತಂತ್ರಗಳನ್ನು ಹಣೆದಿದೆ. 

ಮಾರ್ಚ್‌ 4 ರಂದು ಬೈಜಯಂತ್‌ ಅವರು ಬಿಜು ಜನತಾ ದಳವನ್ನು ತೊರೆದು ಬಿಜೆಪಿಗೆ ಸೇರ್ಪಡೆಯಾಗಿದ್ದರು. ಪ್ರಬಲ ವಾಗ್ಮಿಯಾಗಿರುವ ಅವರು ಕೇಂದ್ರಪಾರಾದಿಂದಲೇ ಈ ಬಾರಿ ಕಣಕ್ಕಿಳಿಯುವ ಸಾಧ್ಯತೆಗಳಿವೆ. 

2014 ರಲ್ಲಿ 21 ಲೋಕಸಭಾ ಸ್ಥಾನಗಳಲ್ಲಿ ಬಿಜೆಡಿ 20 ಸ್ಥಾನಗಳನ್ನು ಗೆದ್ದುಕೊಂಡಿತ್ತು. 1 ಸ್ಥಾನ ಗೆದ್ದಿದ್ದ ಬಿಜೆಪಿ ಈ ಬಾರಿ ಹಲವು ಸ್ಥಾನಗಳ ಮೇಲೆ ಗುರಿಯಿಟ್ಟು ಭಾರೀ ರಣತಂತ್ರ ಹಣೆದಿದೆ.