Delhi Assembly Elections: ಮತದಾರ ಪಟ್ಟಿಗೆ ಬಿಜೆಪಿ-ಆಪ್‌ ಕದನ

Team Udayavani, Dec 30, 2024, 7:10 AM IST

ಹೊಸದಿಲ್ಲಿ: ಧೈರ್ಯವಾಗಿ ಚುನಾವಣೆ ಎದುರಿಸಲು ಸಾಧ್ಯವಾಗದೇ ಬಿಜೆಪಿ ದಿಲ್ಲಿ­ಯಲ್ಲಿ “ಆಪರೇಷನ್‌ ಕಮಲ’ ಆರಂಭಿಸಿದೆ.

ತಮ್ಮ ಪರವಿರದ ಸಾವಿರಾರು ಮತದಾರರ ಹೆಸರನ್ನು ಮತಪಟ್ಟಿಯಿಂದ ತೆಗೆಸಿಹಾಕಲು ಮುಂದಾಗಿದೆ ಎಂದು ಆಪ್‌ ಮುಖ್ಯಸ್ಥ ಅರವಿಂದ್‌ ಕೇಜ್ರಿವಾಲ್‌ ಆರೋಪಿಸಿದ್ದಾರೆ. ಇದಕ್ಕೆ ಬಿಜೆಪಿ ತಿರುಗೇಟು ನೀಡಿದ್ದು, ನೇರ­ವಾಗಿ ಹೋರಾಡಿ ಚುನಾವಣೆ ಗೆಲ್ಲುವ ಬದಲು ಆಪ್‌ ಸತ್ತವರ ಹೆಸರನ್ನು ಪಟ್ಟಿಗೆ ಸೇರಿಸುತ್ತಿದೆ ಎಂದು ಚಾಟಿ ಬೀಸಿದೆ.

ರವಿವಾರ ಮಾಧ್ಯಮಗಳ ಮುಂದೆ ಬಿಜೆಪಿಯನ್ನು ತರಾಟೆಗೆ ತೆಗೆದುಕೊಂಡ ಕೇಜ್ರಿವಾಲ್‌ “ಬಿಜೆಪಿಯಲ್ಲಿ ಪ್ರಬಲ ಅಭ್ಯ­ರ್ಥಿಗಳೂ ಇಲ್ಲ, ಸಿಎಂ ಅಭ್ಯರ್ಥಿ ಅಂತೂ ಇಲ್ಲವೇ ಇಲ್ಲ. ಒಂದೇ ಕ್ಷೇತ್ರದಲ್ಲಿ 11,000 ಮತದಾರರ ಹೆಸರು ತೆಗೆಸಲು ಬಿಜೆಪಿ ಅರ್ಜಿ ಸಲ್ಲಿಸಿದ್ದು, ಆಯೋಗ ಈ ಕುತಂತ್ರಕ್ಕೆ ತಡೆ ಒಡ್ಡಿದೆ’ ಎಂದಿದ್ದಾರೆ.

ಇದಕ್ಕೆ ಬಿಜೆಪಿ ರಾಜ್ಯಾಧ್ಯಕ್ಷ ವೀರೇಂದ್ರ ಸಚ್‌ದೇವ್‌ ತಿರುಗೇಟು ನೀಡಿದ್ದು, 2014ರಿಂದ ಮತದಾರರ ಸಂಖ್ಯೆ ತೀವ್ರ ಹೆಚ್ಚಳವಾಗಿದೆ. ಈ ಹೊಸ ಮತದಾರರು ಎಲ್ಲಿಂದ ಬಂದರು? ಹೊಸ ಮತದಾ­ರರು 66 ದಾಟಿ­ದವರು. ಆಪ್‌ ನಕಲಿ ದಾಖಲೆ ಮೂಲಕ ಬೇರೆ ಊರಿನವರು, ಸತ್ತವರು ಎಲ್ಲರನ್ನೂ ಮತದಾರರ ಪಟ್ಟಿಗೆ ಸೇರಿಸುತ್ತಿದೆ ಎಂದಿದ್ದಾರೆ.