ಪ್ರತಿಕೂಲ ಹವಾಮಾನ : ಮನೋಜ್‌ ತಿವಾರಿ ಹೆಲಿಕಾಪ್ಟರ್‌ ಎಮರ್ಜೆನ್ಸಿ ಲ್ಯಾಂಡಿಂಗ್‌

Team Udayavani, Apr 8, 2019, 5:39 PM IST

ಹೊಸದಿಲ್ಲಿ : ಪ್ರತಿಕೂಲ ಹವಾಮಾನದ ಕಾರಣದಿಂದಾಗಿ ಬಿಜೆಪಿ ನಾಯಕ ಮನೋಜ್‌ ತಿವಾರಿ ಅವರ ಹೆಲಿಕಾಪ್ಟರ್‌ ಇಂದು ಸೋಮವಾರ ಉತ್ತರಾಖಂಡದ ಉದ್ಧಾಮ್‌ಸಿಂಗ್‌ ನಗರ ಜಿಲ್ಲೆಯ ಕಿಚ್ಚಾ ಎಂಬಲ್ಲಿ ಎಮರ್ಜೆನ್ಸಿ ಲ್ಯಾಂಡಿಂಗ್‌ ಮಾಡಿದ ಘಟನೆ ವರದಿಯಾಗಿದೆ.

ದಿಲ್ಲಿ ಬಿಜೆಪಿ ನಾಯಕ ತಿವಾರಿ ಅವರು ಖಾತಿಮಾ ದಿಂದ ಡೆಹರಾಡೂನ್‌ ತಲುಪುವವರಿದ್ದರು. ಆದರೆ ತಿವಾರಿ ಪ್ರಯಾಣಿಸುತ್ತಿದ್ದ ಹೆಲಿಕಾಪ್ಟರ್‌ಗೆ ವೇಗವಾಗಿ ಮತ್ತು ಬಲವಾಗಿ ಬೀಸುತ್ತಿದ್ದ ಗಾಳಿಯಿಂದ ತೀವ್ರ ಅಡಚಣೆ ಉಂಟಾಯಿತು.

ಈ ಸನ್ನಿವೇಶದಲ್ಲಿ ಹೆಲಿಕಾಪ್ಟರ್‌ ಹಾರಾಟ ಕೈಗೊಳ್ಳುವುದು ಪ್ರಯಾಣಿಕರ ಜೀವಕ್ಕೇ ಅಪಾಯಕಾರಿ ಎಂಬುದನ್ನು ಕಂಡುಕೊಳ್ಳಲಾಯಿತು. ಅಂತೆಯೇ ತುರ್ತು ಲ್ಯಾಂಡಿಂಗ್‌ ಕೈಗೊಳ್ಳಲಾಯಿತು ಎಂದು ಮೂಲಗಳು ತಿಳಿಸಿವೆ.