ನಂ.1 ಆಸ್ತಿವಂತ ಪಕ್ಷ ಬಿಜೆಪಿ! ಇತರೆ ಎಲ್ಲ ಪಕ್ಷಗಳ ಒಟ್ಟು ಆಸ್ತಿಗಿಂತಲೂ ಹೆಚ್ಚು

Team Udayavani, Jan 29, 2022, 6:50 AM IST

ನವದೆಹಲಿ: ದೇಶದಲ್ಲಿರುವ ಎಲ್ಲ ರಾಜಕೀಯ ಪಕ್ಷಗಳ ಒಟ್ಟಾರೆ ಆಸ್ತಿ ಮೌಲ್ಯದ ಶೇ.69.37ರಷ್ಟು ಆಸ್ತಿಯನ್ನು ಬಿಜೆಪಿಯೊಂದೇ ಹೊಂದಿದೆ!

2019-20ರ ಹಣಕಾಸು ವರ್ಷದಲ್ಲಿ ಬಿಜೆಪಿಯ ಆಸ್ತಿ ಮೌಲ್ಯ 4,847.78 ಕೋಟಿ ರೂ.ಗಳು ಎಂದು ಚುನಾವಣಾ ಸುಧಾರಣಾ ಸಂಸ್ಥೆ ಎಡಿಆರ್‌(ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಾಟಿಕ್‌ ರಿಫಾರ್ಮ್) ವರದಿ ಹೇಳಿದೆ. ಅಂದರೆ, ಎಲ್ಲ ಪಕ್ಷಗಳ ಒಟ್ಟಾರೆ ಆಸ್ತಿಯನ್ನು ಲೆಕ್ಕ ಹಾಕಿದರೂ, ಅದು ಬಿಜೆಪಿಯ ಆಸ್ತಿಗೆ ಸರಿಸಮಾನವಾಗುವುದಿಲ್ಲ. ಏಳು ರಾಷ್ಟ್ರೀಯ ಹಾಗೂ 44 ಪ್ರಾದೇಶಿಕ ಪಕ್ಷಗಳು ಘೋಷಿಸಿರುವ ಆಸ್ತಿಪಾಸ್ತಿಯ ಮೌಲ್ಯ ಕ್ರಮವಾಗಿ 6,988.57 ಕೋಟಿ ರೂ. ಮತ್ತು 2,129.38 ಕೋಟಿ ರೂ.ಗಳು ಎಂದು ಎಡಿಆರ್‌ ನಡೆಸಿದ ವಿಶ್ಲೇಷಣೆಯಿಂದ ತಿಳಿದುಬಂದಿದೆ.

ಇದನ್ನೂ ಓದಿ:ಬಿಜೆಪಿ ಸಂಚು;ಹೆಲಿಕಾಪ್ಟರ್ ನಲ್ಲಿ ಮುಜಾಫರ್ ನಗರಕ್ಕೆ ತೆರಳಲು ಅವಕಾಶ ನೀಡುತ್ತಿಲ್ಲ; ಅಖಿಲೇಶ್

7 ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿಯ ಪೈಕಿ ಶೇ.69.37ರಷ್ಟು ಬಿಜೆಪಿಯದ್ದಾಗಿದ್ದರೆ, ಶೇ.9.99ರಷ್ಟು ಪಾಲು ಬಿಎಸ್‌ಪಿಯದ್ದಾಗಿದೆ. ಅಂದರೆ, 698.33 ಕೋಟಿ ರೂ. ಆಸ್ತಿ ಹೊಂದುವ ಮೂಲಕ ಬಿಎಸ್‌ಪಿ 2ನೇ ಸ್ಥಾನದಲ್ಲಿದೆ. 3ನೇ ಸ್ಥಾನದಲ್ಲಿರುವ ಕಾಂಗ್ರೆಸ್‌ನ ಒಟ್ಟಾರೆ ಆಸ್ತಿ 588.16 ಕೋಟಿ ರೂ.(ಶೇ.8.42) ಎಂದಿದೆ ವರದಿ.

ಯಾವ ಪಕ್ಷದ ಆಸ್ತಿ ಎಷ್ಟೆಷ್ಟು?

ಬಿಜೆಪಿ – 4,847 ಕೋಟಿ ರೂ.
ಬಿಎಸ್‌ಪಿ – 698.33 ಕೋಟಿ ರೂ.
ಕಾಂಗ್ರೆಸ್‌- 588.16 ಕೋಟಿ ರೂ.
ಸಮಾಜವಾದಿ ಪಕ್ಷ – 563.47 ಕೋಟಿ ರೂ.
ಟಿಆರ್‌ಎಸ್‌ – 301.47 ಕೋಟಿ ರೂ.
ಎಐಎಡಿಎಂಕೆ – 267.61 ಕೋಟಿ ರೂ.

7 ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿ ಮೌಲ್ಯ – 6,988.57 ಕೋಟಿ ರೂ.

44 ಪ್ರಾದೇಶಿಕ ಪಕ್ಷಗಳ ಒಟ್ಟು ಆಸ್ತಿ ಮೌಲ್ಯ – 2,129.38 ಕೋಟಿ ರೂ.