ಉತ್ತರ ಪ್ರದೇಶದಲ್ಲಿ ಬಿಜೆಪಿ ಕಿಂಗ್‌? ಟೈಮ್ಸ್‌ ನೌ ಸಮೀಕ್ಷೆ

Team Udayavani, Jan 31, 2017, 3:45 AM IST

ನವದೆಹಲಿ: ಉತ್ತರ ಪ್ರದೇಶ ವಿಧಾನಸಭೆ ಚುನಾವಣೆಯಲ್ಲಿ ಮೋದಿ ಮ್ಯಾಜಿಕ್‌ ನಡೆಯಲಿದ್ದು, ಬಿಜೆಪಿ ಬೃಹತ್‌ ಪಕ್ಷವಾಗಿ ಹೊರಹೊಮ್ಮಲಿದೆ. ಎಸ್ಪಿ- ಕಾಂಗ್ರೆಸ್‌ ಮಹಾಮೈತ್ರಿಗೆ ತೀವ್ರ ಮುಖಭಂಗ ಆಗಲಿದೆ.

ಟೈಮ್ಸ್‌ ನೌ ಸುದ್ದಿವಾಹಿನಿ ನಡೆಸಿದ ಸಮೀಕ್ಷೆಯಲ್ಲಿ ಈ ಫ‌ಲಿತಾಂಶ ಬಂದಿದೆ. ಕಳೆದ ಬಾರಿಯ ಚುನಾವಣೆಯಲ್ಲಿ 47 ಸ್ಥಾನಗಳನ್ನು ಪಡೆದಿದ್ದ ಬಿಜೆಪಿ, 2017ರ ಚುನಾವಣೆಯಲ್ಲಿ 202 ಸೀಟುಗಳನ್ನು ಗೆಲ್ಲಲಿದೆ ಎಂದು ಸಮೀಕ್ಷೆ ಹೇಳಿದೆ. ಪಕ್ಷದ ಜನಪ್ರಿಯತೆ + 155 ಹೆಚ್ಚಿದ್ದು, ಆಡಳಿತರೂಢ ಎಸ್ಪಿ ತೀವ್ರ ಕುಸಿತ ಕಂಡಿದೆ. ಎಸ್ಪಿ- ಕಾಂಗ್ರೆಸ್‌ ಈಗ 252 ಸ್ಥಾನಗಳನ್ನು ಹೊಂದಿದ್ದರೂ, ಸರ್ವೆ ಪ್ರಕಾರ ಮಹಾಮೈತ್ರಿಗೆ ಒಲಿಯುವ ಒಟ್ಟು ಸ್ಥಾನಗಳು 147! ಮೈತ್ರಿಯ ಜನಪ್ರಿಯತೆ -105ಕ್ಕೆ ಕುಸಿದಿದ್ದು, ಬಿಎಸ್ಪಿಯ ಜನಪ್ರಿಯತೆಯೂ -33 ಇಳಿಕೆ ಕಂಡಿದೆ. ಮೈತ್ರಿಯಿಂದಲೇ ಎಸ್ಪಿಗೆ ಹಿನ್ನೆಡೆ ಆಗಲಿದೆ ಎಂಬ ಜನಾಭಿಪ್ರಾಯ ಮೂಡಿದೆ.

ಆದರೆ, ಕಳೆದ ಲೋಕಸಭೆ ಚುನಾವಣೆಗೆ ಹೋಲಿಸಿದರೆ ಬಿಜೆಪಿಯ ಜನಪ್ರಿಯತೆ ಉ.ಪ್ರ.ದಲ್ಲಿ ಕುಗ್ಗಿದ್ದು, -124ಕ್ಕೆ ಇಳಿದಿದೆ. ಎಸ್ಪಿ- ಕಾಂಗ್ರೆಸ್‌ ಮೈತ್ರಿಗೆ +90 ಜನಮನ್ನಣೆ ಸಿಗಲಿದೆ. ಮೊದಲ ಮತ ಚಲಾಯಿಸುತ್ತಿರುವ 18 ವರ್ಷದ ಯುವಸಮೂಹಕ್ಕೆ ನರೇಂದ್ರ ಮೋದಿ ಅವರ ಮೇಲೆ ಒಲವು ಹೆಚ್ಚಿದೆ ಎಂಬುದನ್ನು ಸಮೀಕ್ಷೆ ಬಹಿರಂಗಪಡಿಸಿದೆ.

ಎಬಿಪಿ ಸಮೀಕ್ಷೆಯಲ್ಲಿ ಅತಂತ್ರ ಭವಿಷ್ಯ!
ಎಬಿಪಿ ಸುದ್ದಿವಾಹಿನಿಯೂ ಉತ್ತರ ಪ್ರದೇಶದಲ್ಲಿ ಸಮೀಕ್ಷೆ ನಡೆಸಿದ್ದು, ಅತಂತ್ರ ಫ‌ಲಿತಾಂಶದ ಭವಿಷ್ಯ ಹೊರಹಾಕಿದೆ. ಬಿಜೆಪಿ ಇಲ್ಲಿ ಹಿನ್ನಡೆ ಅನುಭವಿಸಿದ್ದು, 118- 128 ಸ್ಥಾನಗಳಷ್ಟೇ ಪಡೆಯಲಿದೆ ಎಂದು ಹೇಳಿದೆ. ಕಾಂಗ್ರೆಸ್‌- ಎಸ್ಪಿ ಮೈತ್ರಿಗೆ ಮತದಾರ ಜೈ ಎಂದಿದ್ದು 187- 197 ಸ್ಥಾನಗಳನ್ನು ಪಡೆಯಬಹುದು. ಬಿಎಸ್ಪಿ- 76- 86 ಸೀಟುಗಳಿಗೆ ತೃಪ್ತಿ ಪಡೆಯಲಿದೆ ಎಂದು ಸಮೀಕ್ಷೆ ಅಂದಾಜಿಸಿದೆ.

ಶೇ.35 ಮತಗಳು ಮೈತ್ರಿಗೆ ಬೀಳಲಿದ್ದು, ಬಿಜೆಪಿ ಪಾಲು ಕೇವಲ ಶೇ.28! ಇಲ್ಲೂ ಸಿಎಂ ಸ್ಥಾನದಲ್ಲಿ ಅಖೀಲೇಶ್‌ ಯಾದವ್‌ ಮುಂದಿದ್ದು, ಶೇ.26 ಜನಪ್ರಿಯತೆ ಪಡೆದಿದ್ದಾರೆ. ಮಾಯಾವತಿ ಶೇ.21, ನರೇಂದ್ರ ಮೋದಿ ಶೇ.9, ಮುಲಾಯಂ ಸಿಂಗ್‌ ಯಾದವ್‌ ಅವರ ಮೇಲೆ ಮತದಾರನಿಗೆ ಶೇ.5ರಷ್ಟು ಒಲವು ಇದೆ ಎಂದು ಸಮೀಕ್ಷೆ ಹೇಳಿದೆ. ಎನ್‌ಡಿಎ ಸರ್ಕಾರದ ಅಪನಗದೀಕರಣ ಯೋಜನೆಗೆ ಶೇ.41 ಮಂದಿ ಧನಾತ್ಮಕವಾಗಿ ಪ್ರತಿಕ್ರಿಯಿಸಿದ್ದಾರೆ.

ಫೆ.4ರಿಂದ ಮಾ.8ರ ವರೆಗೆ ಸಮೀಕ್ಷೆ ಇಲ್ಲ
ಫೆಬ್ರವರಿ 4ರಿಂದ ಮಾರ್ಚ್‌ 8ರ ವರೆಗೆ ಚುನಾವಣಾ ಸಮೀಕ್ಷೆ ನಡೆಸದಂತೆ ಮಾಧ್ಯಮಗಳಿಗೆ ಕೇಂದ್ರ ಚುನಾವಣಾ ಆಯೋಗ ಸೂಚಿಸಿದೆ. 126 ಎ ಕಲಂ ಅಡಿಯಲ್ಲಿ ಯಾವುದೇ ಮಾಧ್ಯಮ ಈ ಅವಧಿಯಲ್ಲಿ ಚುನಾವಣಾ ಸಮೀಕ್ಷೆ ನಡೆಸಬಾರದು. ಚುನಾವಣಾ ಪ್ರದೇಶ ಸೇರಿದಂತೆ ದೇಶದ ಯಾವುದೇ ಭಾಗದಿಂದಲೂ ಮಾಧ್ಯಮಗಳು ಸರ್ವೆಗೆ ಮುಂದಾಗಬಾರದು ಎಂದು ಆದೇಶ ಹೊರಡಿಸಿದೆ.

ಸರ್ವೆ  ಸಾರಾಂಶ
1. ಯಾರಿಗೆ ಎಷ್ಟು?
ಬಿಜೆಪಿ-    202
ಎಸ್ಪಿ- ಕಾಂಗ್ರೆಸ್‌  147
ಬಿಎಸ್ಪಿ-   47
ಇತರೆ- 7
ಒಟ್ಟು – 403

2. ಮತಗಳ ಹಂಚಿಕೆ
ಬಿಜೆಪಿ- ಶೇ.34
ಎಸ್ಪಿ- ಕೈ ಮೈತ್ರಿ- ಶೇ. 31
ಬಿಎಸ್ಪಿ- ಶೇ.24

3. ಸಿಎಂ ಯಾರಾಗ್ಬೇಕು?
ಅಖೀಲೇಶ್‌ ಯಾದವ್‌- ಶೇ.39
ಮಾಯಾವತಿ- ಶೇ.23
ಯೋಗಿ ಆದಿತ್ಯನಾಥ್‌- ಶೇ.19
ಮುಲಾಯಂ ಸಿಂಗ್‌ ಯಾದವ್‌- ಶೇ.1
ಶೀಲಾ ದೀಕ್ಷಿತ್‌- ಶೇ.2

4. ಅಪನಗದೀಕರಣದಿಂದ ದೇಶಕ್ಕೆ ಒಳಿತಾಗಿದೆಯೇ?
ಹೌದು- 63.4
ಇಲ್ಲ- 31.9
ಗೊತ್ತಿಲ್ಲ- 4.7