ರಸ್ತೆ ಬದಿ ಗುಂಡಿಯಲ್ಲಿ ಬಿಹಾರ ಪೊಲೀಸ್‌ ಜವಾನರಿಬ್ಬರ ಶವ ಪತ್ತೆ

Team Udayavani, Jan 4, 2018, 3:33 PM IST

ಮುಂಗೇರ್‌ : ಬಿಹಾರ ಪೊಲೀಸ್‌ ಜವಾನರಿಬ್ಬರ ಶವ ಇಂದು ನಸುಕಿನ ವೇಳೆ ಇಲ್ಲಿನ ರಸ್ತೆಬದಿಯ ಗುಂಡಿಯೊಂದರಲ್ಲಿ ಪತ್ತೆಯಾಗಿದ್ದು ಇದು ರಸ್ತೆ ಅಪಘಾತದಲ್ಲಿ ಸಂಭವಿಸಿರಬಹುದಾದ ಸಾವೆಂದು ಪೊಲೀಸರು ಶಂಕಿಸಿದ್ದಾರೆ. 

ಮೃತ ಜವಾನರನ್ನು ಧನಂಜಯ್‌ ಮತ್ತು ಪಂಕಜ್‌ ಎಂದು ಗುರುತಿಸಲಾಗಿದೆ. ಇವರು ಈ ಜಿಲ್ಲೆಯಲ್ಲಿ ನಿಯೋಜಿಸಲ್ಪಟ್ಟಿದ್ದ ವಿಶೇಷ ಕಾರ್ಯಪಡೆಗೆ ಸೇರಿದವರಾಗಿದ್ದಾರೆ. ಇವರ ಶವ ಶ್ಯಾಮಪುರ ಹೊರಠಾಣೆ ಸಮೀಪ ರಸ್ತೆ ಬದಿಯ ಗುಂಡಿಯಲ್ಲಿ ಪತ್ತೆಯಾಯಿತು ಎಂದು ಮುಂಗೇರ್‌ ಪೊಲೀಸ್‌ ಸುಪರಿಂಟೆಂಡೆಂಟ್‌ ಆಶಿಶ್‌ ಭಾರತಿ ತಿಳಿಸಿದ್ದಾರೆ. 

ಈ ಜವಾನರಿಬ್ಬರು ಸವಾರರಾಗಿದ್ದ ಅವರ ಮೋಟಾರ್‌ ಬೈಕ್‌ ತೀವ್ರವಾಗಿ ಹಾನಿಗೊಂಡ ರೀತಿಯಲ್ಲಿ ಪಕ್ಕದಲ್ಲೇ ಬಿದ್ದುಕೊಂಡಿರುವುದು ಕೂಡ ಪತ್ತೆಯಾಗಿದ್ದು ನಸುಕಿನ ವೇಳೆ ಯಾವುದೋ ಅಪರಿಚಿತ ವಾಹನ ಇವರ ಬೈಕಿಗೆ ಢಿಕ್ಕಿ ಹೊಡೆದಿರಬಹುದೆಂದು ಶಂಕಿಸಲಾಗಿದೆ. 

ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.