ಕೋವಿಡ್‍ನಿಂದ ಸಾವನ್ನಪ್ಪಿದವರ ಕುಟುಂಬಕ್ಕೆ 2 ವರ್ಷದ ಸಂಬಳ : ಖಾಸಗಿ ಕಂಪನಿ ಅಭಯ ಹಸ್ತ

Team Udayavani, May 1, 2021, 8:45 PM IST

ನವದೆಹಲಿ:  ಕೋವಿಡ್ ಸಮಯದಲ್ಲಿ ತಮ್ಮ ಪ್ರಾಣದ ಬಗ್ಗೆ ಆತಂಕ ಪಡುತ್ತಿರುವ ಉದ್ಯೋಗಿಗಳಿಗೆ ಖಾಸಗಿ ಕಂಪನಿ ಬೊರೊಸಿಲ್ ಲಿಮಿಟೆಡ್ ಅಭಯ ಹಸ್ತ ನೀಡಿದೆ.

ನಮ್ಮ ಕಂಪನಿಯ ಉದ್ಯೋಗಿ ಒಂದು ವೇಳೆ ಕೋವಿಡ್‍ ತುತ್ತಾಗಿ ಸಾವನ್ನಪ್ಪಿದರೆ, ಅವರ ಕುಟುಂಬದವರಿಗೆ ಮುಂದಿನ 2 ವರ್ಷಗಳ ಕಾಲ ಆ ಉದ್ಯೋಗಿಯ ಸಂಬಳ ಸಿಗಲಿದೆ ಎಂದು ಭರವಸೆ ನೀಡಿದೆ.

ಈ ಬಗ್ಗೆ ಮಾತಾಡಿರುವ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಶ್ರೀವರ್​ ಖೆರುಕ, ನಮ್ಮ ಕಂಪನಿ ಕೋವಿಡ್​ನಿಂದಾಗಿ ಈಗಾಗಲೇ ನಾಲ್ವರು ಉದ್ಯೋಗಿಗಳನ್ನು ಕಳೆದುಕೊಂಡಿದೆ. ಸಂತೋಷ್​ ಚಳ್ಕೆ, ವಿಜಯ್ ಶಿರ್ಸತ್​, ತುಷಾರ್ ಪಾಂಚಾಲ್ ಹಾಗೂ ಶಿವಶಂಕರ್ ಬಿಷ್ತ್ ಎಂಬವರು ಕರೊನಾದಿಂದಾಗಿ ಮೃತಪಟ್ಟಿದ್ದು, ಅವರ ಅಗಲಿಕೆಯಿಂದಾಗಿರುವ ನಷ್ಟವನ್ನು ವಿವರಿಸಿ ಹೇಳಲಾಗದು. ಹೀಗೆ ನಾಲ್ವರು ಕರೊನಾಗೆ ಬಲಿಯಾಗಿರುವುದರಿಂದ ನಮ್ಮ ಉಳಿದ ಎಲ್ಲ ಉದ್ಯೋಗಿಗಳಿಗೆ ಈ ಭರವಸೆ ನೀಡಲಾಗುತ್ತಿದೆ ಎಂದು ಅವರು ಹೇಳಿಕೊಂಡಿದ್ದಾರೆ.

ಬೋರೋಸಿಲ್ ಲಿಮಿಟೆಡ್ ಅಥವಾ ಬೊರೊಸಿಲ್ ರಿನ್ಯುವೇಬಲ್ ಲಿಮಿಟೆಡ್​ನ ಯಾವುದೇ ಉದ್ಯೋಗಿ ಕರೊನಾದಿಂದಾಗಿ ಮೃತಪಟ್ಟರೆ ಅವರ ಕುಟುಂಬಕ್ಕೆ ಮುಂದಿನ 2 ವರ್ಷ ಕಾಲ ಸಂಬಳ ಮುಂದುವರಿಯಲಿದೆ. ಮಾತ್ರವಲ್ಲ ಅವರ ಮಕ್ಕಳು ಭಾರತದಲ್ಲಿ ಪದವಿ ಪಡೆಯುವವರೆಗಿನ ವಿದ್ಯಾಭ್ಯಾಸದ ಖರ್ಚನ್ನೂ ಭರಿಸಲಾಗುವುದು ಎಂದು ಹೇಳಿದ್ದಾರೆ.