ನಾಶಿಕ್‌ : ಬಾಲಕ ಚಿರತೆಗೆ ಆಹಾರವಾಗುವುದನ್ನು ತಪ್ಪಿಸಿದ ತಾಯಿ, ಅಜ್ಜಿ

Team Udayavani, Aug 3, 2018, 4:48 PM IST

ನಾಶಿಕ್‌ : ಹೊಲದಲ್ಲಿ ಆಟವಾಡಿಕೊಂಡಿದ್ದ ಮೂರು ವರ್ಷ ಪ್ರಾಯದ ಬಾಲಕನು ಚಿರತೆಗೆ ಆಹಾರವಾಗುವುದನ್ನು ಆತನ ತಾಯಿ ಮತ್ತು ಅಜ್ಜಿ ಎಂಟೆದೆಯಿಂದ ಹೋರಾಡಿ ಪಾರುಗೊಳಿಸಿದ ಘಟನೆ ನಾಶಿಕ್‌ ಜಿಲ್ಲೆಯ ದಿಂಡೋರಿ ತಾಲೂಕಿನ ಕೇತಕಿ ಗ್ರಾಮದಲ್ಲಿ ನಡೆದಿದೆ. 

ಬಾಲಕನು ಹೊಲದಲ್ಲಿ ಆಟವಾಡಿಕೊಂಡಿದ್ದಾಗ ಅದೆಲ್ಲಿಂದಲೋ ಛಂಗನೆ ಹಾರಿ ಬಂದ ಹೆಣ್ಣು ಚಿರತೆಯೊಂದು ಬಾಲಕನನ್ನು ಕಚ್ಚಿ ತನ್ನ ಬಾಯಲ್ಲಿ  ಹಿಡಿದುಕೊಂಡಿತು. ಆಗ ಆತನ ಆಕ್ರಂದನ ಕೇಳಿಸಿಕೊಂಡ ಆತನ ತಾಯಿ ಮತ್ತು ಅಜ್ಜಿ  ಧಾವಿಸಿ ಬಂದು ಚಿರತೆ ವಿರುದ್ಧ ಹೋರಾಡಿ ಬಾಲಕನನ್ನು ರಕ್ಷಿಸಿದರು. ಇವರ ಬೊಬ್ಬೆ ಕೇಳಿ ಆಸುಪಾಸಿನ ಜನರೂ ಧಾವಿಸಿ ಬಂದು ನೆರವಾದರು. 

ಚಿರತೆ ಬಾಲಕನನ್ನು ಬಿಟ್ಟು ಅರಣ್ಯದೊಳಗೆ ಓಡಿ ಹೋಯಿತು ಎಂದು ಪೊಲೀಸ್‌ ಅಧಿಕಾರಿ ಹೇಳಿದರು. ಬಾಲಕನನ್ನು ಆಸ್ಪತ್ರೆಗೆ ಸೇರಿಸಲಾಗಿದ್ದು ಆತ ಪ್ರಾಣಾಪಾಯದಿಂದ ಪಾರಾಗಿರುವುದಾಗಿ ಅವರು ತಿಳಿಸಿದರು.