ಉ.ಪ್ರ.ದಲ್ಲಿ ಡಂಪರ್‌ಗೆ ವೋಲ್ವೋ ಬಸ್ಸು ಢಿಕ್ಕಿ : ಐವರ ಸಾವು

Team Udayavani, Mar 23, 2018, 3:54 PM IST

ಬಾರಾಬಂಕಿ, ಉತ್ತರ ಪ್ರದೇಶ: ಇಂದು ನಸುಕಿನ ವೇಳೆ ಲಕ್ನೋ – ಫೈಜಾಬಾದ್‌ ಹೆದ್ದಾರಿಯಲ್ಲಿ ಡಂಪರ್‌ಗೆ ವೋಲ್ವೋ ಬಸ್ಸು ಢಿಕ್ಕಿ ಹೊಡೆದು ಸಂಭವಿಸಿದ ಭೀಕರ ಅಪಘಾತದಲ್ಲಿ ಇಬ್ಬರು ಮಕ್ಕಳು ಸೇರಿದಂತೆ ಬಿಹಾರದ ಒಟ್ಟು ಐದು ಮಂದಿ ಅಸುನೀಗಿದರು; ಇತರ 7 ಮಂದಿ ಗಂಭೀರವಾಗಿ ಗಾಯಗೊಂಡರು.

ನತದೃಷ್ಟ ವೋಲ್ವೋ ಬಸ್ಸು ಬಿಹಾರದ ಮುಜಫ‌ರಪುರದಿಂದ ದಿಲ್ಲಿಯ ಆನಂದ ವಿಹಾರ ಅಂತಾರಾಜ್ಯ ಬಸ್‌ ಟರ್ಮಿನಸ್‌ (ಐಎಸ್‌ಬಿಟಿ) ಕಡೆಗೆ ಹೋಗುತ್ತಿತ್ತು. ಲಕ್ನೋದಿಂದ ಸುಮಾರು 25 ಕಿ.ಮೀ.ದೂರದಲ್ಲಿರುವ ಸಫೇದಾಬಾದ್‌ ಪಟ್ಟಣದ ಸಮೀಪ ರಸ್ತೆ ದಾಟುವ ವೇಳೆ ಬಸ್ಸು ಡಂಪರ್‌ಗೆ ಢಿಕ್ಕಿ ಹೊಡೆಯಿತು ಎಂದು ಪೊಲೀಸ್‌ ಸುಪರಿಂಟೆಂಡೆಂಟ್‌ ವಿರೇಂದ್ರ ಶ್ರೀವಾಸ್ತವ ತಿಳಿಸಿದ್ದಾರೆ.

ಮೃತರನ್ನು ಮುಕೇಶ್‌ ಕುಮಾರ್‌ 22, ಅಂಕಿತಾ ಯಾದವ್‌ 18, ಸೂರಜ್‌ ಪಾನಾಪುರ ಸರೋಜ್‌ 15, ಇಶ್ರಾರ್‌ ಅಲಿ (1 ವರ್ಷದ ಮಗು) ಮತ್ತು ಶಗುಪ್‌ತಾ (5) ಎಂದು ಗುರುತಿಸಲಾಗಿದೆ. ಇವರೆಲ್ಲರೂ ಬಿಹಾರಕ್ಕೆ ಸೇರಿದವರಾಗದ್ದಾರೆ.

ಗಾಯಾಳುಗಳನ್ನು ಜಿಲ್ಲಾ ಆಸ್ಪತ್ರೆಗೆ ಸೇರಿಸಲಾಗಿದೆ. ಅತ್ಯಂತ ಗಂಭೀರ ಸ್ಥಿತಿಯಲ್ಲಿರುವ ಇಬ್ಬರನ್ನು ಲಕ್ನೋ ಟ್ರೋಮಾ ಸೆಂಟರ್‌ಗೆ ಸೇರಿಸಲಾಗಿದೆ.