ಉದ್ಘಾಟನೆ ಕಾಣುವ ಮುನ್ನ ಕಾಲುವೆ “ಢಮ್‌’

Team Udayavani, Sep 21, 2017, 9:14 AM IST

ಭಾಗಲ್ಪುರ/ಪಟ್ನಾ: ಇನ್ನೇನು ಕೆಲವೇ ಕ್ಷಣಗಳಲ್ಲಿ ಆ ಕಾಲುವೆ ಉದ್ಘಾಟನೆಯಾಗಿ, ಬಿಹಾರದ ಭಾಗಲ್ಪುರ ಜಿಲ್ಲೆಯ ಹಲವಾರು ಹಳ್ಳಿಗಳಿಗೆ ನೀರುಣಿಸಬೇಕಾಗಿತ್ತು. ಅಷ್ಟೇ… ಬಾಂಬ್‌ ಸ್ಫೋಟಿಸಿದಂತೆ ಸದ್ದು ಕೇಳಿಸಿತು. ಏನಾಯಿತು ಎಂದು ಗೊತ್ತಾಗುತ್ತಿರು ವಂತೆಯೇ ಗಂಗಾ ನದಿಗೆ ಅಡ್ಡಲಾಗಿ ಕಟ್ಟಿದ್ದ ಕಾಲುವೆ ಗೇಟ್‌ ಸ್ಫೋಟಗೊಂಡಿತು. ನಿಂತಿದ್ದ ಜನರತ್ತ ನೀರು ನುಗ್ಗಿ ಬಂದಿತು. ಹೆದರಿದ ಸಾರ್ವಜನಿಕರು ದಿಕ್ಕಾಪಾಲಾಗಿ ಓಡಿ ಹೋದರು. ಒಟ್ಟು 389.31 ಕೋಟಿ ರೂ.ವ್ಯರ್ಥವಾಗಿ ಹರಿದು ಹೋಯಿತು. ಬಿಹಾರ ಮತ್ತು ಜಾರ್ಖಂಡ್‌ನ‌ ಕೆಲ ಜಿಲ್ಲೆಗಳಿಗೆ ಈ ಕಾಲುವೆಯಿಂದ ನೀರು ಹರಿಯಬೇಕಾಗಿತ್ತು.

ಈ ಘಟನೆಯಿಂದಾಗಿ ಮುಖ್ಯಮಂತ್ರಿ ನಿತೀಶ್‌ಕುಮಾರ್‌ ನೇತೃತ್ವದ ಬಿಜೆಪಿ- ಜೆಡಿಯು ಸರಕಾರಕ್ಕೆ ಮುಜುಗರ ಉಂಟಾಗಿದೆ. ಯಾವ ಕಾರಣಕ್ಕಾಗಿ ಹೀಗಾಯಿತು ಎಂದು ಕಂಡುಕೊಳ್ಳಲು ತನಿಖೆಗೆ ಕೂಡ ಆದೇಶಿಸಲಾಗಿದೆ. ಭಾಗಲ್ಪುರ ಜಿಲ್ಲೆಯ ಬತೇ ಶ್ವರ್‌ಸ್ಥಾನದಲ್ಲಿ ಅದನ್ನು ನಿರ್ಮಿಸಿ ಪ್ರಾಯೋ ಗಿಕವಾಗಿ ಪಂಪ್‌ ಅನ್ನು ಆನ್‌ ಮಾಡಲಾಗಿತ್ತು. ಗಂಗಾ ನದಿಯ ನೀರು ಕಹಲ್‌ಗಾಂವ್‌ನಲ್ಲಿ ನಿರ್ಮಿಸವಾಗಿರುವ ಎನ್‌ಟಿಪಿಸಿ ಟೌನ್‌ಶಿಪ್‌ಗ್ೂ ನೀರು ನುಗ್ಗಿ ಅವಾಂತರಕ್ಕೆ ಕಾರಣವಾಗಿದೆ. ಜತೆಗೆ ಸ್ಥಳೀಯ ಕೋರ್ಟ್‌ನ ನ್ಯಾಯಾಧೀಶರ ನಿವಾಸಕ್ಕೂ ನೀರು ನುಗ್ಗಿದೆ. ಸ್ಥಳೀಯ ಮಾಧ್ಯಮಗಳಲ್ಲಿ ಕಾರ್ಯಕ್ರಮದ ಬಗ್ಗೆ ಅದ್ಧೂರಿ ಜಾಹೀರಾತು ಪ್ರಕಟಿಸಲಾಗಿತ್ತು.

ಪ್ರತಿಪಕ್ಷ ಆರ್‌ಜೆಡಿ ಯೋಜನೆಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಆರೋಪಿಸಿ ಭಾಗಲ್ಪುರ ಮತ್ತಿತರ ಸ್ಥಳಗಳಲ್ಲಿ ಪ್ರತಿಭಟನೆ ನಡೆಸಿದ್ದಾರೆ.