ಚುನಾವಣಾ ಪ್ರಚಾರ: ಅಭ್ಯರ್ಥಿಗಳ ಖರ್ಚು ಹೆಚ್ಚಳ?

Team Udayavani, Sep 11, 2020, 12:40 AM IST

ನವದೆಹಲಿ: ಮುಂದಿನ ಚುನಾವಣೆಗಳಲ್ಲಿ ಅಭ್ಯರ್ಥಿಗಳು ತಮ್ಮ ಪ್ರಚಾರಕ್ಕಾಗಿ ಮಾಡುವ ಖರ್ಚಿನ ಮಿತಿಯನ್ನು ಶೇ.10ರಷ್ಟು ಹೆಚ್ಚಿಸಬೇಕೆಂಬ ಪ್ರಸ್ತಾವನೆಯೊಂದನ್ನು ಕೇಂದ್ರ ಕಾನೂನು ಸಚಿವಾಲಯಕ್ಕೆ ಕೇಂದ್ರ ಚುನಾವಣಾ ಆಯೋಗ ಸಲ್ಲಿಸಿದೆ. ಸಚಿವಾಲಯದಿಂದ ಅನುಮತಿ ದೊರೆತರೆ ಸದ್ಯದಲ್ಲೇ ನಡೆಯುವ ಬಿಹಾರ ವಿಧಾನಸಭೆ ಚುನಾವಣೆಯಿಂದಲೇ ಅದು ಅನ್ವಯವಾಗಲಿದೆ.

ಕೊರೊನಾ ನಿರ್ಬಂಧಗಳೇ ಕಾರಣ: ತನ್ನ ಪ್ರಸ್ತಾವನೆಯಲ್ಲಿ ಆಯೋಗ, “ಕೊರೊನಾ ಸಾಂಕ್ರಾಮಿಕದ ಭೀತಿಯಿಂದಾಗಿ ಆಯೋಗದ ವತಿಯಿಂದ ಅಭ್ಯರ್ಥಿಗಳ ನಾಮಪತ್ರ ಸಲ್ಲಿಕೆ, ಮನೆಮನೆ ಪ್ರಚಾರ, ಬಹಿರಂಗ ಪ್ರಚಾರ ಸೇರಿದಂತೆ ಚುನಾವಣೆ ಪ್ರಕ್ರಿಯೆಯ ಎಲ್ಲಾ ಹಂತಗಳಲ್ಲಿ ಕೆಲವಾರು ನಿರ್ಬಂಧಗಳನ್ನು ಹೇರಲಾಗಿದೆ. ಆದುದರಿಂದ ವೆಚ್ಚ ಹೆಚ್ಚಾಗಿದೆ. 1961ರ ಚುನಾವಣಾ ಆಯೋಜನಾ ನಿಯಮಗಳ 90ನೇ ನಿಯಮಕ್ಕೆ ತಿದ್ದುಪಡಿ ತರಬೇಕು’ ಎಂದು ಸಚಿವಾಲಯವನ್ನು ಕೇಳಿಕೊಂಡಿದೆ. ಸಚಿವಾಲಯದಿಂದ ಆಯೋಗದ ಪ್ರಸ್ತಾವನೆಗೆ ಒಪ್ಪಿಗೆ ಸಿಕ್ಕರೆ ಈ ಮಿತಿ 30.8 ಲಕ್ಷ ರೂ.ಗಳಿಗೆ ಏರಲಿದೆ.