ಬಾಂಬ್‌ ಕಟ್ಟಿ ಜಾನುವಾರು ಕಳ್ಳಸಾಗಣೆ

Team Udayavani, Jul 27, 2019, 5:19 AM IST

ಕೋಲ್ಕತಾ: ಪಶ್ಚಿಮ ಬಂಗಾಲ ಬಳಿ ಗಡಿಯಲ್ಲಿ ಬಾಂಗ್ಲಾದೇಶದ ಜಾನುವಾರು ಕಳ್ಳಸಾಗಣೆದಾರರು ತಮ್ಮ ಕುಕೃತ್ಯಕ್ಕೆ ಅತ್ಯಂತ ಹೇಯ ಕ್ರಮ ಅನುಸರಿಸುತ್ತಿರುವುದು ಇತ್ತೀಚೆಗೆ ಬೆಳಕಿಗೆ ಬಂದಿದೆ. ಈ ಭಾಗದಲ್ಲಿ ಜಾನುವಾರು ಕಳ್ಳತನ ಹಿಂದಿನಿಂದಲೂ ನಡೆಯುತ್ತಿದ್ದು, ಮಳೆಗಾಲ ಆರಂಭವಾಗುತ್ತಿದ್ದಂತೆ ಹೆಚ್ಚಳ ಕಂಡಿದೆ. ಇತ್ತೀಚೆಗೆ ಕಳ್ಳಸಾಗಣೆದಾರರು ಜಾನುವಾರುಗಳ ಕತ್ತಿಗೆ ಸ್ಫೋಟಕಗಳನ್ನು ಕಟ್ಟಿ, ನದಿಯಲ್ಲಿ ತೇಲಿಬಿಡುತ್ತಿದ್ದಾರೆ. ಈ ಜಾನುವಾರುಗಳನ್ನು ರಕ್ಷಿಸಲು ಹೋಗುವ ಬಿಎಸ್‌ಎಫ್ ಸಿಬಂದಿ ಸ್ವಲ್ಪ ಎಚ್ಚರ ತಪ್ಪಿದರೂ ಜಾನುವಾರು ಹಾಗೂ ಸಿಬಂದಿಗೆ ಪ್ರಾಣಾಪಾಯ ಖಚಿತ.

ಬಾಳೆ ಗಿಡಗಳಿಗೆ ಉದ್ದನೆಯ ಹಗ್ಗ ಕಟ್ಟಿ ಅದನ್ನು ಜಾನುವಾರುಗಳಿಗೆ ಕಟ್ಟಲಾಗುತ್ತದೆ. ಜೊತೆಗೆ ಜಾನುವಾರುಗಳ ಕತ್ತಿಗೆ ಸುಧಾರಿತ ಸ್ಫೋಟಕವನ್ನು ಕಟ್ಟಿ, ಜಾನುವಾರುಗಳನ್ನು ಸಣ್ಣ ತೊರೆಗಳಲ್ಲಿ ನೂಕಿಬಿಡಲಾಗುತ್ತದೆ. ಬಾಂಗ್ಲಾ ಗಡಿ ದಾಟಿ ಅನಂತರ ಬಾಂಗ್ಲಾದೇಶದ ಭಾಗದಲ್ಲಿ ಜಾನುವಾರುಗಳನ್ನು ಹಿಡಿದು ಕಸಾಯಿಖಾನೆಗೆ ಸಾಗಿಸಲಾಗುತ್ತದೆ. ಪಶ್ಚಿಮ ಬಂಗಾಲದ ಮಾಲ್ಡಾ, ಮುರ್ಶಿದಾಬಾದ್‌, ನಾರ್ತ್‌ 24 ಪರಗಣ ಹಾಗೂ ನಾಡಿಯಾದಲ್ಲಿ ಇಂಥವು ಭಾರೀ ಪ್ರಮಾಣದಲ್ಲಿ ಕಂಡುಬಂದಿವೆ. ಬುಧವಾರದಿಂದ ಈವರೆಗೆ 365 ಜಾನುವಾರುಗಳನ್ನು ಬಿಎಸ್‌ಎಫ್ ಸಿಬಂದಿ ರಕ್ಷಿಸಿದ್ದಾರೆ. ಜಾನುವಾರುಗಳ ರಕ್ಷಣೆಗೆ ಬಿಎಸ್‌ಎಫ್ ಸಿಬಂದಿ ಹೊಸ ತಂತ್ರಗಳನ್ನೂ ಅಳವಡಿಸಿಕೊಂಡಿದೆ. ಬೋಟ್‌ಗಳನ್ನು ಬಳಸಿ ನದಿಯಲ್ಲಿ ಜಾನುವಾರುಗಳ ಬಳಿ ತೆರಳುವ ಸಿಬಂದಿ, ಮೊದಲು ಈ ಕಚ್ಚಾ ಬಾಂಬ್‌ಗಳನ್ನು ತೆಗೆಯಬೇಕಾಗುತ್ತದೆ. ಇದಕ್ಕೆ ಸಿಬಂದಿ ತಮ್ಮ ಪ್ರಾಣವನ್ನೇ ಒತ್ತೆಯಿಡಬೇಕಾಗುತ್ತದೆ.

ಎಚ್ಚರಿಕೆ ವಹಿಸುವಂತೆ ಸೂಚನೆ: ಕಚ್ಚಾ ಬಾಂಬ್‌ ಹಿನ್ನೆಲೆಯಲ್ಲಿ ಯೋಧರಿಗೆ ತೀವ್ರ ಎಚ್ಚರಿಕೆ ವಹಿಸುವಂತೆ ಸೂಚಿಸಲಾಗಿದೆ. ಗುಂಪು ಗುಂಪಾಗಿ ಜಾನುವಾರುಗಳನ್ನು ತೇಲಿಬಿಡ ಲಾಗುತ್ತದೆ. ಕೆಲವು ಜಾನುವಾರುಗಳಿಗಷ್ಟೇ ಬಾಂಬ್‌ ಕಟ್ಟಲಾಗಿರುತ್ತದೆ. ಬಾಂಬ್‌ ಇಲ್ಲ ಎಂಬ ಕಾರಣಕ್ಕೆ ಜಾನುವಾರುಗಳ ರಕ್ಷಣೆಯಲ್ಲಿ ಎಚ್ಚರ ತಪ್ಪಿದರೆ ಪ್ರಾಣಕ್ಕೇ ಅಪಾಯ. ಬಿಎಸ್‌ಎಫ್ ಈ ಭಾಗದಲ್ಲಿ ಹೆಚ್ಚಿನ ಸಿಬಂದಿಯನ್ನೂ ನಿಯೋಜಿಸಿದೆ. ಮೋಟಾರ್‌ಬೋಟ್‌, ಸರ್ವೇಕ್ಷಣೆ ತಂತ್ರಜ್ಞಾನವನ್ನು ಅಳವಡಿಸಿ ಕೊಳ್ಳಲಾಗಿದೆ. ಇಲ್ಲಿರುವ ಶಸ್ತ್ರಸಜ್ಜಿತ ಕಳ್ಳಸಾಗಣೆ ದಾರರು ಯೋಧರ ಮೇಲೆ ದಾಳಿ ನಡೆಸಲು ಸನ್ನದ್ಧರಾಗಿರುತ್ತಾರೆ. ಇತ್ತೀಚೆಗೆ ಕಳ್ಳಸಾಗಣೆ ದಾರರೊಂದಿಗೆ ನಡೆದ ಘರ್ಷಣೆಯಲ್ಲಿ ಓರ್ವ ಬಿಎಸ್‌ಎಫ್ ಯೋಧರ ಕೈ ಕತ್ತರಿಸಿಹೋಗಿದೆ. ಈ ಎಲ್ಲ ಪ್ರಕರಣಗಳ ವಿವರಗಳನ್ನೂ ಬಾಂಗ್ಲಾದೇಶದ ಗಡಿ ಭದ್ರತಾ ಪಡೆಯೊಂದಿಗೆ ಹಂಚಿಕೊಳ್ಳಲಾಗಿದೆ ಎಂದು ಬಿಎಸ್‌ಎಫ್ ಮೂಲಗಳು ತಿಳಿಸಿವೆ.