ಬೇಹುಗಾರಿಕೆ ಆರೋಪ: ಫ್ರೀ ಲಾನ್ಸ್ ಪತ್ರಕರ್ತ, ನೌಕಾಪಡೆ ಮಾಜಿ ಕಮಾಂಡರ್ ಬಂಧನ

Team Udayavani, May 17, 2023, 2:17 PM IST

ಮುಂಬಯಿ: ರಕ್ಷಣಾ ವಿಷಯಗಳಿಗೆ ಸಂಬಂಧಿಸಿದ ಸೂಕ್ಷ್ಮ ಮಾಹಿತಿಯನ್ನು ಅಕ್ರಮವಾಗಿ ಸಂಗ್ರಹಿಸಿ ವಿದೇಶಿ ಗುಪ್ತಚರ ಸಂಸ್ಥೆಗಳಿಗೆ ರವಾನಿಸಿದ ಆರೋಪದ ಮೇಲೆ ಫ್ರೀ ಲಾನ್ಸ್ ಪತ್ರಕರ್ತ ಮತ್ತು ನೌಕಾಪಡೆಯ ಮಾಜಿ ಕಮಾಂಡರ್ ಅನ್ನು ಸಿಬಿಐ ಬಂಧಿಸಿದೆ ಎಂದು ಅಧಿಕಾರಿಗಳು ಬುಧವಾರ ತಿಳಿಸಿದ್ದಾರೆ.

ಫ್ರೀ ಲಾನ್ಸ್ ಪತ್ರಕರ್ತ ವಿವೇಕ್ ರಘುವಂಶಿ ವಿರುದ್ಧದ ಎಫ್‌ಐಆರ್ ನಂತರ, ಸಿಬಿಐ ಮಂಗಳವಾರ ತನ್ನ ವೆಬ್‌ಸೈಟ್‌ನಲ್ಲಿ ರಕ್ಷಣಾ ಮತ್ತು ಕಾರ್ಯತಂತ್ರದ ವ್ಯವಹಾರಗಳ ಕುರಿತು ಯುಎಸ್ ಮೂಲದ ಪೋರ್ಟಲ್‌ನ ಭಾರತ ವರದಿಗಾರ ಎಂದು ಪಟ್ಟಿಮಾಡಲಾದ ವಿವರಗಳಿಗೆ ಸಂಬಂಧಿಸಿ ರಾಷ್ಟ್ರ ರಾಜಧಾನಿ ಪ್ರದೇಶ (NCR) ಮತ್ತು ಜೈಪುರದ 12 ಸ್ಥಳಗಳಲ್ಲಿ ಅವರಿಗೆ ಹತ್ತಿರದ ನಿಕಟವರ್ತಿಗಳ ಶೋಧ ನಡೆಸಿತು.

ರಘುವಂಶಿ ಮತ್ತು ಮಾಜಿ ನೌಕಾಪಡೆಯ ಕಮಾಂಡರ್ ಆಶಿಶ್ ಪಾಠಕ್ ವಿರುದ್ಧ ಅಧಿಕೃತ ರಹಸ್ಯ ಕಾಯಿದೆಯ ಸೆಕ್ಷನ್ 3 (ಗೂಢಚಾರಿಕೆ) ಮತ್ತು ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 120-ಬಿ (ಅಪರಾಧದ ಪಿತೂರಿ) ಅಡಿಯಲ್ಲಿ ಪ್ರಕರಣ ದಾಖಲಿಸಿದೆ.

ಶೋಧದ ಸಮಯದಲ್ಲಿ ಹಲವಾರು ಸೂಕ್ಷ್ಮ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ ಮತ್ತು ಕಾನೂನು ಪರಿಶೀಲನೆಗೆ ಕಳುಹಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.