ಆಧಾರ್‌ ಆಧಾರಿತ  ಡಿಎಲ್‌ಗೆ ಕೇಂದ್ರ ಅಸ್ತು

Team Udayavani, Mar 5, 2021, 7:00 AM IST

ಸಾಂದರ್ಭಿಕ ಚಿತ್ರ

ಹೊಸದಿಲ್ಲಿ: ಆಧಾರ್‌ ದೃಢೀಕೃತ ಚಾಲನಾ ಪರವಾನಿಗೆ  (ಡ್ರೈವಿಂಗ್‌ ಲೈಸನ್ಸ್‌) ಸೌಲಭ್ಯವನ್ನು ಜಾರಿಗೊಳಿಸಲು  ಕೇಂದ್ರ ಸರಕಾರ‌ ಗುರುವಾರ ಒಪ್ಪಿಗೆ ನೀಡಿದೆ. ಈ ಕುರಿತಂತೆ ಕೇಂದ್ರ ಸಾರಿಗೆ ಇಲಾಖೆ ಅಧಿಸೂಚನೆ ಹೊರಡಿಸಿದೆ. ಮೂರು ವಾರಗಳ ಹಿಂದೆ ಪ್ರಾದೇಶಿಕ ಸಾರಿಗೆ ಕಚೇರಿಗೆ ಸಂಬಂ ಧಿಸಿದ ಕೆಲವು ಸೇವೆಗಳನ್ನು ಆಧಾರ್‌ ವ್ಯಾಪ್ತಿಗೆ ತರುವಂತೆ ಕೇಂದ್ರ ಸಾರಿಗೆ ಇಲಾಖೆ, ಕರಡು ಅಧಿಸೂಚನೆಯೊಂದನ್ನು ಬಿಡುಗಡೆ ಮಾಡಿತ್ತು. ಈಗ ಈ ಕುರಿತಂತೆ ಆದೇಶವನ್ನು ಹೊರಡಿಸಿದೆ.

ಸಾರ್ವಜನಿಕರು ಆನ್‌ಲೈನ್‌ ಮೂಲಕವೇ ಆಧಾರ್‌ ದೃಢೀಕರಣ ಮಾಡುವ ಮೂಲಕ ಈ ಸೇವೆಗಳನ್ನು ಪಡೆಯ ಬಹುದಾಗಿದೆ. ಇದರಿಂದ, ಪದೇಪದೆ ಪ್ರಾದೇಶಿಕ ಸಾರಿಗೆ ಕಚೇರಿಗೆ ಹೋಗುವುದನ್ನು ತಪ್ಪಿಸಲಾಗಿದೆ ಎಂದು ಪ್ರಕಟನೆಯಲ್ಲಿ ತಿಳಿಸಲಾಗಿದೆ. ಹೊಸ ಆದೇಶದಂತೆ ವಾಹನಗಳ ನೋಂದಣಿ, ಚಾಲನಾ ಕಲಿಕೆ ಪರವಾನಿಗೆ, ಚಾಲನಾ ಪರವಾನಿಗೆ ನವೀಕರಣ, ಚಾಲನಾ ಪರವಾನಿಗೆಯಲ್ಲಿ ವಿಳಾಸ ಬದಲಾವಣೆ, ಅಂತಾರಾಷ್ಟ್ರೀ ಯ ಚಾಲನಾ ಪರವಾನಿಗೆ, ತಾತ್ಕಾಲಿಕ ನೋಂದಣಿಗೆ ಅರ್ಜಿ ಸಲ್ಲಿಸುವಿಕೆ, ಶಾಶ್ವತ ನೋಂದಣಿಗೆ ಅರ್ಜಿ ಸಲ್ಲಿಸುವಿಕೆ, ಆರ್‌ಸಿ ಪ್ರತಿ ಪಡೆಯುವುದು, ಚಾಲನಾ ಪರವಾನಿಗೆಯನ್ನು ಮರಳಿ ಒಪ್ಪಿಸುವುದು ಸೇರಿದಂತೆ ಸುಮಾರು 18 ಆರ್‌ಟಿಒ ಆಧಾರಿತ ಸೌಲಭ್ಯಗಳನ್ನು ಆಧಾರ್‌ ಮೂಲಕ ದೃಢೀಕರಣಗೊಳಿಸಲು ಅವಕಾಶ ಕಲ್ಪಿಸಲಾಗಿದೆ.