ಇನ್ಫೋಸಿಸ್‌ ಕಂಪನಿಗೆ ಕೇಂದ್ರದಿಂದ ಸಮನ್ಸ್‌

Team Udayavani, Aug 23, 2021, 6:45 AM IST

ಹೊಸದಿಲ್ಲಿ: ಭಾರತದ ತೆರಿಗೆ ಪಾವತಿ ವೆಬ್‌ಸೈಟ್‌ನ ನವೀಕೃತ ರೂಪ ಬಿಡುಗಡೆಯಾಗಿ ಎರಡೂವರೆ ತಿಂಗಳು ಕಳೆದಿದೆ.

ಇನ್ನೂ ಅದರ ಸಮಸ್ಯೆಗಳು ಬಗೆಹರಿದಿಲ್ಲ. ದಿನಕ್ಕೊಂದು ಸಮಸ್ಯೆಗಳನ್ನು ಬಳಕೆದಾರರು ತಿಳಿಸುತ್ತಲೇ ಇದ್ದಾರೆ. ಈ ವೆಬ್‌ಸೈಟ್‌ ಅನ್ನು ಸಿದ್ಧಪಡಿಸಿರುವ ಇನ್ಫೋಸಿಸ್‌ಗೆ ಈಗ ಕೇಂದ್ರ ವಿತ್ತ ಸಚಿವಾಲಯ ಸಮನ್ಸ್‌ ನೀಡಿ, ಯಾಕೆ ಸಮಸ್ಯೆ ಉಂಟಾಗಿದೆ, ಸರಿಪಡಿಸಲು ಯಾಕಾಗುತ್ತಿಲ್ಲ, ಬಂದು ವಿವರಣೆ ನೀಡಿ ಎಂದು ಆದೇಶಿಸಿದೆ.

ಸೋಮವಾರ ಇನ್ಫೋಸಿಸ್‌ ಮುಖ್ಯಸ್ಥ ಸಲೀಲ್‌ ಪಾರೇಖ್‌, ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ರನ್ನು ಭೇಟಿ ಮಾಡಿ ವಿವರಣೆ ನೀಡಲಿದ್ದಾರೆ. ಈಗಾಗಲೇ ಟ್ವೀಟ್‌ ಮಾಡಿರುವ ಇನ್ಫೋಸಿಸ್‌, ವೆಬ್‌ಸೈಟನ್ನು ಇನ್ನೂ ದುರಸ್ತಿಪಡಿಸಲಾಗುತ್ತಿದೆ.

ಸರಿಯಾದ ಕೂಡಲೇ ಮಾಹಿತಿ ನೀಡುತ್ತೇವೆ. ತೊಂದರೆಯಾಗಿರುವುದಕ್ಕೆ ಕ್ಷಮಿಸಿ ಎಂದು ಕೇಳಿಕೊಂಡಿದೆ. 2019ರಿಂದ 2021ರವರೆಗೆ ಈ ವೆಬ್‌ ಅನ್ನು ನವೀಕರಿಸಲು ಕೇಂದ್ರ ಸರಕಾರ ಇನ್ಫೋಸಿಸ್‌ಗೆ 164.5 ಕೋಟಿ ರೂ.ಗಳನ್ನು ನೀಡಿದೆ.