ಪಿಎಫ್ಐ ನಿಷೇಧಿಸಲು ಕೇಂದ್ರ ಇಂಗಿತ

Team Udayavani, Sep 12, 2017, 8:30 AM IST

ಹೊಸದಿಲ್ಲಿ: ಬೆಂಗಳೂರಿನಲ್ಲಿ ಬಿಜೆಪಿ ಕಾರ್ಯಕರ್ತ ರುದ್ರೇಶ್‌ ಹತ್ಯೆ, ಕೇರಳದಲ್ಲಿ ಪ್ರಾಧ್ಯಾಪಕ ಕೆ.ಟಿ.ಜೋಸೆಫ್ ಕೈ ಕಡಿದ ಪ್ರಕರಣದಲ್ಲಿ ಭಾಗಿಯಾಗಿರುವ ಆರೋಪಕ್ಕೆ ಗುರಿಯಾಗಿರುವ ಪಾಪ್ಯುಲರ್‌ ಫ್ರಂಟ್‌ ಆಫ್ ಇಂಡಿಯಾ ಮೇಲೆ ಕೇಂದ್ರ ನಿಷೇಧ ಹೇರುವ ಸಾಧ್ಯತೆ ಇದೆ. ಈ ಬಗ್ಗೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಕೇಂದ್ರ ಗೃಹ ಖಾತೆಗೆ ವರದಿ ಸಲ್ಲಿಸಿದೆ. ಉಗ್ರ ಶಿಬಿರ, ಬಾಂಬ್‌ ತಯಾರಿಕೆ ಮತ್ತಿತರ ನ್ಯಾಯ ಸಮ್ಮತವಲ್ಲದ ಚಟುವಟಿಕೆಗಳಲ್ಲಿ ಸಂಘಟನೆ ತೊಡಗಿಸಿ ಕೊಂಡಿದ್ದರಿಂದ ಇಂಥ ನಿಷೇಧ ಹೇರಬಹುದು ಎಂದು ವರದಿಯಲ್ಲಿ ಅಭಿಪ್ರಾಯಪಡಲಾಗಿದೆ. ಇದರ ಜತೆಗೆ ಇಸ್ಲಾ ಮಿಕ್‌ ಸ್ಟೇಟ್‌ ಅಲ್‌-ಹಿಂದಿ ಎಂಬ ಸಂಘಟನೆ ಜತೆಗೆ ಸೇರಿ ಕೊಂಡು ದಕ್ಷಿಣ ಭಾರತದಲ್ಲಿ ಉಗ್ರ ಕೃತ್ಯ ನಡೆಸಲು ಯೋಜನೆ ರೂಪಿಸಿದ ವಿಚಾರವೂ ಬೆಳಕಿಗೆ ಬಂದಿದೆ.

ಆದರೆ ಕೇಂದ್ರ ತನಿಖಾ ಸಂಸ್ಥೆ ವರದಿಯಲ್ಲಿ ಉಲ್ಲೇಖೀಸಿದಂಥ ಕೃತ್ಯಗಳಲ್ಲಿ ಭಾಗಿಯಾಗಿಲ್ಲವೆಂದು ಸಂಘಟನೆ ಈಗಾಗಲೇ ಹೇಳಿಕೊಂಡಿದೆ. ಈ ಬಗ್ಗೆ ಮಾತನಾಡಿರುವ ಕೇಂದ್ರ ಗೃಹ ಸಚಿವಾಲಯದ ಹಿರಿಯ ಅಧಿಕಾರಿ ಅದಕ್ಕೆಲ್ಲ ಸೂಕ್ತ ದಾಖಲೆಗಳು ಇವೆ ಎಂದು ಹೇಳಿದ್ದಾರೆ.