ಆಫ್ಘನ್‌, ಬಾಂಗ್ಲಾ, ಪಾಕ್‌ನಿಂದ ಬಂದ ಅಲ್ಪಸಂಖ್ಯಾತರಿಗೆ ಪೌರತ್ವ ನೀಡಿ

Team Udayavani, Nov 1, 2022, 7:48 PM IST

ನವದೆಹಲಿ: ಗುಜರಾತ್‌ನ 2 ಜಿಲ್ಲೆಗಳಲ್ಲಿ ನೆಲೆಸಿರುವ ಪಾಕಿಸ್ತಾನ, ಬಾಂಗ್ಲಾದೇಶ, ಅಫ್ಘಾನಿಸ್ತಾನಗಳಿಂದ ವಾಪಸಾದ ಹಿಂದೂಗಳು, ಸಿಖ್‌, ಬೌದ್ಧ, ಜೈನ, ಪಾರ್ಸಿ, ಕ್ರಿಶ್ಚಿಯನ್‌ ಸಮುದಾಯಕ್ಕೆ ದೇಶದ ಪೌರತ್ವ ನೀಡುವ ಬಗ್ಗೆ ಕೇಂದ್ರ ಗೃಹ ಸಚಿವಾಲಯ ನಿರ್ಧರಿಸಿ, ಆದೇಶ ನೀಡಿದೆ.

ಮೆಹಸಾನಾ ಮತ್ತು ಆನಂದ್‌ ಜಿಲ್ಲೆಗಳ ಜಿಲ್ಲಾಡಳಿತಕ್ಕೆ ಈ ಬಗ್ಗೆ ಪತ್ರ ರವಾನೆಯಾಗಿದೆ. ಗಮನಾರ್ಹವೆಂದರೆ, ಕೇಂದ್ರ ಸರ್ಕಾರ 2019ರಲ್ಲಿ ಜಾರಿಗೆ ತಂದಿರುವ ಪೌರತ್ವ ತಿದ್ದುಪಡಿ ಕಾಯ್ದೆಯ ಅನ್ವಯ ಈ ನಿರ್ಧಾರ ಕೈಗೊಳ್ಳಲಾಗಿಲ್ಲ. ಪೌರತ್ವ ಕಾಯ್ದೆ 1955ರ ಅನ್ವಯ ಮತ್ತು 2009ರಲ್ಲಿ ಜಾರಿಯಾಗಿರುವ ಪೌರತ್ವ ನಿಯಮಗಳ ಅನ್ವಯ ಈ ಕ್ರಮ ಕೈಗೊಳ್ಳಲಾಗಿದೆ.

ಆಗಸ್ಟ್‌ನಲ್ಲಿ ಗುಜರಾತ್‌ನ ಗೃಹ ಸಚಿವ ಹರ್ಷ ಸಾಂಘ್ವಿ ಪಾಕಿಸ್ತಾನದಿಂದ ವಾಪಸಾಗಿದ್ದ 40 ಹಿಂದೂಗಳಿಗೆ ದೇಶದ ಪೌರತ್ವ ನೀಡುವ ಪ್ರಮಾಣ ಪತ್ರ ನೀಡಿದ್ದರು. 2017ರ ಬಳಿಕ ಅಹ್ಮದಾಬಾದ್‌ ಜಿಲ್ಲೆಯಲ್ಲಿ 1,032 ಮಂದಿ ಪಾಕಿಸ್ತಾನದಿಂದ ಬಂದವರಿಗೆ ಪೌರತ್ವ ನೀಡಲಾಗಿದೆ.