ಬಿಹಾರ ಮಾಜಿ ಸಿಎಂ ಲಾಲುಗೆ ಝಡ್‌ಪ್ಲಸ್‌ ಭದ್ರತೆಗೆ ಕತ್ತರಿ 

Team Udayavani, Nov 28, 2017, 3:45 AM IST

ಹೊಸದಿಲ್ಲಿ: ಬಿಹಾರದ ಮಾಜಿ ಮುಖ್ಯಮಂತ್ರಿ, ಆರ್‌ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್‌ ಯಾದವ್‌ ಅವರಿಗೆ ನೀಡಲಾಗಿದ್ದ ಝಡ್‌ ಪ್ಲಸ್‌ ವಿಐಪಿ ಭದ್ರತೆಯನ್ನು ಕೇಂದ್ರ ಸರ್ಕಾರ ಹಿಂದಕ್ಕೆ ಪಡೆದುಕೊಂಡಿದೆ. ಅಷ್ಟೇ ಅಲ್ಲ ಬ್ಲ್ಯಾಕ್‌ ಕಮಾಂಡೋಗಳ ನಿಯೋಜನೆಗೂ ಕತ್ತರಿ ಹಾಕಿದೆ. ಬದಲಾಗಿ ಝಡ್‌ ಕ್ಯಾಟಗರಿಯ ಭದ್ರತೆಯನ್ನಷ್ಟೇ ಮುಂದುವರಿಸಿದೆ. ಬ್ಲ್ಯಾಕ್‌ ಕಮಾಂಡೋಗಳ ಬದಲಾಗಿ ಸಿಆರ್‌ಪಿಎಫ್ ಯೋಧರನ್ನು ನಿಯೋಜನೆ ಮಾಡಿದೆ ಎಂದು ಮೂಲಗಳು ತಿಳಿಸಿವೆ.
ಝಡ್‌ ಪ್ಲಸ್‌ ಭದ್ರತೆ ಪಡೆದಿದ್ದವರಿಗೆ ಬೆದರಿಕೆ ಇದೆ ಎನ್ನುವ ವಿಚಾರಕ್ಕೆ ಸಂಬಂಧಿಸಿದಂತೆ ಮರು ಪರಿಶೀಲನೆ ನಡೆಸಿದ ಬಳಿಕ ಸರ್ಕಾರ ಈ ನಿರ್ಧಾರಕ್ಕೆ ಬಂದಿದೆ ಎಂದು ಹೇಳಲಾಗಿದೆ.

ಇದೇ ವೇಳೆ ಬಿಹಾರದ ಇನ್ನೊಬ್ಬ ಮಾಜಿ ಮುಖ್ಯಮಂತ್ರಿ ಜಿತನ್‌ರಾಮ್‌ ಮಾಂಝಿ ಅವರಿಗೆ ನೀಡಲಾಗಿದ್ದ ಝಡ್‌ ಪ್ಲಸ್‌ ಹಾಗೂ ಸಿಆರ್‌ಪಿಎಫ್ ಭದ್ರತೆಯನ್ನೂ ಹಿಂದಕ್ಕೆ ಪಡೆದಿದೆ. ರಾಜ್ಯ ಸರ್ಕಾರದ ಪೊಲೀಸ್‌ ಭದ್ರತೆ ಮುಂದುವರಿಯುವುದೆಂದು ಹೇಳಲಾಗಿದೆ.