ಅಂಧ್ರ ಸಿಎಂ ನಾಯ್ಡುಗಿಂತ 3 ವರ್ಷದ ಮೊಮ್ಮಗ 6 ಪಟ್ಟು ಶ್ರೀಮಂತ !

Team Udayavani, Nov 22, 2018, 3:03 PM IST

ಅಮರಾವತಿ: ಆಂಧ್ರ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರು 2.99 ಕೋಟಿ ರೂಪಾಯಿ ಮೌಲ್ಯದ ಆಸ್ತಿ ಹೊಂದಿದ್ದರೆ ಅವರ 3 ವರ್ಷ ಪ್ರಾಯದ ಮೊಮ್ಮಗ ನಾನಾ ದೇವಾಂಶ್‌ ಬರೋಬ್ಬರಿ 18.71 ಕೋಟಿ ರೂಪಾಯಿ ಮೌಲ್ಯದ ಆಸ್ತಿ ತನ್ನ ಹೆಸರಿನಲ್ಲಿ ಹೊಂದಿದ್ದು ಅಜ್ಜನಿಂದ ಆರು ಪಟ್ಟು ಹೆಚ್ಚು ಸಿರಿವಂತ ಎನಿಸಿಕೊಂಡಿದ್ದಾನೆ!. 

ನಾಯ್ಡು ಅವರ ಪುತ್ರ, ಸಚಿವ ನಾರಾ ಲೋಕೇಶ್‌ ಅವರು ಗುರುವಾರ ಸುದ್ದಿಗೋಷ್ಠಿ ನಡೆಸಿ ಕುಟುಂಬದ ಆಸ್ತಿ ಘೋಷಿಸಿಕೊಂಡಿದ್ದು, 21.40 ಕೋಟಿ ರೂಪಾಯಿ ಆಸ್ತಿ ಅವರ ಹೆಸರಿನಲ್ಲಿದೆ. ಕಳೆದ ವರ್ಷ ಆಸ್ತಿ ಮೌಲ್ಯ 15.21 ಕೋಟಿ ರೂಪಾಯಿ ಆಗಿತ್ತು.

ಚಂದ್ರಬಾಬು ನಾಯ್ಡು ಅವರ ಆಸ್ತಿ ಕಳೆದ ವರ್ಷಕ್ಕಿಂತ 46 ಲಕ್ಷ ಹೆಚ್ಚಾಗಿದ್ದು, ಕಳೆದ ವರ್ಷವಿದ್ದ ಗೃಹ ಸಾಲ 5.64 ರಿಂದ 5.31 ಕೋಟಿಗೆ ಇಳಿದಿದೆ. 

ಜುಬ್ಲಿ ಹಿಲ್ಸ್‌ನಲ್ಲಿ ನಿರ್ಮಾಣ ಮಾಡಿರುವ ನೂತನ ಮನೆಯ ಮೌಲ್ಯ ಕಳೆದ ವರ್ಷ 7.75 ಕೋಟಿ ಇದ್ದರೆ ಈ ವರ್ಷ 8.96 ಕೋಟಿಗೆ ಏರಿಕೆಯಾಗಿದೆ.

ನಾಯ್ಡು ಅವರ ಪತ್ನಿ ಭವನೇಶ್ವರಿ ಅವರು ಕುಟುಂಬದ ಶ್ರೀಮಂತೆ ಎನಿಸಿಕೊಂಡಿದ್ದು, 31.01ಕೋಟಿ ರೂಪಾಯಿ ಆಸ್ತಿ ಅವರ ಹೆಸರಿನಲ್ಲಿದ್ದು ಕಳೆದ ವರ್ಷ 25.41 ಕೋಟಿ ಆಗಿತ್ತು. 

ಅಚ್ಚರಿ ಎಂದರೆ ಲೋಕೇಶ್‌ ಅವರ ಪತ್ನಿ ಬ್ರಾಹ್ಮಣಿ ಅವರ ಆಸ್ತಿ 15.01 ಕೋಟಿಯಿಂದ 7.72 ಕೋಟಿಗೆ ಕುಸಿದಿದೆ. ಅವರ ಸ್ಥಿರಾಸ್ತಿಯ ಮೌಲ್ಯ 36.14 ಲಕ್ಷದಿಂದ 5.66 ಕೋಟಿಗೆ ಏರಿಕೆಯಾಗಿದೆ. 

ಪುತ್ರ ದೇವಾಂಶ್‌ನ ಆಸ್ತಿ 18.71 ಕೋಟಿ ರೂಪಾಯಿ ಆಗಿದ್ದು, ಕಳೆದ ವರ್ಷ 11.54 ಕೋಟಿ ರೂಪಾಯಿ ಆಗಿತ್ತು. 

ಸತತ 8ನೇ ವರ್ಷ ಲೋಕೇಶ್‌ ಅವರು ಸುದ್ದಿಗೋಷ್ಠಿ ನಡೆಸಿ ಕುಟುಂಬದ ಆಸ್ತಿ ಮೌಲ್ಯ ಘೋಷಿಸಿಕೊಳ್ಳುತ್ತಿದ್ದಾರೆ.