ಸ್ವದೇಶಕ್ಕೆ ಬಂದ ವಿಶ್ವಸುಂದರಿ ಚಿಲ್ಲರ್‌

Team Udayavani, Nov 27, 2017, 6:20 AM IST

ಮುಂಬಯಿ/ಹೈದರಾಬಾದ್‌: ಪ್ರಸಕ್ತ ವರ್ಷದ ವಿಶ್ವ ಸುಂದರಿ ಕಿರೀಟವನ್ನು ಮುಡಿಗೇರಿಸಿಕೊಂಡ ಹರ್ಯಾಣದ ಮಾನುಷಿ ಚಿಲ್ಲರ್‌ ಶನಿವಾರ ರಾತ್ರಿ ಸ್ವದೇಶಕ್ಕೆ ವಾಪಸಾಗಿದ್ದಾರೆ. ಮುಂಬಯಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಅವರನ್ನು ಅಭಿಮಾನಿಗಳು,ಕುಟುಂಬ ಸದಸ್ಯರು ಅತ್ಯಂತ ಆತ್ಮೀಯವಾಗಿ ಸ್ವಾಗತಿಸಿದರು. ಈ ವೇಳೆ ಮಾತನಾಡಿದ ಚಿಲ್ಲರ್‌, “ಅಭಿಮಾನಿ ಗಳು ಹಾಗೂ ದೇಶದ ಜನತೆಯ ಪ್ರೀತಿ ಮತ್ತು ಬೆಂಬಲಕ್ಕೆ ನಾನು ಆಭಾರಿ. ನನ್ನನ್ನು ಸ್ವಾಗತಿಸಲೆಂದು ಬಂದ ಪ್ರತಿಯೊಬ್ಬರಿಗೂ ಧನ್ಯವಾದ ಸಲ್ಲಿಸಬಯಸುತ್ತೇನೆ’ ಎಂದಿದ್ದಾರೆ. 

ನಾಳೆ ಹೈದರಾಬಾದ್‌ನಲ್ಲಿ ಭಾಷಣ: ಇಲ್ಲಿ ಇದೇ 28ರಿಂದ ಆರಂಭವಾಗಲಿರುವ ಜಾಗತಿಕ ಉದ್ಯಮಶೀಲತೆ ಸಮಾ ವೇಶ(ಜಿಇಎಸ್‌)ದಲ್ಲಿ 2017ರ ವಿಶ್ವ ಸುಂದರಿ ಕಿರೀಟ ಮುಡಿಗೇರಿಸಿಕೊಂಡ ಮಾನುಶಿ ಚಿಲ್ಲರ್‌, ಮಹಿಳಾ ಕ್ರಿಕೆಟ್‌ ತಾರೆ ಮಿಥಾಲಿ ರಾಜ್‌, ಟೆನ್ನಿಸ್‌ ತಾರೆ ಸಾನಿಯಾ ಮಿರ್ಜಾ ಗೋಷ್ಠಿಗಳಲ್ಲಿ ಮಾತನಾಡಲಿದ್ದಾರೆ. “ವುಮನ್‌ ಫ‌ಸ್ಟ್‌: ಪ್ರಾಸ್ಪಾರಿಟಿ ಫಾರ್‌ ಆಲ್‌’ ಎಂಬ ಶೃಂಗದಲ್ಲಿ ಇವರು ತಮ್ಮ ಅಭಿಪ್ರಾಯ ಮಂಡಿಸಲಿದ್ದಾರೆ. ಈ ಶೃಂಗದಲ್ಲಿ ಪ್ರಧಾನಿ ನರೇಂದ್ರ ಮೋದಿ, ಅಮೆರಿಕ ಅಧ್ಯಕ್ಷ ಟ್ರಂಪ್‌ ಅವರ ಪುತ್ರಿ ಇವಾಂಕಾ ಟ್ರಂಪ್‌ ಮತ್ತಿತರ ಗಣ್ಯರು ಪಾಲ್ಗೊಳ್ಳಲಿದ್ದಾರೆ.