ಚಿರಾಗ್ ಪಾಸ್ವಾನ್ ಎನ್ ಡಿಎ ಸೇರುವುದು ಖಚಿತ: ಬಿಜೆಪಿ ಘೋಷಣೆ

Team Udayavani, Jul 17, 2023, 8:06 PM IST

ನವದೆಹಲಿ: ಗೃಹ ಸಚಿವ ಅಮಿತ್ ಶಾ ಅವರನ್ನು ಭೇಟಿ ಮಾಡಿದ ಬೆನ್ನಲ್ಲೇ ಲೋಕ ಜನಶಕ್ತಿ ಪಕ್ಷದ ಪ್ರಮುಖ ಬಣದ ನಾಯಕ ಚಿರಾಗ್ ಪಾಸ್ವಾನ್ ಅವರು ಎನ್‌ಡಿಎ ಸೇರಲಿದ್ದಾರೆ ಎಂದು ಬಿಜೆಪಿ ಸೋಮವಾರ ಸಂಜೆ ಘೋಷಿಸಿದೆ.

“ಲೋಕ ಜನಶಕ್ತಿ ಪಕ್ಷದ (ರಾಮ್ ವಿಲಾಸ್) ನಾಯಕ ಚಿರಾಗ್ ಪಾಸ್ವಾನ್ ಎನ್ ಡಿಎ ಸೇರಲು ನಿರ್ಧರಿಸಿದ್ದಾರೆ. ನಾನು ಅವರನ್ನು ಎನ್ ಡಿಎ ಕುಟುಂಬಕ್ಕೆ ಸ್ವಾಗತಿಸುತ್ತೇನೆ” ಎಂದು ಬಿಜೆಪಿ ಅಧ್ಯಕ್ಷ ಜೆಪಿ ನಡ್ಡಾ ಘೋಷಿಸಿದ್ದಾರೆ.

ಚಿರಾಗ್ ಪಾಸ್ವಾನ್ ಅವರು ಎನ್‌ಡಿಎ ಸಭೆಗೂ ಮುನ್ನ ಬಿಜೆಪಿಗೆ ಕೆಲ ಷರತ್ತು ಹಾಕಿದ್ದರು ಎಂದು ವರದಿಯಾಗಿದೆ. ದಿವಂಗತ ರಾಮ್ ವಿಲಾಸ್ ಪಾಸ್ವಾನ್ ಅವರ ಕೈಯಲ್ಲಿದ್ದ ದಲಿತ ಮತಬ್ಯಾಂಕ್ ಸೆಳೆಯುವ ಉದ್ದೇಶದಿಂದ ಅವರನ್ನು ಬಿಜೆಪಿ ಸೆಳೆದಿದೆ. ಬಿಹಾರದಲ್ಲಿ ನಿತೀಶ್ ಕುಮಾರ್ ಮತ್ತು ಆರ್ ಜೆಡಿ ವಿರುದ್ಧ ಬಿಜೆಪಿ ಪ್ರಬಲ ಹೋರಾಟ ನಡೆಸಲು ಮುಂದಾಗಿದ್ದು, 2024 ರಲ್ಲಿ ಏಕಾಂಗಿಯಾಗಿ ಹೋಗುವುದು ಅಪಾಯಕಾರಿ ಎಂದು ಬಿಜೆಪಿಗೆ ತಿಳಿದಿದ್ದು, ಹೊಸ ರಣತಂತ್ರ ರಚಿಸಿ ಕೆಲ ಸ್ಥಾನಗಳನ್ನು ತ್ಯಾಗ ಮಾಡಿಯಾದರೂ ಮತ್ತೆ ಅಧಿಕಾರ ಹಿಡಿಯಲು ಮುಂದಾಗಿದೆ.