ಕಾಂಗ್ರೆಸ್‌ನಲ್ಲಿ ಮುಸ್ಲಿಂ ರಕ್ತದ ಕಲೆ

Team Udayavani, Apr 25, 2018, 5:10 AM IST

ಅಲೀಗಢ: ‘ಕಾಂಗ್ರೆಸ್‌ ನ ಹಸ್ತದಲ್ಲಿ ಮುಸ್ಲಿಮರ ರಕ್ತದ ಕಲೆಯಿರುವುದು ನಿಜ’. ಹೀಗೆಂದು ಹೇಳಿರುವುದು ಬೇರೆ ಯಾರೂ ಅಲ್ಲ. ಕೇಂದ್ರದ ಮಾಜಿ ಸಚಿವ ಹಾಗೂ ಕಾಂಗ್ರೆಸ್‌ ನ ಹಿರಿಯ ನಾಯಕ ಸಲ್ಮಾನ್‌ ಖುರ್ಷೀದ್‌. ಅಲೀಗಢ ಮುಸ್ಲಿಂ ವಿವಿಯಲ್ಲಿ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಅವರು ನೀಡಿರುವ ಈ ಹೇಳಿಕೆ ಕಾಂಗ್ರೆಸ್‌ ಗೆ ತೀವ್ರ ಮುಜುಗರ ಉಂಟುಮಾಡಿದೆ. ಕಾಂಗ್ರೆಸ್‌ ನ ಕೈಗೆ ಮುಸ್ಲಿಮರ ರಕ್ತದ ಕಲೆ ಅಂಟಿಕೊಂಡಿರುವುದನ್ನು ನಾನು ಒಪ್ಪಿಕೊಳ್ಳುತ್ತೇನೆ. ನಾನು ಕೂಡ ಕಾಂಗ್ರೆಸ್ಸಿಗ. ಆ ರಕ್ತದ ಕಲೆಯನ್ನು ತೋರಿಸಲೂ ನಾನು ಸಿದ್ಧ ಎಂದಿದ್ದಾರೆ ಖುರ್ಷೀದ್‌.

ಸಂವಾದದ ವೇಳೆ, “ಕೇಂದ್ರದಲ್ಲಿ ಈ ಹಿಂದೆ ಕಾಂಗ್ರೆಸ್‌ ಅಧಿಕಾರದಲ್ಲಿದ್ದಾಗಲೇ ಹಸನ್‌ಪುರ, ಮಲಿಯಾನಾ, ಮುಜಫ‌ರ್‌ ನಗರ, ಇತರ ಹಲವಾರು ಕಡೆ ಕೋಮು ಸಂಘರ್ಷಗಳಾಗಿವೆ. ಹಾಗಾಗಿ ಆ ಗಲಭೆಗಳಲ್ಲಿ ಪ್ರಾಣ ತೆತ್ತ ಮುಸ್ಲಿಮರ ರಕ್ತ, ಕಾಂಗ್ರೆಸ್ಸಿಗೆ ಅಂಟಿಕೊಂಡಿಲ್ಲವೇ?’ ಎಂಬ ವಿದ್ಯಾರ್ಥಿಯೊಬ್ಬನ ಪ್ರಶ್ನೆಗೆ ಉತ್ತರಿಸುವ ವೇಳೆ ಖುರ್ಷೀದ್‌ ಈ ಹೇಳಿಕೆ ನೀಡಿದ್ದಾರೆ.

‘ಇದೊಂದು ರಾಜಕೀಯ ಪ್ರಶ್ನೆ. ಕಾಂಗ್ರೆಸ್‌ ಕೈಗೆ ಅಂಟಿಕೊಂಡಿರುವ ರಕ್ತದ ಕಲೆಗಳನ್ನು ನಾನು ತೋರಿಸಬಲ್ಲೆ. ಇದರಿಂದ, ನಿಮ್ಮ ಎದುರಾಳಿಗಳ ಮೇಲೆ ನೀವು ಹಲ್ಲೆ ಮಾಡಿದರೆ ನಿಮ್ಮ ಕೈಗೂ ರಕ್ತದ ಕಲೆ ಅಂಟಿಕೊಳ್ಳುತ್ತದೆ ಎಂಬ ಸತ್ಯವನ್ನು ನೀವು ಅರ್ಥಮಾಡಿಕೊಳ್ಳಬೇಕು. ನಿಮ್ಮ ಕೈಗೆ ರಕ್ತ ಅಂಟಿಕೊಳ್ಳದಂತೆ ನೋಡಿಕೊಳ್ಳಬೇಕು’ ಎಂದು ಉತ್ತರಿಸಿದ್ದಾರೆ. ಖುರ್ಷೀದ್‌ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್‌, ಅದು ಅವರ ವೈಯಕ್ತಿಕ ಅಭಿಪ್ರಾಯವಾಗಿದ್ದು ಪಕ್ಷದ್ದಲ್ಲ ಎಂದು ಹೇಳಿದೆ.