Congressಭಿನ್ನಮತ ಶಮನ ತಂತ್ರ, ಒಗ್ಗಟ್ಟಿನ ಮಂತ್ರ: ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಪುನಾರಚನೆ

ಪಂಚರಾಜ್ಯ, ಲೋಕಸಭೆ ಚುನಾವಣೆಗೆ ಕಾಂಗ್ರೆಸ್‌ ಕಾರ್ಯತಂತ್ರ

Team Udayavani, Aug 21, 2023, 12:04 AM IST

Congressಭಿನ್ನಮತ ಶಮನ ತಂತ್ರ, ಒಗ್ಗಟ್ಟಿನ ಮಂತ್ರ: ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಪುನಾರಚನೆ

ಹೊಸದಿಲ್ಲಿ: ಎಐಸಿಸಿ ಅಧ್ಯಕ್ಷ ಸ್ಥಾನವಹಿಸಿಕೊಂಡ ಬಳಿಕ ಇದೇ ಮೊದಲ ಬಾರಿಗೆ ಮಲ್ಲಿಕಾರ್ಜುನ ಖರ್ಗೆ ಅವರು ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ (ಸಿಡಬ್ಲ್ಯುಸಿ)ಯನ್ನು ಪುನಾರಚಿಸಿದ್ದಾರೆ. ವರ್ಷಾಂತ್ಯದಲ್ಲಿ ನಡೆಯಲಿರುವ ಪಂಚರಾಜ್ಯಗಳ ವಿಧಾನಸಭೆ ಚುನಾವಣೆ ಮತ್ತು 2024ರ ಲೋಕಸಭೆ ಚುನಾವಣೆಯ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ಮಹತ್ವ ಪಡೆದಿದೆ.

ಹೊಸ ಸಮಿತಿಯ 84 ಮಂದಿ ಸದಸ್ಯರ ಪಟ್ಟಿಯನ್ನು ರವಿವಾರ ಬಿಡುಗಡೆಗೊಳಿಸಲಾಗಿದ್ದು, ಖರ್ಗೆ ಅವರನ್ನು ಹೊರತುಪಡಿಸಿ ಕರ್ನಾಟಕದ ಮೂವರು ನಾಯಕರು ಸ್ಥಾನ ಪಡೆದಿದ್ದಾರೆ.

ಜಿ23 ಗುಂಪಿನ ಶಶಿ ತರೂರ್‌, ಮುಕುಲ್‌ ವಾಸ್ನಿಕ್‌, ಮನೀಷ್‌ ತಿವಾರಿ ಮತ್ತು ಆನಂದ್‌ ಶರ್ಮಾ ಅವರಿಗೂ ಸಿಡಬ್ಲ್ಯುಸಿಯಲ್ಲಿ ಸ್ಥಾನ ದಕ್ಕಿದೆ. ಒಟ್ಟು 39 ಮಂದಿ ಸಾಮಾನ್ಯ ಸದಸ್ಯರು, 32 ಖಾಯಂ ಆಹ್ವಾನಿತರು, 13 ವಿಶೇಷ ಆಹ್ವಾನಿತರು ಇದ್ದು, ಹಲವು ಯುವ ಮುಖಗಳು, 15 ಮಹಿಳೆಯರಿಗೆ ಅವಕಾಶ ಕಲ್ಪಿಸಲಾಗಿದೆ.

ಮುಂಬರುವ ಚುನಾವಣೆಗಳ ವೇಳೆಗೆ ಪಕ್ಷದೊಳಗಿನ ಬಿಕ್ಕಟ್ಟುಗಳೆಲ್ಲ ಶಮನಗೊಳಿಸಿ, ನಾಯಕರ ನಡುವಿನ ವೈಮನಸ್ಸಿಗೆ ಅಂತ್ಯಹಾಡಿ, ಒಗ್ಗಟ್ಟಾಗಿ ಚುನಾವಣೆ ಎದುರಿಸುವ ಲೆಕ್ಕಾಚಾರ ಹಾಕಿಕೊಂಡಿರುವುದು ಈ ಪುನಾರಚನೆಯಿಂದ ಸ್ಪಷ್ಟವಾಗಿದೆ.

ವಿಶೇಷಕಾರ್ಯಕಾರಿ ಸಮಿತಿಯಲ್ಲಿ ಗಾಂಧಿ ಕುಟುಂಬದ ಸೋನಿಯಾ ಗಾಂಧಿ, ರಾಹುಲ್‌, ಪ್ರಿಯಾಂಕಾ ವಾದ್ರಾ ಈ ಮೂವರು ನಾಯಕರೂ ಸ್ಥಾನ ಪಡೆದುಕೊಂಡಿದ್ದಾರೆ. ಜತೆಗೆ ಮಾಜಿ ಪ್ರಧಾನಿ ಡಾ| ಮನಮೋಹನ್‌ ಸಿಂಗ್‌ ಅವರನ್ನೂ ಸೇರಿಸಲಾಗಿದೆ.

ಈ ಹಿಂದೆ ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಪುನಾರಚನೆಯಾದದ್ದು 2020ರ ಸೆ. 11ರಂದು. ಆಗ ಸೋನಿಯಾ ಗಾಂಧಿಯವರು ಎಐಸಿಸಿ ಅಧ್ಯಕ್ಷರಾಗಿದ್ದರು.

ರಾಜ್ಯದ ಮೂವರಿಗೆ ಸ್ಥಾನ
ಹೊಸ ಸಮಿತಿಯಲ್ಲಿ ಕರ್ನಾಟಕದ ವೀರಪ್ಪ ಮೊಯ್ಲಿ, ಬಿ.ಕೆ. ಹರಿಪ್ರಸಾದ್‌ ಮತ್ತು ಸೈಯದ್‌ ನಾಸೀರ್‌ ಹುಸೇನ್‌ ಸ್ಥಾನ ಪಡೆದಿದ್ದಾರೆ.

ಹೊರಗುಳಿದವರು
ದಿನೇಶ್‌ ಗುಂಡೂರಾವ್‌, ಎಚ್‌.ಕೆ. ಪಾಟೀಲ್‌, ಕೆ.ಎಚ್‌. ಮುನಿಯಪ್ಪ; ರಾಜಸ್ಥಾನದ ಮಾಜಿ ಸಂಸದ ರಘುವೀರ್‌ ಸಿಂಗ್‌ ಮೀನಾ, ಜೈ ಪ್ರಕಾಶ್‌ ಅಗರ್ವಾಲ್‌, ಪಿ.ಎಲ್‌. ಪೂನಿಯಾ, ಪ್ರಮೋದ್‌ ತಿವಾರಿ ಮತ್ತು ರಘು ಶರ್ಮಾರನ್ನು ಸಿಡಬ್ಲ್ಯುಸಿಯಿಂದ ಹೊರಗಿಡಲಾಗಿದೆ. ಗುಂಡೂರಾವ್‌, ಮುನಿಯಪ್ಪ ಮತ್ತು ಎಚ್‌.ಕೆ. ಪಾಟೀಲ್‌ ಸದ್ಯ ಕರ್ನಾಟಕದ ಕಾಂಗ್ರೆಸ್‌ ಸರಕಾರದಲ್ಲಿ ಸಚಿವ ಹುದ್ದೆ ಹೊಂದಿರುವುದರಿಂದ ಕೈಬಿಡಲಾಗಿದೆ ಎನ್ನಲಾಗಿದೆ.

ಪೈಲಟ್‌ಗೆ ಮಣೆ
ಇದೇ ವರ್ಷಾಂತ್ಯದಲ್ಲಿ ಚುನಾವಣೆ ಎದುರಿಸಲಿರುವ ರಾಜಸ್ಥಾನದಲ್ಲಿ ಪಕ್ಷದ ನಾಯಕತ್ವದ ವಿರುದ್ಧ ಬಂಡೆದ್ದು ಸದ್ಯ ತಣ್ಣಗಾಗಿರುವ ಸಚಿನ್‌ ಪೈಲಟ್‌ ಅವರಿಗೆ ಸಿಡಬ್ಲ್ಯುಸಿಯಲ್ಲಿ ಸ್ಥಾನ ಕಲ್ಪಿಸುವ ಮೂಲಕ ಹೈಕಮಾಂಡ್‌ ಜಾಣ ನಡೆ ಪ್ರದರ್ಶಿಸಿದೆ. ಪೈಲಟ್‌ಗೆ ರಾಜಸ್ಥಾನ ಉಸ್ತುವಾರಿ ನೀಡುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ. ಈ ಮೂಲಕ ಸಿಎಂ ಅಶೋಕ್‌ ಗೆಹ್ಲೋಟ್ ಸಚಿನ್‌ ಪೈಲಟ್‌ ನಡುವೆ ಕದನ ವಿರಾಮ ಘೋಷಿಸುವಲ್ಲಿ ಹೈಕಮಾಂಡ್‌ ಯಶಸ್ವಿಯಾಗಿದೆ.