ದೇಶದ ಬಡವರಿಗೆ ಸಹಾಯ ಮಾಡಲು ಮನರೇಗಾ ಬಳಸಿಕೊಳ್ಳಿ

Team Udayavani, Jun 9, 2020, 12:54 PM IST

ಹೊಸದಿಲ್ಲಿ : ದೇಶದ ಜನರಿಗೆ, ಅದರಲ್ಲೂ ವಿಶೇಷವಾಗಿ ಕಡುಬಡವರಿಗೆ ಸಹಾಯ ಮಾಡಲು ಮಹಾತ್ಮಾಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯ್ದೆಯನ್ನು (ಮನರೇಗಾ) ಬಳಸಿಕೊಳ್ಳಬೇಕು.

ಕೋವಿಡ್ ಸಂಕಷ್ಟದ ಇಂದಿನ ಸಮಯದಲ್ಲಿ ಈ ಯೋಜನೆಯ ಮೂಲಕ ಬಡವರಿಗೆ ಕೆಲಸದ ಅವಕಾಶ ಕಲ್ಪಿಸಬೇಕು. ಆ ಮೂಲಕ ಅವರ ಹಸಿವು ನೀಗಿಸಲು ಮುಂದಾಗಬೇಕು ಎಂದು ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾಗಾಂಧಿ ಕೇಂದ್ರ ಸರಕಾರಕ್ಕೆ ಮನವಿ ಮಾಡಿದ್ದಾರೆ.

ಪತ್ರಿಕೆಯೊಂದಕ್ಕೆ ಬರೆದಿರುವ ಲೇಖನದಲ್ಲಿ ಅವರು ಹಿಂದಿನ ಯುಪಿಎ ಅಧಿಕಾರಾವಧಿಯಲ್ಲಿ ಜಾರಿಗೆ ತಂದಿರುವ ಈ ಯೋಜನೆಯ ಮಹತ್ವವನ್ನು ಒತ್ತಿ ಹೇಳಿದ್ದಾರೆ.

ಗ್ರಾಮೀಣ ಭಾರತದ ಯಾವುದೇ ನಾಗರಿಕನಿಗೆ ಈಗ ಕೆಲಸ ಮಾಡಲು ಕಾನೂನುಬದ್ಧ ಹಕ್ಕಿದೆ. ಸರಕಾರವು ನೀಡುವ ಕನಿಷ್ಠ ವೇತನ ದೊಂದಿಗೆ 100 ದಿನಗಳ ಕೆಲಸದ ಭರವಸೆ ಇದೆ. ಇದು ಸಾಧ್ಯವಾಗಿದ್ದು ಈ ಯೋಜನೆಯಿಂದ.

ಇದು ಬಡವರಿಗೆ ಹಸಿವು ನೀಗಿಸಿಕೊಳ್ಳಲು ಒಂದು ದಾರಿ ತೋರಿಸಿತು ಮತ್ತು ಹೆಚ್ಚು ಅಗತ್ಯವಿರುವವರ ಕೈಗೆ ಹಣ ದೊರಕುವಂತೆ ಮಾಡಿತು. 6 ವರ್ಷಗಳ ಕಾಲ ಪ್ರತಿಕೂಲ ಸರಕಾರ ಇದ್ದರೂ ಈ ಯೋಜನೆ ತನ್ನ ಮೌಲ್ಯವನ್ನು ಸಾಬೀತುಪಡಿಸಿದೆ ಎಂದು ಹೇಳಿದ್ದಾರೆ.

ಅಲ್ಲದೆ, ಹಿಂದಿನ ಕಾಂಗ್ರೆಸ್‌ ಸರಕಾರ ಜಾರಿಗೆ ತಂದ ಸಾರ್ವಜನಿಕ ವಿತರಣಾ ವ್ಯವಸ್ಥೆಯ ಮೂಲಕ ಪಡಿತರ ವಿತರಿಸುವ ಯೋಜನೆ, ಕಡು ಬಡವರ, ನಿರ್ಗತಿಕರ ಹಸಿವು ನೀಗಿಸಲು ಸಹಾಯ ಕಲ್ಪಿಸಿತು. ಕೋವಿಡ್ ಸಂಕಷ್ಟದ ಈ ಸಮಯದಲ್ಲಿ ನಿರ್ಗತಿಕರಿಗೆ, ಬಡವರಿಗೆ ಸಹಾಯ ಕಲ್ಪಿಸಲು ಈ ಎರಡೂ ಯೋಜನೆಗಳನ್ನು ಸಮರ್ಪಕವಾಗಿ ಬಳಸಿಕೊಳ್ಳಿ ಎಂದು ಸಲಹೆ ನೀಡಿದ್ದಾರೆ.