ಜಮ್ಮು ಕಾಶ್ಮೀರ: ಸರ್ವಿಸ್‌ ರೈಫ‌ಲ್‌ನೊಂದಿಗೆ ಪೊಲೀಸ್‌ ನಾಪತ್ತೆ

Team Udayavani, Apr 25, 2018, 11:36 AM IST

ಶ್ರೀನಗರ : ಜಮ್ಮು ಕಾಶ್ಮೀರದ ಬಡಗಾಂವ್‌ ಜಿಲ್ಲೆಯಲ್ಲಿ ಕರ್ತವ್ಯಕ್ಕೆ ನಿಯೋಜಿಸಲ್ಪಟ್ಟಿದ್ದ  ತಾರಿಕ್‌ ಅಹ್ಮದ್‌ ಭಟ್‌ ಎಂಬ ಪೊಲೀಸ್‌ ಕಾನ್‌ಸ್ಟೆಬಲ್‌ ತನ್ನ ರೈಫ‌ಲ್‌ ಜತೆಗೆ ನಾಪತ್ತೆಯಾಗಿದ್ದು ಆತ ಪೊಲೀಸ್‌ ಪಡೆಯನ್ನು ತ್ಯಜಿಸಿರುವುದಾಗಿ ಶಂಕಿಸಲಾಗಿದೆ.

ಬಡಗಾಂವ್‌ ಜಿಲ್ಲೆಯ ಪಾಖೇರಪುರ ಪೊಲೀಸ್‌ ಠಾಣೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ತಾರಿಕ್‌ ಅಹ್ಮದ್‌ ಭಟ್‌ ನಿನ್ನೆಯಿಂದ ಕರ್ತವ್ಯಕ್ಕೆ ಹಾಜರಾಗಿಲ್ಲ ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ. ಆತನ ಸರ್ವಿಸ್‌ ರೈಫ‌ಲ್‌ ಮತ್ತು ಕೆಲವು ಮದ್ದುಗುಂಡುಗಳು ಕೂಡ ನಾಪತ್ತೆಯಾಗಿವೆ ಎಂದವರು ಹೇಳಿದ್ದಾರೆ. 

ನಾಪತ್ತೆಯಾಗಿರುವ ಪೊಲೀಸ್‌ ಸಿಬಂದಿ ತಾರಿಕ್‌ ಪತ್ತೆಗಾಗಿ ಶೋಧ ಕಾರ್ಯ ನಡೆಯುತ್ತಿದೆ; ಆದರೂ ಆತ ಪೊಲೀಸ್‌ ಪಡೆಯನ್ನು ಪರಿತ್ಯಜಿಸಿರುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ. 

ಈ ತಿಂಗಳ ಆದಿಯಲ್ಲಿ ಸೈನಿಕನೋರ್ವ ಶೋಪಿಯಾನ್‌ ಜಿಲ್ಲೆಯಲ್ಲಿ ನಾಪತ್ತೆಯಾಗಿದ್ದು ಬಳಿಕ ಆತ ಉಗ್ರ ಸಂಘಟನೆಯನ್ನು ಸೇರಿಕೊಂಡಿರುವುದು ಬೆಳಕಿಗೆ ಬಂದಿತ್ತು.