ಚೀನ: ಕೊರೊನಾ ಸಾವಿನ ಸಂಖ್ಯೆ 2,592ಕ್ಕೆ ಏರಿಕೆ

ಫೆ. 26ರಂದು ಭಾರತೀಯರನ್ನು ಕರೆತರಲು ವಿಮಾನ

Team Udayavani, Feb 25, 2020, 1:34 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ದಿಲ್ಲಿ: ಮಾರಾಣಾಂತಿಕ ಕೊರೊನಾ ವೈರಸ್‌ ಭೀತಿಯಿಂದ ಅಲ್ಲಿರುವ ಭಾರತೀಯರನ್ನು ಕರೆತರುವ ಸಾಧ್ಯತೆಯಿದೆ. ವಿದೇಶಾಂಗ ಸಚಿವಾಲಯದ ಮಾಹಿತಿಯಂತೆ, ವುಹಾನ್‌ಗೆ ವಾಯುಪಡೆಯ ವಿಮಾನವನ್ನು ಫೆಬ್ರವರಿ 26ಕ್ಕೆ ಕಳುಹಿಸುವ ಸಾಧ್ಯತೆ ಇದ್ದು, ಫೆಬ್ರವರಿ 27ರಂದು ಅವರು ಭಾರತಕ್ಕೆ ಆಗಮಿಸುವ ನಿರೀಕ್ಷೆ ಇದೆ.

ಫೆಬ್ರವರಿ 20ರಂದು ವುಹಾನ್‌ಗೆ ತೆರಳಬೇಕಿದ್ದ ಸಿ -17 ಮಿಲಿಟರಿ ಸಾರಿಗೆ ವಿಮಾನಕ್ಕೆ ಅನುಮತಿ ನೀಡಲಾಗಿರಲಿಲ್ಲ. ಈಗ ಭಾರತೀಯ ಮಿಲಿಟರಿ ಸಾರಿಗೆ ವಿಮಾನಕ್ಕೆ ಅನುಮತಿ ನೀಡಿದೆ. ಫೆಬ್ರವರಿ 16 ಮತ್ತು 20ರ ನಡುವೆ ಜಪಾನ್‌, ಉಕ್ರೇನ್‌ ಮತ್ತು ಫ್ರಾನ್ಸ್‌ ವಿಮಾನಗಳಿಗೆ ಅನುಮತಿ ನೀಡಲಾಗಿತ್ತು. ಆದರೆ ಭಾರತದ ಕೋರಿಕೆಯನ್ನು ಅಂಗೀಕರಿಸಲಾಗಿರಲಿಲ್ಲ. ಈ ವಿಮಾನವು ಚೀನಕ್ಕೆ ತೆರಳುವಾಗ ಹೆಚ್ಚಿನ ಪ್ರಮಾಣದ ವೈದ್ಯಕೀಯ ಸಾಮಗ್ರಿಗಳನ್ನು ಸಾಗಿಸಲಿದ್ದು, ಬರುವಾಗ ಭಾರತೀಯರನ್ನು ಕರೆ ತರಳಿದೆ.

ಚೀನಾ, ಹಾಂಕಾಂಗ್‌, ಥೈಲ್ಯಾಂಡ್‌, ದಕ್ಷಿಣ ಕೊರಿಯಾ, ಸಿಂಗಾಪುರ್‌, ಜಪಾನ್‌, ಕಠ್ಮಂಡು, ಇಂಡೋನೇಷ್ಯಾ, ವಿಯೆಟ್ನಾಂ ಮತ್ತು ಮಲೇಷ್ಯಾದಿಂದ ಭಾರತಕ್ಕೆ ಬರುವ ವಿಮಾನಗಳ ಪ್ರಯಾಣಿಕರನ್ನು ಪರೀಕ್ಷಿಸಲಾಗುತ್ತಿದೆ.

ಚೀನದಲ್ಲಿ ಕೊರೋನಾ ವೈರಸ್‌ ಸಾವು ಮುಂದುವರೆದಿದೆ. ಕೇವಲ 24 ಗಂಟೆಗಳಲ್ಲಿ 150 ಮಂದಿ ಸೋಂಕು ಪೀಡಿತರು ಸಾವನ್ನಪ್ಪಿದ್ದಾರೆ. ಈ ಮೂಲಕ ಸಾವಿನ ಸಂಖ್ಯೆ 2,592ಕ್ಕೆ ಏರಿಕೆಯಾಗಿದೆ. ಫೆಬ್ರವರಿ 23ರಂದು ಚೀನಾದಾದ್ಯಂತ ಸುಮಾರು 150 ಮಂದಿ ಕೊರೋನಾ ವೈರಸ್‌ ಸೋಂಕು ಪೀಡಿತರು ಸಾವಪನ್ನಪ್ಪಿದ್ದಾರೆ. ರವಿವಾರ 409 ಮಂದಿಯಲ್ಲಿ ಹೊಸದಾಗಿ ಕೊರೋನಾ ವೈರಸ್‌ ಸೋಂಕು ಪತ್ತೆಯಾಗಿದೆ.