Constitution; ಕೈ ಜೈ ಸಂವಿಧಾನ ಅಭಿಯಾನಕ್ಕೆ ಬಿಜೆಪಿಯಿಂದ ಪ್ರತ್ಯಭಿಯಾನ

Team Udayavani, Jan 4, 2025, 6:48 AM IST

ಹೊಸದಿಲ್ಲಿ: ಸಂವಿಧಾನ ಕುರಿತ ಚರ್ಚೆ ಗರಿಗೆದರಿ ಕಾಂಗ್ರೆಸ್‌ ಮತ್ತು ಬಿಜೆಪಿ ನಡುವಿನ ಜಟಾಪಟಿ ತೀವ್ರವಾಗಿರುವಂತೆಯೇ ಸಂವಿಧಾನದ ಮೌಲ್ಯಗಳು ಹಾಗೂ ಸಂವಿಧಾನ ಶಿಲ್ಪಿ ಡಾ| ಬಿ.ಆರ್‌. ಅಂಬೇಡ್ಕರ್‌ ಅವರ ಮಹತ್ವವನ್ನು ತಿಳಿಸಲು ಬಿಜೆಪಿಯು ಜ. 11ರಿಂದ ಜ. 25ರ ವರೆಗೆ ದೇಶಾದ್ಯಂತ ಸಂವಿಧಾನ ಗೌರವ ಅಭಿಯಾನ ನಡೆಸಲು ಸಿದ್ಧತೆ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ.

ಕಾಂಗ್ರೆಸ್‌ ಆಯೋಜಿಸಲು ಉದ್ದೇಶಿಸಿರುವ ‘ಜೈ ಬಾಪು, ಜೈ ಭೀಮ್‌, ಜೈ ಸಂವಿಧಾನ್‌’ ಅಭಿಯಾನಕ್ಕೆ ತಿರುಗೇಟು ಎನ್ನುವಂತೆ ಈ ಕಾರ್ಯಕ್ರಮ ನಡೆಯಲಿದೆ ಎನ್ನಲಾಗುತ್ತಿದೆ.

ಅಂಬೇಡ್ಕರ್‌ ಕುರಿತಾದ ಸಚಿವ ಅಮಿತ್‌ ಶಾ ಹೇಳಿಕೆಯನ್ನು ವಿಪಕ್ಷಗಳು ಅಸ್ತ್ರ ಮಾಡಿಕೊಂಡಿರುವಂತೆಯೇ ಬಿಜೆಪಿ ಪ್ರತಿ ತಂತ್ರವಾಗಿ ಈ ಅಭಿಯಾನ ಆರಂಭಿಸಿದೆ ಎನ್ನಲಾಗಿದೆ. ಅಭಿಯಾನದ ಸಂಪೂರ್ಣ ಅವಧಿಯಲ್ಲಿ ಬಿಜೆಪಿ ವಿವಿಧ ರಾಜ್ಯಗಳ ರಾಜಧಾನಿ ಹಾಗೂ ಪ್ರಮುಖ ನಗರಗಳಲ್ಲಿ 50ಕ್ಕೂ ಅಧಿಕ ಕಾರ್ಯಕ್ರಮಗಳನ್ನು ನಡೆಸಲಿದೆ.