ವಧುವಿನ ತಾಯಿ ಜತೆ ವರನ ತಂದೆಯೇ ಪರಾರಿ: ಮಗ, ಮಗಳ ವಿವಾಹ ರದ್ದು!

Team Udayavani, Jan 21, 2020, 3:53 PM IST

ಅಹಮದಾಬಾದ್: ಮದುವೆ ಮಂಟಪದಿಂದ ವಧು, ವರ ಪರಾರಿಯಾಗುವುದು, ಹಿಂದಿನ ರಾತ್ರಿ ವಧು, ವರ ಪರಾರಿಯಾಗುವ ವರದಿ ಓದಿದ್ದೀರಿ. ಆದರೆ ಅವೆಲ್ಲಕ್ಕಿಂತ ಭಿನ್ನ ಎಂಬಂತೆ ವಧುವಿನ ತಾಯಿಯ ಜತೆ ವರನ ತಂದೆಗೆ ಪ್ರೇಮಾಂಕುರವಾಗಿ ಪರಾರಿಯಾಗಿದ್ದು, ಮತ್ತೊಂದೆಡೆ ವಧು, ವರನ ಮದುವೆ ರದ್ದಾಗಿರುವ ಘಟನೆ ಗುಜರಾತ್ ನಲ್ಲಿ ನಡೆದಿದೆ.

48 ವರ್ಷದ ವ್ಯಕ್ತಿ ಹಾಗೂ 46ವರ್ಷದ ಮಹಿಳೆ ನಾಪತ್ತೆಯಾಗಿದ್ದಾರೆಂದು ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಿದ್ದಾರೆ. ತಮ್ಮ ಮಕ್ಕಳ ವಿವಾಹಕ್ಕೆ ಕೆಲವೇ ದಿನಗಳು ಬಾಕಿ ಇರುವಾಗಲೇ ವರನ ತಂದೆ ಮತ್ತು ವಧುವಿನ ತಾಯಿ ಕಳೆದ ಹತ್ತು ದಿನಗಳಿಂದ ನಾಪತ್ತೆಯಾಗಿದ್ದಾರೆಂದು ವರದಿ ತಿಳಿಸಿದೆ.

ಸೂರತ್ ನ ಕಟಾರ್ ಗಾಮ್ ಟೆಕ್ಸ್ ಟೈಲ್ ಉದ್ಯಮಿ ಹಾಗೂ ನವಸಾರಿಯ ಗೃಹಿಣಿ ನಡುವೆ ಪ್ರೇಮಾಂಕುರವಾಗಿದ್ದು, ತಮ್ಮ ಮಕ್ಕಳ ವಿವಾಹಕ್ಕೂ ಮೊದಲೇ ಇವರು ಪರಾರಿಯಾಗಿದ್ದಾರೆ. ಪ್ರಾಥಮಿಕ ಮಾಹಿತಿ ಪ್ರಕಾರ, ವರನ ತಂದೆಗೂ, ವಧುವಿನ ತಾಯಿಗೂ ಈ ಮೊದಲೇ ಪರಿಚಯ ಇತ್ತು ಎಂದು ತಿಳಿಸಿದೆ.

ಟೈಮ್ಸ್ ಆಫ್ ಇಂಡಿಯಾ ವರದಿ ಪ್ರಕಾರ, ಯುವ ಜೋಡಿ ಫೆಬ್ರುವರಿ ಎರಡನೇ ವಿವಾಹವಾಗಲು ತಯಾರಿ ನಡೆಸಿದ್ದರು. ಏತನ್ಮಧ್ಯೆ ನಡೆದ ದಿಢೀರ್ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಮದುವೆಯನ್ನು ಮುಂದೂಡಲು ಹಿರಿಯರು ನಿರ್ಧಾರ ಕೈಗೊಂಡಿರುವುದಾಗಿ ವಿವರಿಸಿದೆ.

ವಧುವಿನ ತಾಯಿ ಮತ್ತು ವರನ ತಂದೆ ಹಲವು ವರ್ಷಗಳ ಹಿಂದೆ ನೆರೆಕೆರೆಯವರಾಗಿದ್ದು, ಇಬ್ಬರು ಒಬ್ಬರನ್ನೊಬ್ಬರು ಪ್ರೀತಿಸುತ್ತಿದ್ದರು. ಆದರೆ ಆ ಸಂದರ್ಭದಲ್ಲಿ ಇವರಿಬ್ಬರ ವಿವಾಹಕ್ಕೆ ಒಪ್ಪಿಗೆ ಸಿಕ್ಕಿಲ್ಲವಾದ್ದರಿಂದ ಇಬ್ಬರು ಬೇರೆ, ಬೇರೆಯಾಗಿ ವಿವಾಹವಾಗಿದ್ದರು. ಇದೀಗ ಎರಡನೇ ಬಾರಿ ಸಿಕ್ಕ ಅವಕಾಶದಲ್ಲಿ ಹಳೇ ಪ್ರೇಮಿಗಳು ಒಂದಾಗಲು ನಿರ್ಧರಿಸಿದ್ದಾರೆ ಎಂದು ವರದಿ ತಿಳಿಸಿದೆ.