ವಿಐಪಿಗಳಿಗೆ ವಿಶೇಷ ಲೇನ್‌

Team Udayavani, Aug 31, 2018, 6:00 AM IST

ಚೆನ್ನೈ: “ವಿಐಪಿಗಳಿಗೆ, ಹಾಲಿ ಜಡ್ಜ್ಗಳಿಗೆ ಟೋಲ್‌ ಪ್ಲಾಜಾಗಳಲ್ಲಿ ವಿಶೇಷ ಲೇನ್‌ಗಳನ್ನು ಮಾಡಿ. ಇಲ್ಲದಿದ್ದಲ್ಲಿ ನ್ಯಾಯಾಂಗ ನಿಂದನೆ ಮೊಕದ್ದಮೆ ಎದುರಿಸಿ’ ಹೀಗೆಂದು ಮದ್ರಾಸ್‌ ಹೈಕೋರ್ಟ್‌ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ (ಎನ್‌ಎಚ್‌ಎಐ) ಅಧಿಕಾರಿ ಗಳಿಗೆ ತಾಕೀತು ಮಾಡಿದೆ. ಜಡ್ಜ್ಗಳಿಗೆ ಮತ್ತು ವಿಐಪಿಗಳಿಗೆ ಟೋಲ್‌ ಪ್ಲಾಜಾಗಳಲ್ಲಿ ದಾಖಲೆ ಪರಿಶೀಲನೆಗಾಗಿ ಕಾಯುತ್ತಾ ಕುಳಿತುಕೊಳ್ಳುವುದು ಮುಜುಗರ ತರುತ್ತದೆ ಎಂದು ನ್ಯಾ.ಹುಲುವಾಡಿ ಜಿ.ರಮೇಶ್‌ ಮತ್ತು ನ್ಯಾ.ಎಂ.ವಿ.ಮುರಳೀಧರನ್‌ ನೇತೃತ್ವದ ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ ಎಂದು “ದ ಟೈಮ್ಸ್‌ ಆಫ್ ಇಂಡಿಯಾ’ ವರದಿ ಮಾಡಿದೆ.

ಈ ಬಗ್ಗೆ ಸಂಬಂಧಿತ ಎಲ್ಲಾ ಪ್ರಾಧಿಕಾರಗಳಿಗೆ ಎಚ್ಚರಿಕೆ ನೀಡಿದ ಮದ್ರಾಸ್‌ ಹೈಕೋರ್ಟ್‌ ಸಮಸ್ಯೆಯನ್ನು ಕೂಡಲೇ ಸರಿಪಡಿಸಿಕೊಳ್ಳಬೇಕು. ತನ್ನ ಆದೇಶ ರಾಷ್ಟ್ರ ವ್ಯಾಪಿ ಜಾರಿಯಾಗಬೇಕು ಎಂದು ತಾಕೀತು ಮಾಡಿದೆ. ಅದನ್ನು ಜಾರಿ ಮಾಡುವ ನಿಟ್ಟಿನಲ್ಲಿ ಎಲ್ಲಾ ಟೋಲ್‌ ಪ್ಲಾಜಾಗಳಿಗೆ ಸುತ್ತೋಲೆ ಹೊರಡಿಸಬಹುದು. ಈ ವಿಶೇಷ ಲೇನ್‌ಗಳಲ್ಲಿ ವಿಐಪಿ ಮತ್ತು ಜಡ್ಜ್ಗಳ ವಾಹನಗಳು ಮಾತ್ರ ತೆರಳುವಂತೆ ಮಾಡಬೇಕು. ಈ ನಿಯಮದ ಉಲ್ಲಂಘನೆಯನ್ನು ಗಂಭೀರವಾಗಿ ಪರಿಗಣಿಸಬೇಕು. ಕೆಲವೊಂದು ಸಂದರ್ಭಗಳಲ್ಲಿ ವಿಐಪಿಗಳು ಮತ್ತು ಜಡ್ಜ್ಗಳಿಗೆ ದಾಖಲೆ ಪರಿಶೀಲನೆ ನೆಪದಲ್ಲಿ ಕಿರಿಕಿರಿ ಉಂಟಾಗಿದೆ ಎಂದು ನ್ಯಾಯಪೀಠ ಆಕ್ಷೇಪ ಮಾಡಿದೆ. ನಾಲ್ಕು ವಾರಗಳ ಬಳಿಕ ಮುಂದಿನ ವಿಚಾರಣೆ ನಡೆಸುವುದಾಗಿ ಹೈಕೋರ್ಟ್‌ ಹೇಳಿದೆ.