ಸಾಲ ಕಟ್ಟ ದ ಶಿಲ್ಪಾ, ಶಮಿತಾ, ಸುನಂದಾ ಶೆಟ್ಟಿಗೆ ಸಮನ್ಸ್‌

Team Udayavani, Feb 14, 2022, 7:30 AM IST

ಮುಂಬೈ: ಉದ್ಯಮಿ ಒಬ್ಬರಿಂದ ಪಡೆದ ಸಾಲ ಮರಳಿಸದ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರದ ಅಂದೇರಿಯ ನ್ಯಾಯಾಲಯವು ಬಾಲಿವುಡ್‌ ನಟಿ ಶಿಲ್ಪಾ ಶೆಟ್ಟಿ, ಆಕೆಯ ಸಹೋದರಿ ಶಮಿತಾ ಶೆಟ್ಟಿ ಹಾಗೂ ತಾಯಿ ಸುನಂದಾ ಶೆಟ್ಟಿಗೆ ಸಮನ್ಸ್‌ ಕೊಟ್ಟಿದೆ. ಫೆ. 28ರಂದು ನ್ಯಾಯಾಲಯದ ಎದುರು ಹಾಜರಾಗುವಂತೆ ಸಮನ್ಸ್‌ನಲ್ಲಿ ಸೂಚಿಸಲಾಗಿದೆ.

ಶಿಲ್ಪಾ ಅವರ ತಂದೆ ದಿವಂಗತ ಸುರೇಂದ್ರ ಶೆಟ್ಟಿ ಮುಂಬೈನ ಆಟೋಮೊಬೈಲ್ಸ್‌ ಉದ್ಯಮಿ ಒಬ್ಬರಿಂದ 21 ಲಕ್ಷ ರೂ. ಸಾಲ ಪಡೆದಿದ್ದರಂತೆ. ವಾರ್ಷಿಕ ಶೇ.18 ಬಡ್ಡಿದರದಂತೆ ಪಡೆಯಲಾಗಿದ್ದ ಸಾಲವನ್ನು 2017ರ ಜನವರಿಯೊಳಗೆ ಬಡ್ಡಿ ಸಮೇತ ತೀರಿಸುವುದಾಗಿ ಒಪ್ಪಂದ ಮಾಡಿಕೊಳ್ಳಲಾಗಿತ್ತಂತೆ. ಈ ವಿಚಾರ ಸುರೇಂದ್ರಾ ಅವರ ಪೂರ್ತಿ ಕುಟುಂಬಕ್ಕೆ ತಿಳಿದಿತ್ತು. ಸಾಲದ ಅವಧಿ ಮುಗಿಯುವುದರೊಳಗೆ ಸುರೇಂದ್ರ ಅವರು ಅಸುನೀಗಿದ ಹಿನ್ನೆಲೆ ಅವರ ಕುಟುಂಬವೇ ಸಾಲ ತೀರಿಸಬೇಕಿತ್ತು. ಆದರೆ ಅವರು ಅದರಲ್ಲಿ ವಿಫ‌ಲರಾಗಿದ್ದಾರೆ ಎಂದು ಉದ್ಯಮಿ ದೂರು ದಾಖಲಿಸಿದ್ದಾರೆ.

ಸೋನಂ ಪತಿಗೆ ಸುಂಕದ ಸಂಕಷ್ಟ:
ಬಾಲಿವುಡ್‌ ನಟಿ ಸೋನಮ್‌ ಕಪೂರ್‌ ಅವರ ಪತಿ, ಉದ್ಯಮಿ ಆನಂದ್‌ ಅಹುಜಾ ಬಗ್ಗೆ ಅಂತಾರಾಷ್ಟ್ರೀಯ ಹಡಗು ಸಂಸ್ಥೆಯೊಂದು ಸುಂಕದಲ್ಲಿ ಮೋಸ ಮಾಡಿರುವ ಆರೋಪ ಮಾಡಿದೆ. ಆನಂದ್‌ ಅವರು ತಾವು ಖರೀದಿಸಿದ್ದ ಸರಕಿನ ಮೌಲ್ಯವನ್ನು ಶೇ. 90 ಇಳಿಸಿ ಸುಳ್ಳು ದಾಖಲೆ ಸಲ್ಲಿಸಿ, ಸುಂಕ ಕಡಿಮೆ ಮಾಡಿಕೊಂಡಿದ್ದಾರೆ ಎಂದು ಆರೋಪಿಸಲಾಗಿದೆ. ಇದಕ್ಕೆ ಆನಂದ್‌ ಪ್ರತಿಕ್ರಿಯಿಸಿದ್ದು, “ಸರಕನ್ನು ಇನ್ನಷ್ಟು ದಿನ ತಮ್ಮ ಬಳಿಯೇ ಇಟ್ಟುಕೊಂಡು ಹೆಚ್ಚು ಶುಲ್ಕ ಪಡೆಯುವುದಕ್ಕಾಗಿ ಸಂಸ್ಥೆಯು ತಮ್ಮಿಂದ ದಾಖಲೆಗಳನ್ನೇ ಪಡೆದಿರಲಿಲ್ಲ’ ಎಂದು ಪ್ರತ್ಯಾರೋಪ ಮಾಡಿದ್ದಾರೆ.