ಜನಸಾಮಾನ್ಯರಿಗೆ ಲಸಿಕೆ ಯಾವಾಗ ಕೊಡುತ್ತಾರೆ?

Team Udayavani, Jan 16, 2021, 7:20 AM IST

ಯಾಕೆ ಕೋವಿಡ್ ಲಸಿಕೆ? :

ದೇಹದಲ್ಲಿ ರೋಗ ಪ್ರತಿ­ಕಾಯ­ಗಳನ್ನು ಹೆಚ್ಚಿಸುವ ಕಾರ ಣಕ್ಕೆ ಲಸಿಕೆ ನೀಡಲಾಗುತ್ತದೆ. ಇದು ಸೋಂಕಿತರ ಚಿಕಿತ್ಸೆಗಾಗಿ ನೀಡುವ ಔಷಧವಲ್ಲ.

ಯಾರಿಗೆ, ಎಷ್ಟು ಮಂದಿಗೆ ಲಸಿಕೆ? :

ಆರಂಭ ದಲ್ಲಿ ಆರೋಗ್ಯ ಕಾರ್ಯಕರ್ತರಿಗೆ ಮಾತ್ರ. ಮೊದಲ ಲಸಿಕೆಯನ್ನು ಆಸ್ಪತ್ರೆಗಳ ಸ್ವತ್ಛತಾ/ ಡಿ ಗ್ರೂಪ್‌ ಸಿಬಂದಿಗೆ ನೀಡಿ ಗೌರವ ಸಲ್ಲಿಸಲಾಗುತ್ತಿದೆ. ರಾಜ್ಯದಲ್ಲಿ 7.4 ಲಕ್ಷ ಆರೋಗ್ಯ ಕಾರ್ಯಕರ್ತರು ನೋಂದಣಿ­ಯಾಗಿ­ದ್ದಾರೆ.

ಎಲ್ಲಿ ವಿತರಣೆ? :

ರಾಜ್ಯದ ಸರಕಾರಿ, ಖಾಸಗಿ ಆರೋಗ್ಯ ಕೇಂದ್ರ ಸೇರಿ ಒಟ್ಟು 242 ಕಡೆ ಶನಿವಾರ ಲಸಿಕೆ ವಿತರಿಸಲಾಗುತ್ತಿದೆ. ಅನಂತರ 2000ಕ್ಕೂ ಹೆಚ್ಚು ಕಡೆಗಳಲ್ಲಿ ಲಸಿಕೆ ವಿತರಣೆ ಕಾರ್ಯನಡೆಯಲಿದೆ.

ಜನಸಾಮಾನ್ಯರಿಗೆ ಯಾವಾಗ? :

ಬಹುತೇಕ ಮಾರ್ಚ್‌ನಲ್ಲಿ ನಡೆಯುವ ಎರಡನೇ ಹಂತದ ಲಸಿಕಾ ವಿತರಣೆಯಲ್ಲಿ 50 ವರ್ಷ ಮೇಲ್ಪಟ್ಟವರು ಮತ್ತು ದೀರ್ಘ‌­ಕಾಲಿಕ ರೋಗಗಳಿಂದ ಬಳಲುತ್ತಿರುವವರಿಗೆ ನೀಡಲಾಗುತ್ತದೆ.

ಲಸಿಕೆ ವಿತರಣೆಗೆ ಏನೆಲ್ಲ ಕ್ರಮ? :

ಕೇಂದ್ರದಲ್ಲಿ 7 ಹಂತಗಳಲ್ಲಿ ಲಸಿಕೆ ವಿತರಣೆ ಚಟುವಟಿಕೆ ನಡೆಯುತ್ತದೆ. ನೋಂದಣಿ, ಆಗಮಿಸಲು ಮೊಬೈಲ್‌ ಸಂದೇಶ, ದಾಖಲೆ ಪರಿಶೀಲನೆ, ವಿಶ್ರಾಂತಿ, ಚುಚ್ಚುಮದ್ದು ಹಾಗೂ ನಿಗಾ ಕೊಠಡಿಗಳು, ಲಸಿಕೆ ಯಶಸ್ವಿಯಾಗಿ ಹಾಕಿರುವ ಸಂದೇಶ.

ಲಸಿಕೆಗೆ ಪಡೆದವರಿಗೆ ಅಡ್ಡಪರಿಣಾಮ ಸಾಧ್ಯತೆ ಇದೆಯೇ? :

ಲಸಿಕೆ ಪಡೆದ 30 ನಿಮಿಷಗಳಲ್ಲಿಯೇ ಕೆಲವರಿಗೆ ಮಾತ್ರ ಜ್ವರ, ಮೈಕೈನೋವು, ತಲೆ ಸುತ್ತು ಕಾಣಿಸಿಕೊಳ್ಳಬಹುದು. ಹೀಗಾಗಿ ನಿಗಾ ಕೊಠಡಿಯಲ್ಲಿ 30 ನಿಮಿಷ ಕೂರಿಸಲಾಗುತ್ತದೆ. ಹೆಚ್ಚುವರಿ ಚಿಕಿತ್ಸೆಗೂ ವ್ಯವಸ್ಥೆ ಮಾಡಲಾಗಿರುತ್ತದೆ.

ಸೋಂಕಿತರಿಗೆ ಕೊಡಲಾಗುತ್ತದೆಯೇ? :

ಇಲ್ಲ, ಸೋಂಕಿನ ಲಕ್ಷಣ ಆಧರಿಸಿ ಇತರ ಔಷಧಗಳನ್ನು ಮಾತ್ರ ನೀಡಲಾಗುತ್ತದೆ. ಗುಣಮುಖರಾದ ಅನಂತರ ಭವಿಷ್ಯದಲ್ಲಿ ವೈರಸ್‌ನಿಂದ ರಕ್ಷಿಸಿಕೊಳ್ಳಲು ಲಸಿಕೆ ಪಡೆಯಬಹುದು.

ಲಸಿಕೆ ಹಾಕಿಸಿಕೊಂಡವರು ಮಾಸ್ಕ್ ಧರಿಸುವ ಅಗತ್ಯವಿಲ್ಲವೇ? :

ತಜ್ಞರ ಸೂಚನೆಯಂತೆ ಲಸಿಕೆ ಪಡೆದ ಮೇಲೂ ಮಾಸ್ಕ್ ಧರಿಸಬೇಕು. ಎಲ್ಲರಿಗೂ ಲಸಿಕೆ ಕೊಟ್ಟ ಅನಂತರ ಕಡ್ಡಾಯ ಮಾಸ್ಕ್ ನಿಯಮವನ್ನು ಕೈಬಿಡಲಾಗುತ್ತದೆ.

ಒಬ್ಬರಿಗೆ ಲಸಿಕೆ ಎಷ್ಟು ಬಾರಿ ನೀಡಲಾಗುತ್ತದೆ? ಯಾವಾಗ ರೋಗ ಪ್ರತಿಕಾಯಗಳು ಉತ್ಪತ್ತಿಯಾಗುತ್ತವೆ? :

ಲಸಿಕೆಯನ್ನು ಎರಡು ಹಂತಗಳಲ್ಲಿ ನೀಡಲಾಗುತ್ತದೆ. ಮೊದಲ ಡೋಸ್‌ ಪಡೆದ 28 ದಿನಗಳ ಬಳಿಕ ಬೂಸ್ಟರ್‌ ಡೋಸ್‌ ನೀಡಲಾಗುತ್ತದೆ. ಬೂಸ್ಟರ್‌ ಡೋಸ್‌ ತೆಗೆದುಕೊಂಡ ಎರಡು ವಾರಗಳ ಅನಂತರ ದೇಹದಲ್ಲಿ ಕೋವಿಡ್ ವೈರಸ್‌ ವಿರುದ್ಧ ಹೋರಾಡುವ ರೋಗ ಪ್ರತಿಕಾಯಗಳು ಉತ್ಪತ್ತಿಯಾಗುತ್ತವೆ.