Cyclone Fengal: ಭಾರೀ ಮಳೆಗೆ ಮುಳುಗಿದ ತಮಿಳುನಾಡು

Team Udayavani, Nov 28, 2024, 5:10 AM IST

ಚೆನ್ನೈ: ಬಂಗಾಲ ಕೊಲ್ಲಿಯಲ್ಲಿ ಸೃಷ್ಟಿಯಾಗಿರುವ ಫೆಂಗಲ್‌ ಚಂಡಮಾರುತ ತೀವ್ರತೆ ಪಡೆದಿದ್ದು, ಅದು ಶೀಘ್ರವೇ ತಮಿಳುನಾಡಿಗೆ ಅಪ್ಪಳಿಸಲಿದೆ.

ಚಂಡಮಾರುತ ಪ್ರಭಾವದಿಂದಾಗಿ ಕಾವೇರಿ ಮುಖಜ ಭೂಮಿ ಪ್ರದೇಶದಲ್ಲಿ ಬೆಳೆದು ನಿಂತಿರುವ ಭತ್ತದ ಕೃಷಿಗೆ ಹಾನಿಯುಂಟಾಗಿದೆ. ತಿರುವರೂರ್‌, ಮುತ್ತುಪೇಟ್ಟೈ ಸೇರಿ ವಿವಿಧೆಡೆ 2000 ಎಕ್ರೆ ಬೆಳೆ ಪ್ರದೇಶ ಹಾನಿಗೊ­ಳ­­ಗಾಗಿದೆ ಎಂದು ಅಂದಾಜಿಸಲಾಗಿದೆ.

ಹಲವೆಡೆ ಆಸ್ತಿಪಾಸ್ತಿಗಳಿಗೂ ಹಾನಿಯುಂಟಾಗಿದೆ. ಗುರುವಾರವೂ ತಮಿಳುನಾಡಿನ ಭಾಗಗಳಲ್ಲಿ ಮಳೆಯಾಗುವ ಸಾಧ್ಯತೆ ಇದೆ. ತಿರುಚಿರಾಪಳ್ಳಿ, ನಾಗಪಟ್ಟನಂ, ಮಯಿಲಾಡುತುರೈ ಮತ್ತು ತಿರುವರೂರ್‌ ಜಿಲ್ಲೆಗಳಲ್ಲಿ ಶಾಲೆಗಳಿಗೆ ರಜೆ ಘೋಷಿಸಲಾಗಿದೆ.

ಹೆಸರು ಕೊಟ್ಟಿದ್ದು ಸೌದಿ ಅರೇಬಿಯಾ
ತಮಿಳುನಾಡಿಗೆ ಅಪ್ಪಳಿಸಲಿರುವ ಫೆಂಗಲ್‌ ಚಂಡಮಾರುತಕ್ಕೆ ಸೌದಿ ಅರೇಬಿಯಾ ಹೆಸರು ಇರಿಸಿದೆ. ಅರೇಬಿಕ್‌ ಭಾಷೆಯಲ್ಲಿ ಫೆಂಗಲ್‌ ಎಂದರೆ “ಸಾಧಾರಣ’ ಎಂಬ ಅರ್ಥವಿದೆ.