ನೇಪಥ್ಯಕ್ಕೆ ನ್ಯಾರೋಗೇಜ್‌

Team Udayavani, Sep 13, 2018, 10:45 AM IST

ಅಹಮದಾಬಾದ್‌: ಏಷ್ಯಾದಲ್ಲಿಯೇ ಮೊದಲ ನ್ಯಾರೋ ಗೇಜ್‌ ರೈಲ್ವೇ ಲೈನ್‌ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಗುಜರಾತ್‌ನ ಧಬೋಯ್‌ನಿಂದ ಮಿಯಾಗಾಂವ್‌ ವರೆಗಿನ 33 ಕಿ.ಮೀ. ಮಾರ್ಗ ಶೀಘ್ರವೇ ಬ್ರಾಡ್‌ ಗೇಜ್‌ ಆಗಿ ಪರಿವರ್ತನೆಯಾಗಲಿದೆ. 

19ನೇ ಶತಮಾನದಿಂದ ಈ ಮಾರ್ಗ ಕಾರ್ಯವೆಸಗುತ್ತಾ ಬಂದಿದೆ. ಕೈಗಾರಿಕಾ ಪರಂಪರೆ ಎಂಬ ನಿಟ್ಟಿನಲ್ಲಿ ಅದನ್ನು ಯಥಾಸ್ಥಿತಿಯಲ್ಲಿಯೇ ಇರಿಸಬೇಕು ಎಂಬ ಕಾರಣದಿಂದ ಕೇಂದ್ರ ರೈಲ್ವೇ ಇಲಾಖೆ ಬಯಸಿತ್ತು. ಕೇವಲ 2 ರೈಲು ಸಂಚರಿಸುತ್ತಿದೆ ಎಂಬ ಕಾರಣಕ್ಕಾಗಿ ಅದನ್ನು ಪರಂಪರೆಯ ರೈಲು ಎಂದು ಪರಿಗಣಿಸಲು ಸಾಧ್ಯವಿಲ್ಲ. ಗೇಜ್‌ ಬದಲಾವಣೆ ಮಾಡಬೇಕು ಎಂದು ಜೂನ್‌ನಲ್ಲಿ ರೈಲ್ವೇ ಮಂಡಳಿಗೆ ಪಶ್ಚಿಮ ರೈಲ್ವೇ ಪತ್ರ ಬರೆದಿತ್ತು. ಕಾಮಗಾರಿ ಮುಕ್ತಾಯವಾದರೆ ವಡೋದರಾದಲ್ಲಿನ ಸಂಚಾರ ವ್ಯವಸ್ಥೆ ನಿಭಾಯಿಸಲು ಅನುಕೂಲವಾಗುತ್ತದೆ ಎಂದು ಪ್ರಸ್ತಾವಿಸಲಾಗಿತ್ತು.

ಗಮನಾರ್ಹ ಅಂಶವೆಂದರೆ 2011-12ನೇ ಸಾಲಿನಲ್ಲಿಯೇ ಅದಕ್ಕೆ ಅನುಮೋದನೆ ನೀಡಲಾಗಿತ್ತು. ಇದೀಗ ಯೋಜನೆ ಜಾರಿಗೆ ಟೆಂಡರ್‌ ಕರೆದು, ಅದನ್ನು ಗುತ್ತಿಗೆದಾರರಿಗೆ ಹಂಚಿಕೆ ಮಾಡಿಯೂ ಆಗಿದೆ ಎಂದು ‘ದ ಇಂಡಿಯನ್‌ ಎಕ್ಸ್‌ಪ್ರೆಸ್‌’ ವರದಿ ಮಾಡಿದೆ. ಒಟ್ಟು 110 ಕೋಟಿ ರೂ. ವೆಚ್ಚದಲ್ಲಿ ಕಾಮಗಾರಿ ಕೈಗೆತ್ತಿಕೊಳ್ಳಲಾಗುತ್ತದೆ. ದೇಶದ ಕೆಲ ಪರ್ವತ ಪ್ರದೇಶಗಳನ್ನು ಹೊರತುಪಡಿಸಿ ಉಳಿದೆಡೆ ವಾಣಿಜ್ಯಿಕವಾಗಿ ನ್ಯಾರೋ ಗೇಜ್‌ ರೈಲ್ವೇ ಲೈನ್‌ ಬಳಕೆ ಇಲ್ಲ. ಪಶ್ಚಿಮ ರೈಲ್ವೇ ಪಟಲ್ಪಾನಿಯಿಂದ ಕಲಾಕುಂಡ್‌ ವರೆಗೆ ಇರುವ 9.5 ಕಿ.ಮೀ. ಮಾರ್ಗವನ್ನು ಮಾತ್ರ ಪರಂಪರೆ ಎಂಬ ನೆಲೆಯಲ್ಲಿ ಕಾಪಿಡಲು ಪ್ರಸ್ತಾವ ಮಾಡಿದೆ.