ಅಖೀಲೇಶ್‌ ಸರಕಾರಿ ಬಂಗಲೆ ಹಾನಿ ಗಂಭೀರ ವಿಷಯ: ರಾಜ್ಯಪಾಲ

Team Udayavani, Jun 13, 2018, 4:53 PM IST

ಲಕ್ನೋ : ಉತ್ತರ ಪ್ರದೇಶದ ಮಾಜಿ ಮುಖ್ಯಮಂತ್ರಿ ಹಾಗೂ ಸಮಾಜವಾದಿ ಪಕ್ಷದ ನಾಯಕರಾಗಿರುವ ಅಖೀಲೇಶ್‌ ಯಾದವ್‌ ಅವರು ಈಚೆಗೆ ಸುಪ್ರೀಂ ಕೋರ್ಟ್‌ ಆದೇಶದ ಪ್ರಕಾರ ತೆರವುಗೊಳಿಸಿರುವ ಸರಕಾರಿ ಬಂಗ್ಲೆಗೆ ಕೋಟ್ಯಂತರ ರೂ. ಹಾನಿ ಮಾಡಲಾಗಿರುವುದು ಗಂಭೀರ ವಿಷಯವಾಗಿದ್ದು ಈ ಬಗ್ಗೆ ತಪ್ಪುಗಾರರ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ರಾಜ್ಯಪಾಲ ರಾಮ ನಾಯಕ್‌ ಅವರು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಅವರಿಗೆ ಪತ್ರ ಬರೆದಿದ್ದಾರೆ.

ಸರಕಾರಿ ಬಂಗಲೆಗಳ ನಿರ್ವಹಣೆಯನ್ನು ತೆರಿಗೆ ಪಾವತಿದಾರರ ದುಡ್ಡಿನಿಂದ ಮಾಡಲಾಗುತ್ತದೆ; ಆದುದರಿಂದ ಸರಕಾರಿ ಬಂಗಲೆಗೆ ಮಾಡಲಾಗಿರುವ ಹಾನಿ ಅಪರಾಧವಾಗುತ್ತದೆ ಎಂದು ರಾಜ್ಯಪಾಲರು ಪತ್ರದಲ್ಲಿ ಹೇಳಿದ್ದಾರೆ.

ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಅವರು ಈಚೆಗೆ ಸುಪ್ರೀಂ ಕೋರ್ಟ್‌ ಆದೇಶದ ಪ್ರಕಾರ ಮಾಜಿ ಮುಖ್ಯಮಂತ್ರಿಗಳು ತೆರವುಗೊಳಿಸಿರುವ ಎಲ್ಲ ಐದು ಸರಕಾರಿ ಬಂಗಲೆಗಳ ಸ್ಥಿತಿಗತಿಯನ್ನು ಕೂಲಂಕಷವಾಗಿ ಪರಿಶೀಲಿಸಿ ವರದಿ ಮಾಡುವಂತೆ ಎಸ್ಟೇಟ್‌ ಡಿಪಾರ್ಟ್‌ಮೆಂಟ್‌ಗೆ ಆದೇಶಿಸಿದ್ದಾರೆ.