ಜನವರಿ 15: ಮುಂಬಯಿ,ದಿಲ್ಲಿಯಲ್ಲಿ ಫ್ರೆಂಚ್‌ ಡಿಜೆ ಗೆಟ್ಟಾ ಕಾರ್ಯಕ್ರಮ

Team Udayavani, Jan 14, 2017, 12:09 PM IST

ಮುಂಬಯಿ : ನಿನ್ನೆ ಶುಕ್ರವಾರ ಇಲ್ಲಿ ನಡೆಯಬೇಕಿದ್ದ ವಿಶ್ವ ಪ್ರಸಿದ್ಧ  ಫ್ರೆಂಚ್‌ ಡಿಜೆ ಡೇವಿಡ್‌ ಗೆಟ್ಟಾ ಅವರ ಮುಂಬಯಿ ಸಂಗೀತ ಕಾರ್ಯಕ್ರಮವನ್ನು  ಇದೀಗ ಮರು ನಿಗದಿ ಮಾಡಲಾಗಿದ್ದು ಅದೀಗ ನಾಳೆ, ಭಾನುವಾರ ಮಧ್ಯಾಹ್ನ 11ರಿಂದ ಸಂಜೆ 4 ಗಂಟೆಯ ತನಕ ರಿಲಯನ್ಸ್‌ ಜಿಯೋ ಗಾರ್ಡನ್ಸ್‌ ನಲ್ಲಿ ನಡೆಯಲಿದೆ. 

49ರ ಹರೆಯದ ಗ್ರ್ಯಾಮಿ ಪ್ರಶಸ್ತಿ ಪುರಸ್ಕೃತ ಗೆಟ್ಟಾ ಅವರ ಮುಂಬಯಿ ಹಾಗೂ ದಿಲ್ಲಿ ಕಾರ್ಯಕ್ರಗಳು ನಾಳೆ ಭಾನುವಾರ ಜನವರಿ 15ರಂದು ಒಂದೇ ದಿನ ನಡೆಯಲಿದೆ ಎಂದು ಸಂಘಟಕರು ತಿಳಿಸಿದ್ದಾರೆ.

ಈ ಮೊದಲು ಗೆಟ್ಟಾ ಅವರ ಕಾರ್ಯಕ್ರಮ ಜನ.13ರಂದು ಮುಂಬಯಿಯ ಮಹಾಲಕ್ಷ್ಮೀ ರೇಸ್‌ ಕೋರ್ಸ್‌ ನಲ್ಲಿ ನಡೆಯುವುದಿತ್ತು; ಆದರೆ ಬೃಹನ್‌ಮುಂಬಯಿ ಮುನಿಸಿಪಲ್‌ ಕಾರ್ಪೊರೇಶನ್‌ ಭದ್ರತೆಯ ಕಾರಣಕ್ಕಾಗಿ ಅನುಮತಿ ನಿರಾಕರಿಸಿತ್ತು. ಕಾರ್ಯಕ್ರಮವನ್ನು ರಿಲಯನ್ಸ್‌ ಜಿಯೋ ಗಾರ್ಡನ್‌ನಲ್ಲಿ ನಡೆಸಲು ಸಂಘಟಕರು ಬಯಸಿದ್ದರೂ ಅದಕ್ಕೆ ಮುಂಬಯಿ ಪೊಲೀಸರಿಂದ ಅನುಮತಿ ಸಿಕ್ಕಿರಲಿಲ್ಲ. 

ಈ ಮೊದಲು ಗೆಟ್ಟಾ ಅವರ ಬೆಂಗಳೂರು ಕಾರ್ಯಕ್ರಮ ಕೂಡ ಭದ್ರತೆಯ ಕಾರಣಗಳಿಗೆ ರದ್ದಾಗಿತ್ತು. ಇಂದು ಶನಿವಾರ ಹೈದರಾಬಾದ್‌ನಲ್ಲಿ ಗೆಟ್ಟಾ ಕಾರ್ಯಕ್ರಮ ಪೂರ್ವಯೋಜಿತ ವೇಳಾಪಟ್ಟಿ ಪ್ರಕಾರ ನಡೆಯಲಿದೆ. ಭಾರತದ ಒಟ್ಟು ನಾಲ್ಕು ಮಹಾನಗರಗಳಲ್ಲಿ ಗೆಟ್ಟಾ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.