ದಾವೂದ್‌ ಸಹಚರನ ಆಸ್ತಿ ನಂಟು: ಪ್ರಫ‌ುಲ್‌ ಪಟೇಲ್‌ಗೆ ಸಂಕಷ್ಟ

Team Udayavani, Oct 14, 2019, 9:45 PM IST

ನವದೆಹಲಿ: ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂನ ಆಪ್ತ ಸಹಚರ ಇಕ್ಬಾಲ್‌ ಮಿರ್ಚಿ ಮಾಲೀಕತ್ವದ ಆಸ್ತಿ-ಪಾಸ್ತಿಗಳಿಗೆ ಸಂಬಂಧಿಸಿ ರಾಜಕೀಯ ನಾಯಕರು ಹಾಗೂ ಭೂಗತ ಜಗತ್ತಿನ ನಡುವಿನ ನಂಟಿನ ಕುರಿತು ತನಿಖೆ ನಡೆಸುತ್ತಿರುವ ಜಾರಿ ನಿರ್ದೇಶನಾಲಯದ ಕಣ್ಣು ಈಗ ಕೇಂದ್ರದ ಮಾಜಿ ಸಚಿವ, ಎನ್‌ಸಿಪಿ ನಾಯಕ ಪ್ರಫ‌ುಲ್‌ ಪಟೇಲ್‌ ಮೇಲೆ ಬಿದ್ದಿದೆ.

ನಾಗರಿಕ ವಿಮಾನಯಾನ ಮಾಜಿ ಸಚಿವರಾಗಿರುವ ಪ್ರಫ‌ುಲ್‌ ಪಟೇಲ್‌ರನ್ನು ಈ ಪ್ರಕರಣ ಸಂಬಂಧ ಇ.ಡಿ. ವಿಚಾರಣೆ ನಡೆಸುವ ಸಾಧ್ಯತೆ ದಟ್ಟವಾಗಿದೆ. ಈ ಕುರಿತು ಪ್ರತಿಕ್ರಿಯಿಸಿರುವ ಪಟೇಲ್‌, ನನಗೂ ಡ್ರಗ್‌ ದಂಧೆಕೋರ ಇಕ್ಬಾಲ್‌ ಮಿರ್ಚಿಗೂ ಸಂಬಂಧವೇ ಇರಲಿಲ್ಲ ಎಂದಿದ್ದಾರೆ.

ಇನ್ನೊಂದೆಡೆ, ಪ್ರಫ‌ುಲ್‌ ಪಟೇಲ್‌ ಮತ್ತು ದಾವೂದ್‌ನ ಡಿ-ಕಂಪನಿಗಿರುವ ಸಂಬಂಧವನ್ನು ಮಾಧ್ಯಮಗಳೇ ಬಹಿರಂಗಪಡಿಸಿವೆ ಎಂದಿರುವ ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರಾ, ಈಗ ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು ಎನ್‌ಸಿಪಿ ಜತೆಗಿನ ಮೈತ್ರಿ ಕಡಿದುಕೊಳ್ಳುವರೇ ಎಂದು ಪ್ರಶ್ನಿಸಿದ್ದಾರೆ.

ಮಿರ್ಚಿಯ ಇಬ್ಬರು ಸಹಚರರನ್ನು ಇ.ಡಿ. ವಿಚಾರಣೆಗೊಳಪಡಿಸಿ, ರಾಜಕೀಯ ನಾಯಕರು ಹಾಗೂ ಬಿಲ್ಡರ್‌ಗಳ ನಡುವಿನ ನಂಟಿನ ಕುರಿತು ಪ್ರಶ್ನಿಸಿದಾಗ, ಪಟೇಲ್‌ ಹೆಸರು ಪ್ರಸ್ತಾಪವಾಗಿದೆ ಎಂದು ಹೇಳಲಾಗಿದೆ.