ಕರಾಚಿಯಲ್ಲೇ ಇದ್ದಾನೆ ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂ

Team Udayavani, May 25, 2022, 1:02 AM IST

ಮುಂಬಯಿ: ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂ ಪಾಕಿಸ್ಥಾನದಲ್ಲಿ ಅಡಗಿದ್ದಾನೆ ಎನ್ನುವ ಅನುಮಾನಕ್ಕೆ ದಾವೂದ್‌ನ ಸಹೋದರಿ ಹಸೀನಾ ಪಾರ್ಕರ್‌ ಪುತ್ರ ಅಲಿಶಾಹ್‌ ಪಾರ್ಕರ್‌ ತೆರೆ ಎಳೆದಿದ್ದಾರೆ.

ದಾವೂದ್‌ ಮತ್ತವನ ಕುಟುಂಬ ಪಾಕಿಸ್ಥಾನದ ಕರಾಚಿಯಲ್ಲಿ ವಾಸಿಸುತ್ತಿದೆ ಎಂದು ಅಲಿಶಾಹ್‌ ಜಾರಿ ನಿರ್ದೇಶನಾಲಯದ ಅಧಿಕಾರಿಗಳ ಮುಂದೆ ಹೇಳಿದ್ದಾರೆ.

“ನಾನು ಹುಟ್ಟುವುದಕ್ಕೆ ಮೊದಲೇ ನನ್ನ ಮಾವ ಕರಾಚಿಗೆ ಸ್ಥಳಾಂತರಗೊಂಡಿದ್ದರು. ಅವರೊಂದಿಗೆ ನಾನಾಗಲೀ ಅಥವಾ ನನ್ನ ಕುಟುಂಬವಾಗಲೀ ಸಂಪರ್ಕದಲ್ಲಿಲ್ಲ. ಆದರೆ ಈದ್‌, ದೀಪಾವಳಿ ಯಂತಹ ಹಬ್ಬದ ಸಮಯದಲ್ಲಿ ದಾವೂದ್‌ ಪತ್ನಿ ಮೆಹಜಾಬಿನ್‌ ನನ್ನ ಪತ್ನಿ ಆಯೆಶಾ ಮತ್ತು ನನ್ನ ಸಹೋದರಿಯರಿಗೆ ಕರೆ ಮಾಡಿ ಮಾತನಾಡುತ್ತಾರೆ’ ಎಂದಿದ್ದಾರೆ ಅಲಿಶಾಹ್‌.

ಅವರು ಕರಾಚಿಯಲ್ಲಿರುವ ವಿಚಾರವನ್ನು ಸಂಬಂಧಿಗಳು ಮತ್ತು ಕೆಲವು ಮೂಲಗಳಿಂದ ತಿಳಿದುಕೊಂಡಿದ್ದಾಗಿ ಅವರು ಹೇಳಿದ್ದಾರೆ.

ಈ ವಿಚಾರ ಹೊರಬೀಳುತ್ತಿದ್ದಂತೆಯೇ ಮಹಾರಾಷ್ಟ್ರದ ಗೃಹ ಸಚಿವ ದಿಲೀಪ್‌ ವಾಲ್ಸೆ ಪಾಟಿಲ್‌ ಮಾತನಾಡಿದ್ದು, ಕೇಂದ್ರ ಸರಕಾರ ಈ ಬಗ್ಗೆ ಕೂಡಲೇ ಕ್ರಮ ತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.