ಡಿಸಿಸಿ ಬ್ಯಾಂಕ್‌ ಠೇವಣಿ 4 ದಿನದಲ್ಲಿ 6 ಪಟ್ಟು ಅಧಿಕ

Team Udayavani, Jan 7, 2017, 3:50 AM IST

ಹೊಸದಿಲ್ಲಿ:  500 ರೂ. ಹಾಗೂ 1000 ರೂ. ಅಪನಗದೀಕರಣದ ನಂತರ ಸಹಕಾರಿ ಬ್ಯಾಂಕ್‌ಗಳು ಭಾರೀ ಪ್ರಮಾಣದ ಕಪ್ಪುಹಣ ಜಮೆ ಮಾಡಿಕೊಂಡಿವೆ ಎಂಬ ಆರೋಪವಿದೆ. ಈ ಗುಮಾನಿಗೆ ಪುಷ್ಟಿ ನೀಡುವಂತೆ, ನವೆಂಬರ್‌ 9ರಿಂದ ನ.14ರ 4 ಕೆಲಸದ ದಿನಗಳ ಅವಧಿಯಲ್ಲಿ ದೇಶದ 285 ಜಿಲ್ಲಾ ಸಹಕಾರಿ ಬ್ಯಾಂಕ್‌ಗಳಲ್ಲಿ (ಡಿಸಿಸಿ ಬ್ಯಾಂಕ್‌ಗಳು) 3,051.2 ಕೋಟಿ ರೂ. ಸಂಗ್ರಹವಾಗಿದೆ.

ಇದು ಅಪನಗದೀಕರಣ ಘೋಷಣೆ ಯಾದ ಹಿಂದಿನ ದಿನದ ವಹಿವಾಟಿಗಿಂತ 6 ಪಟ್ಟು ಹೆಚ್ಚಾಗಿದೆ. ಅಪನಗದೀಕರಣ ಘೋಷಣೆಯಾದ ನ.8ರ ಹಿಂದಿನ ದಿನವಾದ ನ.7ರಂದು 496.88 ಕೋಟಿ ರೂ. ನಗದು ಡಿಸಿಸಿ ಬ್ಯಾಂಕ್‌ಗಳಲ್ಲಿ ಜಮೆ ಆಗಿತ್ತು. ಆದರೆ ನೋಟು ರದ್ದತಿ ಘೋಷಣೆಯಾದ ಅನಂತರ ನ.14ರವರೆಗೆ 3,051.2 ಕೋಟಿ ರೂ. ಜಮೆಯಾಗಿದೆ. ನ.7ರ 1 ದಿನದ ವಹಿವಾಟಿಗೆ ಹೋಲಿಸಿದರೆ ಇದು 6 ಪಟ್ಟು ಅಧಿಕ.

ಡಿಸಿಸಿ ಬ್ಯಾಂಕ್‌ಗಳು ಗ್ರಾಹಕರಿಂದ ಹಣ ಜಮೆ ಮಾಡಿಸಿಕೊಂಡರೂ ಅವುಗಳನ್ನು ಬಳಿಕ ವಾಣಿಜ್ಯ ಬ್ಯಾಂಕ್‌ಗಳ ತಮ್ಮ ಚಾಲ್ತಿ ಖಾತೆಯಲ್ಲಿ ಜಮೆ ಮಾಡಬೇಕು ಎಂಬ ನಿಯಮವಿದೆ. ಹೀಗಾಗಿ ಈ ಬ್ಯಾಂಕ್‌ಗಳಿಂದ ಭಾರೀ ಪ್ರಮಾಣದ ಹಣ ಹರಿದುಬರ ತೊಡಗಿರುವ ಸೂಚನೆ ಸಿಕ್ಕ ನಂತರ ನ.14ರಂದು “ಡಿಸಿಸಿ ಬ್ಯಾಂಕ್‌ಗಳು ಹಳೇ ನೋಟು ಜಮೆ, ವಿನಿಮಯ ಮಾಡಿಕೊಳ್ಳುವಂತಿಲ್ಲ’ ಎಂದು ಆರ್‌ಬಿಐ ಆದೇಶ ನೀಡಿತ್ತು. ಡಿಸಿಸಿ ಬ್ಯಾಂಕ್‌ಗಳಲ್ಲಿ ಕಪ್ಪುಹಣ ಜಮೆ ಯಾದ ಗುಮಾನಿ ಉಂಟಾದ ಕಾರಣ ಆರ್‌ಬಿಐ ಈ ಕ್ರಮ ಕೈಗೊಂಡಿತ್ತು.

ಒಟ್ಟಾರೆ ದೇಶದ 285 ಜಿಲ್ಲಾ ಸಹಕಾರಿ ಬ್ಯಾಂಕ್‌ಗಳಲ್ಲಿ ಅತಿ ಹೆಚ್ಚು ಹಣವು ಈ 4 ದಿನದ ಅವಧಿಯಲ್ಲಿ ಜಮೆಯಾಗಿದ್ದು ಗುಜರಾತ್‌ನ ಅಮ್ರೇಲಿ ಜಿಲ್ಲಾ ಮಧ್ಯಸ್ಥ ಸಹಕಾರಿ ಬ್ಯಾಂಕ್‌ನಲ್ಲಿ. ಇಲ್ಲಿ 209 ಕೋಟಿ ರೂ. ಹಣ ಜಮೆಯಾಗಿತ್ತು.