ನಗೆಪಾಟಲಿಗೀಡಾದ ಪಾಕ್‌ ರಕ್ಷಣಾ ಸಚಿವ!

Team Udayavani, Feb 28, 2019, 12:30 AM IST

ಬಾಲಕೋಟ್‌ ಮೇಲೆ ಐಎಎಫ್ ದಾಳಿ ನಡೆಸಿದಾಗ ಪಾಕಿಸ್ತಾನ ಏಕೆ ಅದನ್ನು ಹಿಮ್ಮೆಟ್ಟಿಸಲಿಲ್ಲ ಎಂಬ ಪಾಕಿಸ್ತಾನದ ಮಾಧ್ಯಮಗಳ ಪ್ರಶ್ನೆಗೆ ಪ್ರತಿಯಾಗಿ ಪಾಕಿಸ್ತಾನದ ರಕ್ಷಣಾ ಸಚಿವ ಪರ್ವೇಜ್‌ ಖಟ್ಟಕ್‌ ನೀಡಿದ್ದ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ನಗೆಪಾಟಲಿಗೀಡಾಗಿದೆ. ಭಾರತದ ದಾಳಿಯ ನಂತರ, ಸುದ್ದಿಗೋಷ್ಠಿ ನಡೆಸಿದ್ದ ಪರ್ವೇಜ್‌, “ದಾಳಿ ನಡೆದಾಗ ತೀವ್ರ ಕತ್ತಲೆ ಇದ್ದಿದ್ದರಿಂದ ಪ್ರತಿದಾಳಿ ನಡೆಸಲಾಗಲಿಲ್ಲ” ಎಂದಿದ್ದರು. 

ಇದಕ್ಕೆ ಟ್ವೀಟರ್‌ನಲ್ಲಿ ಹಲವಾರು ಮಂದಿ ಲೇವಡಿ ಮಾಡಿದ್ದಾರೆ. “ಪಾಕಿಸ್ತಾನದ ರಕ್ಷಣಾ ಸಚಿವರು ಹಳೆಯ ಅಂಕಲ್‌ ಥರಾ ಮಾತಾಡುತ್ತಿದ್ದಾರೆ’ ಎಂದು ಒಬ್ಬರು ಕಾಲೆಳೆದಿದ್ದರೆ, “ಅಯ್ಯೋ, ಪಾಕಿಸ್ತಾನದ ರಕ್ಷಣಾ ಸಚಿವರಿಗೆ ಚವನಪ್ರಾಶ ತಿನ್ನಿಸಿ’ ಎಂದು ಮತ್ತೂಬ್ಬರು  ಹಾಸ್ಯ ಮಾಡಿದ್ದಾರೆ. ಇನ್ನೂ ಒಬ್ಬರು, “ಪಾಕ್‌ ವಾಯುಪಡೆಯಲ್ಲಿ ರೇಡಾರ್‌ಗಳು ಇವೆಯೇ ಅಥವಾ ಯಾವುದೋ ಆ್ಯಂಟೆನವನ್ನೇ  ಹಿಡಿದುಕೊಂಡು ರೇಡಾರ್‌ ಅಂತ ನಂಬಿಕೊಂಡಿದ್ದೀರೋ’ ಎಂದು ಗೇಲಿ ಮಾಡಿದ್ದರೆ, ಇನ್ನೊಬ್ಬರು, “ಮೋದಿಯವರೆ, ಇನ್ನು ಮುಂದೆ ನೀವು ದಾಳಿ ಮಾಡುವುದಾದರೆ, ಬೆಳಗ್ಗೆ ದಾಳಿ ಮಾಡಿ’ ಎಂದು ಪರ್ವೇಜ್‌ ಕಾಲೆಳೆದಿದ್ದಾರೆ.