Delhi ತುಲಾಭಾರದ ವೇಳೆ ಹಗ್ಗ ಕಳಚಿ ಪೇಜಾವರ ಶ್ರೀಗಳ ತಲೆಗೆ ಬಿದ್ದ ತಕ್ಕಡಿಯ ಸರಳು

Team Udayavani, Nov 3, 2023, 3:43 PM IST

ಹೊಸದಿಲ್ಲಿ: ಶ್ರೀ ಪೇಜಾವರ ಮಠದ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದರ ಷಷ್ಟ್ಯಬ್ದ ಪ್ರಯುಕ್ತ ದಿಲ್ಲಿಯಲ್ಲಿ ಅಭಿಮಾನಿಗಳು ಮತ್ತು ಶಿಷ್ಯರು ಸಂಯೋಜಿಸಿರುವ ಮೂರು ದಿನಗಳ ಪ್ರಸನ್ನಾಭಿವಂದನಮ್‌ ಅಭಿವಂದನ ಕಾರ್ಯಕ್ರಮದಲ್ಲಿ ತುಲಾಭಾರ ನಡೆಸುತ್ತಿದ್ದ ವೇಳೆ ತಕ್ಕಡಿಯ ಹಗ್ಗ ತುಂಡಾಗಿ ಶ್ರೀಗಳಿಗೆ ಸಣ್ಣ ಪ್ರಮಾಣದ ತರಚಿದ ಗಾಯವಾದ ಘಟನೆ ನಡೆದಿದೆ.

ತಲೆಗೆ ಸಣ್ಣ ಗಾಯವಾಗಿದ್ದು, ಶ್ರೀಗಳು ಅನಾಹುತದಿಂದ ಪಾರಾಗಿದ್ದು, ಸುರಕ್ಷಿತವಾಗಿದ್ದಾರೆ ಎಂದು ಪೇಜಾವರ ಮಠದ ಮೂಲಗಳು, ಭಕ್ತರು ತಿಳಿಸಿದ್ದಾರೆ.

ತಕ್ಕಡಿ ಕುಸಿದು ಬೀಳುತ್ತಿದ್ದಂತೆ ಮಠದ ವಿಪ್ರರು, ಭಕ್ತರು ಆತಂಕಗೊಂಡು ಓಡೋಡಿ ಬಂದರು, ಆದರೆ ನಗುಮುಖದಲ್ಲೇ ಕೈ ಸನ್ನೆ ಮಾಡಿ ಏನೂ ಆಗಲಿಲ್ಲ ಎಂದು ಶ್ರೀಗಳು ಸೂಚಿಸಿದರು.

ಅಯೋಧ್ಯೆ ಶ್ರೀ ರಾಮಮಂದಿರ ನಿರ್ಮಾಣ ಟ್ರಸ್ಟ್‌ನ ವಿಶ್ವಸ್ತರಾಗಿರುವ ಶ್ರೀಗಳ ಪ್ರಸನ್ನಾಭಿವಂದನಮ್‌ ಮೂರು ದಿನಗಳ ಧಾರ್ಮಿಕ ಕಾರ್ಯಕ್ರಮಕ್ಕೆ ರಾಷ್ಟ್ರ ರಾಜಧಾನಿಯಲ್ಲಿ ಸೋಮವಾರ ಚಾಲನೆ ನೀಡಲಾಗಿತ್ತು. ಮೂರು ದಿನಗಳ ಕಾಲ ಭಗವದ್ಗೀತಾ ಜೀವನ್ಮಾರ್ಗದರ್ಶಿನಿ , ಅಭಿಷೇಕ , ವಿಶೇಷ ಪೂಜೆ ಗಳು, ಧಾರ್ಮಿಕ ಚಿಂತನೆಗಳು ಸೇರಿ ಹಲವು ಕಾರ್ಯಕ್ರಮಗಳನ್ನು ನಡೆಸಲಾಗಿದೆ.