ಫ್ಯಾಶನ್‌ ಡಿಸೈನರ್‌, ಮನೆ ಕೆಲಸದಾಳು ನಿಗೂಢ ಸಾವು; ಮೂವರು ಅರೆಸ್ಟ್‌

Team Udayavani, Nov 15, 2018, 11:24 AM IST

ಹೊಸದಿಲ್ಲಿ : ರಾಷ್ಟ್ರ ರಾಜಧಾನಿಯ ವಸಂತ ಕುಂಜ್‌ ಪ್ರದೇಶದಲ್ಲಿನ ತನ್ನ ನಿವಾಸದಲ್ಲಿ ದಿಲ್ಲಿ ಮೂಲದ ಫ್ಯಾಶನ್‌ ಡಿಸೈನರ್‌ 53ರ ಹರೆಯದ ಮಾಲಾ ಲಖಾನಿ ಮತ್ತು ಆಕೆಯ ಮನೆ ಕೆಲಸದಾಳು ನಿಗೂಢ ಸನ್ನಿವೇಶದಲ್ಲಿ ಸತ್ತು ಬಿದ್ದಿರುವುದು ಪತ್ತೆಯಾಗಿದೆ.

50ರ ಹರೆಯದ ಮನೆ ಕೆಲಸದಾಳನ್ನು ಬಹಾದ್ದೂರ್‌ ಎಂದು ಗುರುತಿಸಲಾಗಿದೆ. ಸುದ್ದಿ ತಿಳಿದು ಒಡನೆಯೇ ತನಿಖೆ ಆರಂಭಿಸಿರುವ ಪೊಲೀಸರು ಈ ಪ್ರಕರಣಕ್ಕೆ ಸಂಬಂಧಿಸಿ ಕನಿಷ್ಠ ಮೂವರನ್ನು ಬಂಧಿಸಿದ್ದಾರೆ.

ಎಲ್ಲ ಬಂಧಿತ ಆರೋಪಿಗಳು ತಾವು ಅಪರಾಧ ಎಸಗಿರುವುದನ್ನು ಒಪ್ಪಿಕೊಂಡಿದ್ದಾರೆ. ಮುಖ್ಯ ಆರೋಪಿಯನ್ನು ರಾಹುಲ್‌ ಅನ್ವರ್‌ ಎಂದು ಗುರುತಿಸಲಾಗಿದೆ. ಈತ ಫ್ಯಾಶನ್‌ ಡಿಸೈನರ್‌ ಮಾಲಾ ಲಖಾನಿ ಅವರ ವರ್ಕ್‌ ಶಾಪ್‌ ನಲ್ಲಿ ಟೈಲರ್‌ ಆಗಿ ದುಡಿಯುತ್ತಿದ್ದ. 
 
ಮುಖ್ಯ ಆರೋಪಿ ರಾಹುಲ್‌ ಲೂಟಿ ಮಾಡುವ ಉದ್ದೇಶದಿಂದ ತನ್ನ ಇಬ್ಬರು ಸಂಬಂಧಿಕರನ್ನು ಬಳಸಿಕೊಂಡು ಕೊಲೆ ಕೃತ್ಯ ಎಸಗಿದ್ದಾನೆ ಎಂದು ದಿಲ್ಲಿ ಪೊಲೀಸ್‌ ಜಂಟಿ ಕಮಿಷನರ್‌ ಆಜಯ್‌ ಚೌಧರಿ ತಿಳಿಸಿದ್ದಾರೆ.

ಮೃತರ ದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ತನಿಖೆ ಮುಂದುವರಿದಿದೆ.