Delhi Police: ದಿಲ್ಲಿಯ ಶಾಲೆ ಸ್ಫೋ*ಟದಲ್ಲಿ ಖಲಿಸ್ತಾನಿ ನಂಟು ಬಗ್ಗೆ ತನಿಖೆ!

Team Udayavani, Oct 21, 2024, 9:44 PM IST

ನವದೆಹಲಿ: ದೆಹಲಿಯ ಸಿಆರ್‌ಪಿಎಫ್ ಶಾಲೆಯ ಬಳಿ ಭಾನುವಾರ ಸಂಭವಿಸಿದ ಬಾಂಬ್‌ ಸ್ಫೋಟದಲ್ಲಿ ಖಲಿಸ್ತಾನಿ ನಂಟಿರುವ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಈ ಸ್ಫೋಟದಲ್ಲಿ ಯಾವುದೇ ಸಾವು ಸಂಭವಿಸಿರಲಿಲ್ಲ. ಆದರೆ ಸ್ಫೋಟದ ತೀವ್ರತೆಗೆ ಶಾಲೆಯ ಗೋಡೆ, ಪಕ್ಕದ ಅಂಗಡಿಯ ಗಾಜು ಪುಡಿಯಾಗಿತ್ತು. ಅಧಿಕಾರಿಗಳಿಗೆ ಮತ್ತು ಆಡಳಿತಕ್ಕೆ ಎಚ್ಚರಿಕೆ ನೀಡಲು ಈ ಸ್ಫೋಟ ಕೈಗೊಂಡಿರುವ ಸಾಧ್ಯತೆ ಇದೆ.

ಅಲ್ಲದೆ ಭಾನುವಾರ ಸಾಯಂಕಾಲ ಖಲಿಸ್ತಾನ್‌ ಜಿಂದಾಬಾದ್‌ ಎಂದು ಬರೆದಿರುವ ವಾಟರ್‌ಮಾರ್ಕ್‌ ಇರುವ ಸ್ಫೋಟದ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿತ್ತು. ಅಲ್ಲದೆ, ಈ ವಿಡಿಯೋದೊಂದಿಗೆ ನಮ್ಮನ್ನು ಸುಮ್ಮನಾಗಿಸಲು ಭಾರತ ಪ್ರಯತ್ನ ಸಾಧ್ಯವಿಲ್ಲ. ನಮ್ಮ ಧ್ವನಿಯನ್ನು ಅಡಗಿಸಲು ಸಾಧ್ಯವಿಲ್ಲ. ಯಾವುದೇ ಕ್ಷಣದಲ್ಲಿ ನಾವು ದಾಳಿ ಮಾಡಬಲ್ಲೆವು ಎಂದು ಖಲಿಸ್ತಾನಿ ಹ್ಯಾಷ್‌ಟ್ಯಾಗ್‌ ಜತೆ ಪೋಸ್ಟ್‌ ಮಾಡಲಾಗಿದೆ.