ಸದ್ಯಕ್ಕಿಲ್ಲ ಸಮ-ಬೆಸ!

Team Udayavani, Nov 12, 2017, 6:00 AM IST

ನವದೆಹಲಿ: ರಾಜಧಾನಿಯನ್ನು ಕಾಡುತ್ತಿರುವ ವಾಯು ಮಾಲಿನ್ಯ ನಿವಾರಿಸುವ ಸಲುವಾಗಿ ಸೋಮವಾರದಿಂದ ಆರಂಭವಾಗಬೇಕಾಗಿದ್ದ ಸಮ-ಬೆಸ ವಾಹನ ಸಂಚಾರ ರದ್ದಾಗಿದೆ.

ದೆಹಲಿ ಸರ್ಕಾರ ಹಾಗೂ ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣ ನಡುವಿನ ಗುದ್ದಾಟದಿಂದಾಗಿ ಈ ನಿರ್ಧಾರ ಮುಂದಕ್ಕೆ ಹೋಗಿದೆ. ಈ ನಡುವೆ ಸೋಮವಾರ ದೆಹಲಿ ಸರ್ಕಾರ ಎನ್‌ಜಿಟಿ ಮುಂದೆಯೇ ಪುನರ್‌ ಪರಿಶೀಲನಾ ಅರ್ಜಿ ಸಲ್ಲಿಕೆ ಮಾಡಲಿದೆ.

ಶುಕ್ರವಾರವಷ್ಟೇ ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣ, ಮಾಲಿನ್ಯ ನಿಯಂತ್ರಣಕ್ಕೆ 100 ಸಲಹೆ ಕೊಟ್ಟರೂ ಸಮ-ಬೆಸವನ್ನೇ ಏಕೆ ಆಯ್ದುಕೊಂಡಿರಿ ಎಂದು ದೆಹಲಿ ಸರ್ಕಾರವನ್ನು ಆಕ್ರೋಶದಿಂದ ಪ್ರಶ್ನಿಸಿತ್ತು. ಶನಿವಾರ ಬೆಳಗ್ಗೆ ವಿಚಾರಣೆ ನಡೆಸಿದ ಎನ್‌ಜಿಟಿ ಯಾರಿಗೂ ವಿನಾಯತಿ ತೋರದೇ ಸಮ-ಬೆಸ ವಾಹನ ಸಂಚಾರ ಆರಂಭಿಸಲು ದೆಹಲಿ ಸರ್ಕಾರಕ್ಕೆ ಒಪ್ಪಿಗೆ ನೀಡಿತು. ಆದರೆ, ಸಂಜೆ ವೇಳೆಗೆ ಈ ಆದೇಶ ಒಪ್ಪದ ಕೇಜ್ರಿವಾಲ್‌ ಸರ್ಕಾರ, ಸೋಮವಾರದಿಂದ ಶುರುವಾಗಬೇಕಾಗಿದ್ದ ಸಮ-ಬೆಸ ವಾಹನ ಸಂಚಾರ ನಿರ್ಧಾರವನ್ನೇ ರದ್ದು ಮಾಡಿತು.

ದೆಹಲಿ ಸರ್ಕಾರ ಮಹಿಳೆಯರು, ಸರ್ಕಾರಿ ಅಧಿಕಾರಿಗಳು ಮತ್ತು ಕೆಲವೊಬ್ಬರಿಗೆ ವಿನಾಯತಿ ನೀಡಿ ಸಮ-ಬೆಸ ಆರಂಭಿಸಲು ನಿರ್ಧರಿಸಿತ್ತು. ಆದರೆ ಎನ್‌ಜಿಟಿ ಇದನ್ನು ಒಪ್ಪಲಿಲ್ಲ. ಈ ವಿಚಾರದಲ್ಲಿ ವಿನಾಯತಿ ಏಕೆ ಬೇಕು ಎಂದು ಹೇಳಿತು. ಆದರೆ ಮಹಿಳೆಯರಿಗೆ ರಕ್ಷಣೆ ಕೊಡಲು ಅಸಾಧ್ಯ ಎಂದು ಅಲ್ಲಿನ ಸಾರಿಗೆ ಸಚಿವ ಕೈಲಾಶ್‌ ಗೆಹೊÉàಟ್‌ ಪ್ರತಿಪಾದಿಸಿದರು.

ಸುಧಾರಣೆ ಕಂಡಿದೆ:  ಶನಿವಾರ ವಾತಾವರಣದಲ್ಲಿ ಸುಧಾರಣೆ ಕಂಡಿದ್ದು, ವಾಯುಮಾಲಿನ್ಯ ಮಾನದಂಡ ಪಿಎಂ 2.5 ಮತ್ತು ಪಿಎಂ10 ರಲ್ಲಿ ಶೇ. 25ರಷ್ಟು ಸುಧಾರಣೆ ಕಂಡಿದೆ. ಹೀಗಾಗಿ ಸಿಎಂ ಅರವಿಂದ ಕೇಜ್ರಿವಾಲ್‌ ಮತ್ತು ಇತರ ಸಚಿವರು ನಡೆಸಿದ ಸಭೆಯಲ್ಲಿ ಸಮ-ಬೆಸ ನಿಯಮ ರದ್ದು ಮಾಡುವ ನಿರ್ಧಾರ ಕೈಗೊಳ್ಳಲಾಗಿದೆ.

ದೆಹಲಿ ಸರ್ಕಾರಕ್ಕೆ ತರಾಟೆ: ಶನಿವಾರ ಬೆಳಗ್ಗೆ ನಡೆದಿದ್ದ ವಿಚಾರಣೆ ವೇಳೆ ನ್ಯಾ.ಸ್ವತಂತ್ರ ಕುಮಾರ್‌ ನೇತೃತ್ವದ ಎನ್‌ಜಿಟಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌ ನೇತೃತ್ವದ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿತ್ತು. “ನಿಮ್ಮ ಸರ್ಕಾರದ ನಿರ್ಧಾರ ಕೇವಲ ರಸ್ತೆಯಲ್ಲಿ ವಾಹನ ಸಂಚಾರ ಕಡಿಮೆ ಮಾಡುವಂತೆ ಕಾಣುತ್ತದೆ. ಗಾಳಿಯ ಗುಣಮಟ್ಟ ಹೆಚ್ಚಿಸುವ ರೀತಿಯ ಯಾವ ಕ್ರಮಗಳು ಜಾರಿಯಾಗಿವೆ?’ ಎಂದು ಪ್ರಶ್ನಿಸಿದರು. 

ಜತೆಗೆ ಬೆಸ-ಸಮ ಸಂಚಾರ ವ್ಯವಸ್ಥೆ ಕಟ್ಟುನಿಟ್ಟಿನಲ್ಲಿ ಜಾರಿಯಾಗಬೇಕು. ದ್ವಿಚಕ್ರ ವಾಹನ ಬಳಕೆ ಮಾಡುವವರು, ಮಹಿಳೆಯರು, ಸರ್ಕಾರಿ ಅಧಿಕಾರಿಗಳು ಯಾರೇ ಇರಲಿ ಅವರಿಗೆ ವಿನಾಯಿತಿ ಕೊಡಲು ಸಾಧ್ಯವೇ ಇಲ್ಲ ಎಂದು ಮಂಡಳಿ ಸಾರಿತ್ತು. ಆದರೆ, ಸಿಎನ್‌ಜಿ ವಾಹನಗಳು, ತುರ್ತು ಸೇವೆಗಳಾದ ಆ್ಯಂಬ್ಯುಲೆನ್ಸ್‌ ಮತ್ತು ತ್ಯಾಜ್ಯ ನಿರ್ವಹಣೆಯ ವಾಹನಗಳ ಸಂಚಾರಕ್ಕೆ ಅನುಮತಿ ನೀಡಿತ್ತು.

ಬಸ್‌ಗಳಿಂದ ಕರ್ಕಶ ಶಬ್ದ: ವಾಯುಮಾಲಿನ್ಯ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ದೆಹಲಿ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡ ಎನ್‌ಜಿಟಿ, ದೆಹಲಿ ಬಸ್‌ಗಳು ಕರ್ಕಶ ಶಬ್ದ ಮಾಡುತ್ತವೆ. ಯಾಕೆ ಅವುಗಳ ನಿರ್ವಹಣೆಗೆ ಒತ್ತು ಕೊಡುತ್ತಿಲ್ಲ. ಬಸ್‌ಗಳು ಒಂದೋ ಪ್ರಯಾಣಿಕರಿಲ್ಲದೆ ಖಾಲಿ ಸಂಚರಿಸುತ್ತಿರುತ್ತವೆ ಅಥವಾ ವಿಪರೀತ ತುಂಬಿ ತುಳುಕುತ್ತಿರುತ್ತವೆ ಎಂದು  ನ್ಯಾ. ಸ್ವತಂತ್ರ ಕುಮಾರ್‌ ಆಕ್ಷೇಪಿಸಿದ್ದಾರೆ.

ವಿಮಾನ ರದ್ದುಗೊಳಿಸಿದ ಸಂಸ್ಥೆ
ಮಂಜು ಹಾಗೂ ಧೂಮ ಮಿಶ್ರಿತ ಹೊಗೆಯ ಪರಿಸ್ಥಿತಿಯಿಂದಾಗಿ ದೆಹಲಿಗೆ ವಿಮಾನ ಹಾರಾಟ ನಡೆಸದಿರಲು ಅಮೆರಿಕ ಮೂಲಕ ನಾಗರಿಕ ವಿಮಾನಯಾನ ಸಂಸ್ಥೆ ಯುನೈಟೆಡ್‌ ಏರ್‌ಲೈನ್ಸ್‌ ನಿರ್ಧರಿಸಿದೆ. ನವೆಂಬರ್‌ 18ರವರೆಗೆ ವಿಮಾನಗಳನ್ನು ರದ್ದುಗೊಳಿಸಲಾಗಿದ್ದು, ರದ್ದತಿ ಶುಲ್ಕ ಭರಿಸದೇ ಪ್ರಯಾಣಿಕರು ಇತರ ವಿಮಾನಗಳಿಗೆ ಬುಕ್‌ ಮಾಡಬಹುದಾಗದೆ ಎಂದು ಸಂಸ್ಥೆ ತಿಳಿಸಿದೆ.

ಮಹಿಳೆಯರ ಸುರಕ್ಷತೆ ವಿಚಾರದಲ್ಲಿ ರಾಜಿ ಇಲ್ಲವೇ ಇಲ್ಲ. ಸರ್ಕಾರಿ ಅಧಿಕಾರಿಗಳು, ದ್ವಿಚಕ್ರ ವಾಹನ ಸವಾರರಿಗೆ ವಿನಾಯಿತಿ ನೀಡಬೇಕು ಎಂದು ಕೇಳಿದ್ದನ್ನು ಎನ್‌ಜಿಟಿ ಒಪ್ಪಿಲ್ಲ. ಅದರ ಆದೇಶದ ಬಗ್ಗೆ ಗೌರವ ಇದೆ.
– ಕೈಲಾಶ್‌ ಗೆಹೊÉàಟ್‌, ದೆಹಲಿ ಸಾರಿಗೆ ಸಚಿವ