ಭಾರತದಲ್ಲಿ ನಿರ್ಬಂಧ; ತೈಲ ಬೇಡಿಕೆಗೆ ಹೊಡೆತ

Team Udayavani, Apr 30, 2021, 7:20 AM IST

ಹೊಸದಿಲ್ಲಿ: ಜಗತ್ತಿನ 3ನೇ ತೈಲ ಆಮದು ರಾಷ್ಟ್ರ ಭಾರತದಲ್ಲಿನ ಕೋವಿಡ್  ನಿರ್ಬಂಧಗಳು, ತೈಲ ಮಾರುಕಟ್ಟೆಯಲ್ಲಿ ಅಲ್ಲೋಲಕಲ್ಲೋಲ ಸೃಷ್ಟಿಸುವ ಸಾಧ್ಯತೆ ಇದೆ. “ಭಾರತದಲ್ಲಿ ಸೋಂಕು ಹೀಗೆಯೇ ತೀವ್ರಗೊಂಡರೆ, ಜಾಗತಿಕ ತೈಲ ಬೇಡಿಕೆಯೇ ಗಣನೀಯವಾಗಿ ಕುಸಿಯಬಹುದು.

ಅಲ್ಲದೆ ಮಿತಿಮೀರಿದ ದಾಸ್ತಾನಿಗೂ ಇದು ಕಾರಣವಾಗಬಹುದು’ ಎಂದು ತೈಲಮಾರುಕಟ್ಟೆ ವಿಶ್ಲೇಷಕ ಲೂಯೀಸ್‌ ಡಿಕ್ಸನ್‌ ಆತಂಕ ವ್ಯಕ್ತಪಡಿಸಿದ್ದಾರೆ. ಭಾರತ ನಿತ್ಯ ಸರಾ ಸರಿ 5,75,000 ಬ್ಯಾರೆಲ್‌ ತೈಲವನ್ನು ಆಮದು ಮಾಡಿಕೊಳ್ಳುತ್ತಿದೆ. ಆದರೆ ಕಳೆದ ಕೆಲವು ದಿನಗಳಿಂದ ತತ್‌ಕ್ಷಣದ ಮತ್ತು ಕಠಿನ ಸ್ಥಳೀಯ ಲಾಕ್‌ಡೌನ್‌ ಚಾಲ್ತಿಯಲ್ಲಿರುವುದರಿಂದ ತೈಲ ಬೇಡಿಕೆಗೆ ಭಾರೀ ಹೊಡೆತ ಬಿದ್ದಿದೆ. ಮಾರ್ಚ್‌ ತಿಂಗಳಿಗೆ ಹೋಲಿಸಿದಲ್ಲಿ, ಎಪ್ರಿಲ್‌ನಲ್ಲಿ ಶೇ.13ರಷ್ಟು ಬೇಡಿಕೆ ಕುಸಿದಿದೆ ಎಂದು ತಿಳಿಸಿದ್ದಾರೆ.

ಇಂದು ಸಚಿವರ ಜತೆ ಮೋದಿ ಸಭೆ :

ದೇಶದ ಕೋವಿಡ್  ಸ್ಥಿತಿ ಕುರಿತು ಚರ್ಚಿಸಲು ಪ್ರಧಾನಿ ಮೋದಿ ಶುಕ್ರವಾರ ಕೇಂದ್ರದ ಸಚಿವರೊಂದಿಗೆ ಸಭೆ ನಡೆಸಲಿದ್ದಾರೆ. ಸೋಂಕಿನ 2ನೇ ಅಲೆ ಅಪ್ಪಳಿಸಿದ ಬಳಿಕ ಸಚಿವರೊಂದಿಗೆ ಮೋದಿ ನಡೆಸುತ್ತಿರುವ ಮೊದಲ ಸಭೆ ಇದಾಗಿದೆ. ಮೇ 1ರಿಂದ ಆರಂಭವಾಗುವ ಲಸಿಕೆ ಅಭಿಯಾನ ಕುರಿತೂ ಚರ್ಚೆ ನಡೆಯಲಿದೆ.