ಸರಕಾರಿ ಬ್ಯಾಂಕ್‌ಗಳ ಉನ್ನತ ಹುದ್ದೆಯಲ್ಲಿ ಕೇವಲ 13 ಮಹಿಳೆಯರು!

Team Udayavani, Jan 11, 2023, 7:15 AM IST

ಹೊಸದಿಲ್ಲಿ: ದೇಶದ ಪ್ರಮುಖ ಸರಕಾರಿ ಬ್ಯಾಂಕ್‌ಗಳ ಪ್ರಮುಖ ಹುದ್ದೆಗಳಲ್ಲಿರುವುದು ಕೇವಲ 13 ಮಹಿಳೆಯರು ಎಂದು ವಿಶ್ಲೇಷಣೆಯೊಂದರಿಂದ ಗೊತ್ತಾಗಿದೆ.

ವೆಂಕಟೇಶ್‌ ನಾಯಕ್‌ ಎನ್ನುವವರು ಆರ್ಥಿಕ ಸೇವೆಗಳ ಸಾಂಸ್ಥಿಕ ಮಂಡಳಿ (ಎಫ್ಎಸ್‌ಐಬಿ)ಯಿಂದ ಪಡೆದ ಮಾಹಿತಿಗಳನ್ನು ಆಧರಿಸಿ ಮೇಲಿನಂತೆ ಮಾಹಿತಿ ನೀಡಿದ್ದಾರೆ.

ದೇಶದ ಸಾರ್ವಜನಿಕ ಬ್ಯಾಂಕ್‌ಗಳಲ್ಲಿ ಒಟ್ಟು 122 ನಿರ್ದೇಶಕರಿದ್ದಾರೆ.ಈ ಪೈಕಿ ಮಹಿಳೆಯರ ಸಂಖ್ಯೆ 13 ಮಾತ್ರ. ಅಂದರೆ ಕೇವಲ ಶೇ.10.66. ಒಟ್ಟು 186 ನಿರ್ದೇಶಕ ಸ್ಥಾನಗಳಿವೆಯಾದರೂ ಭರ್ತಿಯಾಗಿರುವುದು 122 ಮಾತ್ರ. ಇನ್ನೂ 64 ಸ್ಥಾನಗಳು ಅಂದರೆ ಲಭ್ಯವಿರುವ ಸ್ಥಾನಗಳಲ್ಲಿ 3ನೇ ಒಂದರಷ್ಟು ಖಾಲಿಯೇ ಇವೆ. ಹೀಗಿದ್ದರೂ ಮಹಿಳೆಯರಿಗೆ ನಿರೀಕ್ಷೆಯಷ್ಟು ಸ್ಥಾನ ಸಿಕ್ಕಿಲ್ಲ.

ಒಟ್ಟು 12 ಸಾರ್ವಜನಿಕ ಬ್ಯಾಂಕ್‌ಗಳಲ್ಲಿ ಉದ್ಯೋಗಿ ಅಧಿಕಾರಿಗಳ ನಿರ್ದೇಶಕರು ಮತ್ತು ಗುತ್ತಿಗೆ ಆಧಾರಿತ ಕೆಲಸಗಾರರ ನಿರ್ದೇಶಕರು ಇಲ್ಲ. ಸಾಲ ಕೊಡುವ ವೇಳೆ ಈ ನಿರ್ದೇಶಕರ ಮಾತನ್ನು ಬ್ಯಾಂಕ್‌ಗಳು ಗಂಭೀರವಾಗಿ ಪರಿಗಣಿಸುತ್ತವೆಯಾದರೂ ತೆರವಾಗಿರುವ ನಿರ್ದೇಶಕ ಸ್ಥಾನಗಳು ಭರ್ತಿಯಾಗಿಲ್ಲ ಎನ್ನಲಾಗಿದೆ.